Bomma 2, 14 - Bibeli do fee

¹ Ŋɔi Aza í ce mii iyi í sĩa do iyi í jɛ dee dee si wajui Aɔ̃ Lafɛ̃ɛɛ.

² Í nya bi kuweei inɛ njoo ŋau do bi kuweea iwɛ̃ ŋa si geete ŋa nɔ í lɛgɛ kuta iyi à gũa iwɛ̃ ŋa do jĩi iyi à gũa iwɛ̃ Asera ŋa.

³ Ŋɔi í ni inɛi Zudaa ŋa a dɛdɛ Aɔ̃ Lafɛ̃ɛi bala nŋa ŋau má, nɔ a jirima woodaɛ ŋa do ideɛ ŋa.

⁴ Nŋui í lɛgɛ bi kuweea iwɛ̃ ŋa si geete ŋa do bi ku joa iwɛ̃ ŋa tuae ŋa si ilɛi Zudaau fei. Nɔ ilɛu í wɛɛò laakai ku sũ si bommaɛ.

⁵ Ŋɔi í ma ilu ku nɛ gbugbã ŋa si ilɛi Zudaa, domi ilɛu í wɛɛò laakai ku sũ nɔ inɛ kãma kù naa igũ siɛ si inɔi adɔ̃ ŋau bɛ, si na iyi í jɔ̀ Aɔ̃ Lafɛ̃ɛ í jɔ̀ í nɛ laakai ku sũ.

⁶ Ŋɔi í sɔ̃ inɛi Zudaa ŋau í ni, à dɛ Aɔ̃ Lafɛ̃ɛ nwa nɔ í mu nwa laakai ku sũ si ilɛu fei. Na nŋu hai ilɛu í wa si awɔ nwa titã, i jɔ̀ ka ma iluu ka kɔ̃ɔsi gbugbãɛ ŋa, ka kaako ŋa do bindi ŋa do ile kugboka ŋa do gambo do isɔ ku kendiɛ ŋa. Ŋɔi à lɔsi icɛu ku ce, nɔ à yɔkɔ à ma ilu ŋau à jɔ̀ à nɛ gbugbã.

⁷ Aza í nɛ soogei Zudaa dubu cĩɔ mɛɛta ŋa (300.000) iyi à ya maa mu tɛli nla ŋau do kaka ŋa, do ti Bɛnzamɛɛ aŋa dubu cĩɔ minji do cinɛ (280.000) iyi à ya maa mu tɛli nɔ à mà afa ku ta. Nɔ aŋa fei kaasãanɛ ŋai.

⁸ Zera inɛi Etiopiu wa naa siɛ igũ do sooge miliɔ̃ɔ (1.000.000) do sarɛtii igũ cĩɔ mɛɛta (300). Nɔ í nɛ í to wa hee ilui Maresa.

⁹ Ŋɔi Aza mɔ í koo siɛ nɔ à koo à kò si lɔɔmai Sefata kɔkɔi Maresa.

¹⁰ Ŋɔi í tɔɔ Aɔ̃ Lafɛ̃ɛɛ í ni, Aɔ̃ Lafɛ̃ɛ, awɔ akãi aa yɔkɔ i sobi hai nɛ gbugbã walakɔ ilu gbugbã. Naa i sobi wa Aɔ̃ Lafɛ̃ɛ nwa, domi awɔi à waa kaaba, nɔ do iriɛi à naa igũ ku ce bi zamaa nla nlau ihɛ̃. Awɔi ì jɛ Aɔ̃ Lafɛ̃ɛ nwa, maà jɔ̀ ku jɛ amanɛi á jɛ igũu siɛ.

¹¹ Ŋɔi Aɔ̃ Lafɛ̃ɛ í fangaa inɛi Etiopi ŋau si wajui Aza do inɛi Zudaa ŋa. Nɔ inɛi Etiopi ŋau à sa.

¹² Ŋɔi Aza do zamaa iyi í wa bi tɛɛu à lele ŋa hee Geraa. Nɔ inɛi Etiopi ŋa à ku à mɔngɔ ku faaba kuwɛɛ nŋa, domi Aɔ̃ Lafɛ̃ɛ do soogeɛ ŋa à ce nfe nŋa. Ŋɔi Aza do zamaaɛu à gba mii nkpɔ nkpɔ à nɛò.

¹³ Ŋɔi à ce igũ do ilu ŋa iyi à wa kɔkɔi Geraa ŋau, domi idɔɔkɔ̃i Aɔ̃ Lafɛ̃ɛ í dede si ŋa. Nɔ à wusɛ ilu ŋau fei nɔ mii ŋa iyi à ba si í la.

¹⁴ Ŋɔi à koo à lɛgɛ ilei acɔi inɛ ŋa iyi à nɛ mɛɛmu gaa ŋau má, nɔ à mu angudã do iwo nkpɔ nkpɔ do kpookpo ŋa à nɛò. Si anyiɛ nɔ à sinda à baa Zeruzalɛmu.