Bomma 2, 16 - Bibeli do fee

Aza do Baesa ilaalui Izirɛli à ce igũ

¹ Si adɔ̃ kuntaa do mɛɛfasiai bomma ku jɛi Aza, ŋɔi Baesa ilaalui Izirɛliu í bɔ igũ si ilɛi Zudaa. Nɔ í koo wa ma bindii Rama ku ba ku ganji Aza do inɛi Zudaa ŋau a fita walakɔ a lɔ wa.

² Ŋɔi Aza í nya isɔ fũfũ do wura hai si amanii kpasɛ̃i Aɔ̃ Lafɛ̃ɛu do hai si ti nŋu ilaaluu takaɛ í bɛò inɛ ŋa bi Bɛni-Hadadi ilaalui Siri iyi í wa Damasiu.

³ Ŋɔi í ni a koo a sɔ̃ɔ ku jɔ̀ aŋa a dĩ akabuu bɛi baai nŋu do baaɛ à ce wo. Wee nŋu í sambaa wura do isɔ fũfũ wa. Na nŋu, a koo fũ akabuu iyi aŋaò Baesa ilaalui Izirɛliu à dĩu ku ba ku saa nŋu.

⁴ Ŋɔi Bɛni-Hadadi í jɛsi idei Aza. Nɔ í bɛ inɛ ngboi soogeɛ ŋau à bɔ igũ si ilui Izirɛli ŋa. Nɔ à koo à jɛ Iyɔ̃ɔ igũ do Dãa do Abɛli-Maimu hee do ilui Nɛfitali ŋa bii à ya jilɛ amaajɛ ŋau fei.

⁵ Iyi Baesa í gbɔ ideu, ŋɔi í jɔ̀ bindii Rama ku ma nɔ í leekĩ icɛɛ ŋau.

⁶ Ŋɔi Aza í jɔ̀ inɛi Zudaa ŋau fei à koo à so kuta ŋa do jĩi ŋa iyi Baesa wa maò bindii Ramau à koo à waa maò bindii Geba do Misipa.

Aza í mu walii Hanani piisɔ̃ɔ

⁷ Si waatiu bɛ, walii Hanani í bɔ bi Aza ilaalui Zudaau nɔ í sɔ̃ɔ í ni, si na iyi í jɔ̀ i kù na gbugbã si Aɔ̃ Lafɛ̃ɛɛ í gbe si ilaalui Siri, nŋui í jɔ̀ soogei inɛi Siri ŋau à fita hai si awɔɛ.

⁸ Inɛi Etiopi ŋa do inɛi Libii ŋa a kù tɔtɔɔ sooge nŋa ŋa wa siɛ ihɛ̃ nkpɔ nkpɔ do sarɛtii igũ nŋa ŋa do masa ŋa hai nɛ kɔɔ ba. Nɔ do nŋu fei Aɔ̃ Lafɛ̃ɛ í so ŋa í daaɛ si awɔ si na iyi í jɔ̀ nŋui ì na si gbugbã.

⁹ Do ntɔ, Aɔ̃ Lafɛ̃ɛ wa cɔ ilɛ bii fei ku ba ku sobi inɛ ŋa iyi à naa idɔ nŋa fei. Si ideu ihɛ̃ ì cei bɛi nnyɛi. Na nŋu, hai nnyi inɛ ŋa aa ya maa naa igũ siɛi.

¹⁰ Ŋɔi idɔɔkɔ̃i Aza í dede si waliiu, nɔ í jɔ̀ à muu piisɔ̃ɔ. Si waati akãu bɛ, Aza í taa inɛ gɔ ŋa gbugbã má si inɔi zamaau.

Kɔɔi bommai Aza

¹¹ Faajii icɛi Aza ŋa hai sinte nŋa hee ku bɔ kɔɔɛ à kɔ ŋa si tiai ilaalui Zudaa do ti Izirɛli ŋa.

¹² Si adɔ̃ kuntaa do mɛɛsãsiai bomma ku jɛi Azau, í ba bɔ̃ɔ si isɛɛ nɔ wa kpãa iju ntɔ ntɔ. Aza kù dɛdɛ Aɔ̃ Lafɛ̃ɛ, í gbe bi ilu iwɔ ŋai í bɔ.

¹³ Ŋɔi Aza í ku si adɔ̃ ciiji do akãsiai bomma ku jɛɛ.

¹⁴ Ŋɔi à suu inɔ balɛ iyi í jɔ̀ à tuaa si ilui Davidiu. À tɛ ikuɛui si daayii kutai inɔ balɛu. Woo ce tuaei iku ŋa à ce tuae ku dɔ̃ inunu ikã ikã nkpɔ nkpɔ à jilɔɔ kɔkɔi ikuɛu. Nɔ à ko ina nla nla na iriɛ.