Bomma 2, 15 - Bibeli do fee

Aza í nyiò inɛ ŋa wa si kpãai Aɔ̃ ku tɔɔ

¹ Ŋɔi hundei Ilaaɔ̃ í naa si Azaria amai Odɛdi.

² Nɔ Azaria í bɔ wajui Aza nɔ í sɔ̃ɔ í ni, i sotĩ i gbɔ idem ŋa, awɔ Aza do inɛi Zudaa ŋa do inɛi Bɛnzamɛɛ ŋa fei. Aɔ̃ Lafɛ̃ɛ á wɛɛ do iŋɛ bii ì wɛɛ do nŋu ŋa. Bii ì waa dɛdɛɛ ŋa aa yɔɔ ŋa. Amma bii ì kɔ̀siɛ ŋa á kɔ̀si ŋɛ.

³ Hai ku kpɛ wa inɛi Izirɛli ŋa a kù nɛ Ilaaɔ̃ ntɔ hee má jɛ woo wee iyi á kɔ ŋa si woodai Ilaaɔ̃.

⁴ Amma si inɔ kufɔ nŋa à na à sinda si Aɔ̃ Lafɛ̃ɛ nŋa à dɛdɛɛ nɔ à yɔɔ.

⁵ Si waati ŋau bɛ inɛ kãma ci ya ce isɛɛnɛɛ do laakai ku sũ, domi igũi wa ce si ilɛu fei.

⁶ Inɛ ŋa à ya maa tɛɛsɛ njɛi dimiò dimi, walakɔ si ilu do ilu. Ntɔ ntɔ, Ilaaɔ̃i wa yaga ŋa do wahala dimi ikã ikã ŋau bɛ fei.

⁷ Debɛi, iŋɛ i kɔ̃ɔsi gbugbã ŋa nɔ i maà mɔngɔ temua ŋa domi icɛ nŋɛ á nɛ ku sã.

⁸ Iyi Aza í gbɔ idei walii Azaria amai Odɛdi, ŋɔi í ba gbugbã í kɔ̃ɔsi nɔ í nya iwɛ̃ ŋa hai si ilɛi Zudaa do Bɛnzamɛɛu fei do hai si ilu ŋa iyi í gba si iri kutai Efaraimu ŋau. Nɔ í teese bi kuwee iyi í wa wajui kpasɛ̃i Aɔ̃ Lafɛ̃ɛu si bii à ya ceaa kuwee ŋau.

⁹ Ŋɔi ilaalu Aza í tɔtɔɔ inɛi Zudaa ŋau do inɛi Bɛnzamɛɛ ŋa fei, do inɛi Efaraimu ŋa do inɛi Manasee ŋa do inɛi Simeɔ̃ ŋa iyi à wa si inɔ nŋa, domi inɛi Izirɛli nkpɔ nkpɔ í yɛ iyi Aɔ̃ Lafɛ̃ɛ í wɛɛ do nŋu.

¹⁰ Ŋɔi à koo à tɔtɔɔ Zeruzalɛmu si cukpa mɛɛtasiai adɔ̃ maatũsiai bomma ku jɛi Azau.

¹¹ Ajɔ nŋu bɛ à cea Aɔ̃ Lafɛ̃ɛ kuweei do mɛɛmu ŋa iyi à gba wa. À saka kɛtɛ cĩɔ mɛɛje (700) do angudã dubu mɛɛje (7.000).

¹² Ŋɔi à ce kuwã aŋa a ya maa tɔɔ Aɔ̃ Lafɛ̃ɛi bala nŋa ŋau do idɔ nŋa fei do lasabu nŋa fei.

¹³ Inɛ baa yooma iyi kù waa tɔɔ Aɔ̃ Lafɛ̃ɛi inɛi Izirɛli ŋau fei aa kpaai. Hai ilu are walakɔ ilu amani, hai inɛmɔkɔ walakɔ inaabo, aa kpaai.

¹⁴ Ŋɔi à fɔ hee lele do kugbasi do inɔ didɔ̃ à waa fãò kãakãakĩ ŋa do kuu ŋa iyi aŋa aa leekĩò Aɔ̃ Lafɛ̃ɛ dee dee.

¹⁵ Ŋɔi inɛi Zudaa ŋau fei à wɛɛò inɔ didɔ̃ na kugbasiu, domi à cooi do idɔ nŋa fei. Nɔ à dɛ Aɔ̃ Lafɛ̃ɛ do idɔ nŋa fei nɔ í gba ŋa. Nɔ í mu nŋa laakai ku sũ si kɔɔi ilɛu fei.

¹⁶ Nɔ mɔm Aza í nya inɛ ngbo ku jɛi ayiɛ Maaka si na iyi í jɔ̀ í ce mii iyi í jɔ iwɛ̃ Asera. Aza í lɛgɛ bi kuweeu bugu bugu nɔ í koo í joo si lɔɔmai Sedorɔ̃ɔ.

¹⁷ Amma bi kuwee ŋa iyi à wa si geetei ilɛi Izirɛli ŋau a kù tã baa do iyi idɔi Aza í wa si Aɔ̃ Lafɛ̃ɛ si kuwɛɛɛ fei.

¹⁸ Í so isɔ fũfũ do wura do jɛɛ ŋa iyi nŋu do baaɛ à nya ikã a jɛ ti Ilaaɔ̃ í koo í jilɛ ŋa si inɔ kpasɛ̃i Ilaaɔ̃u.

¹⁹ Nɔ igũ kãma kù ce má hee si adɔ̃ kuntaa do miiusiai bomma ku muɛ.