Bomma 2, 13 - Bibeli do fee

Bomma ku jɛi Abiya

¹ Si adɔ̃ mɛɛwa do mɛɛjɔsiai bomma ku jɛi Zeroboamu, Abiya í jɛ bomma si ilɛi Zudaa.

² Í ce adɔ̃ mɛɛta si bommau ilui Zeruzalɛmu. Iyeɛi à ya kpe Mikaya amai Uriɛli inɛi Gibeau. Ŋɔi Abiya do Zeroboamu à waa ce igũ.

³ Ŋɔi Abiya í koo í ce igũu do sooge kaasãanɛ ku ja igũɛ ŋau aŋa dubu cĩɔ mɛɛ (400.000). Nɔ Zeroboamu mɔ í tɛ sooge kaasãanɛ ku ja igũɛ ŋau aŋa dubu cĩɔ mɛɛjɔ (800.000).

⁴ Hai antaii iri kutai Semaraimu iyi í wa si iri kutai Efaraimu ŋa Abiya í dede nɔ í ni, i sotĩ i gbɔ idem ŋa, awɔ Zeroboamu do inɛi Izirɛli ŋa fei.

⁵ I kù mà ŋa iyi Aɔ̃ Lafɛ̃ɛi inɛi Izirɛli ŋai í na Davidi bommai Izirɛliu hee do ajɔ fei nŋu do amaɛ ŋa do akabuu iyi kaa fũ ŋa?

⁶ Amma Zeroboamu amai Nebati woo ce icɛi Salomɔɔ amai Davidiu í dedeò ide ku kɔ̀ si mɛɛtuɛ.

⁷ Nɔ mɔngantɛ̃ gɔ ŋa, inɛ ŋa iyi a kù nɛ daa ncɛɛ, à tɔtɔɔ si fitiɛ nɔ à gba bommau si Roboamu amai Salomɔɔ. Roboamu ama awaasũi nɔ kù kpɛ si bommau titã. Kù nɛ gbugbã bɛi á kɔ̀ ide si waju nŋa.

⁸ Nsɛi ì waa ni ŋa iŋɛ aa naa igũ si bomma iyi Aɔ̃ Lafɛ̃ɛ í na tɔkui Davidi ŋau. Akpɔ nŋɛ í la, nɔ ama kɛtɛi wura ŋa iyi Zeroboamu í ce a jɛ iwɛ̃ nŋɛ ŋau à wa bi tu ŋɛ.

⁹ Iŋɛ si ì kɔ̀si woo weei Aɔ̃ Lafɛ̃ɛ ŋau ŋa ba. Aŋai à jɛ tɔkui Arɔ̃ɔ ŋa do inɛi Levii ŋau, amma ì koo ì dɛdɛ inɛ mmu ŋa i ce ŋa woo wee ŋa, bɛi inɛi ilɛ mmu ŋau à ya ceu. Inɛ baa yooma iyi í mu kɛtɛ kombo do angudã mɛɛje wa ku ceò kuwee, nŋui í ya baa ku jɛ woo weei mii iyi kù jɛ Ilaaɔ̃.

¹⁰ Amma bi ti awa, Aɔ̃ Lafɛ̃ɛi í jɛ Lafɛ̃ɛ nwa. Nɔ a kù fũsiɛ awɔ. Woo weeɛ ŋai à jɛ tɔkui Arɔ̃ɔ ŋa nɔ inɛi Levii ŋa à ya maa ceaa icɛ.

¹¹ Daakɔ do alɛ fei à ya ka cea Aɔ̃ Lafɛ̃ɛ kuwee iyi à ya jo si ina fei sãa sãai, nɔ ka jo tuae ku dɔ̃ inunu ŋa, nɔ ka jilɛa Ilaaɔ̃ pɛ̃ɛ si taabu kumáu, nɔ alɛ fei à ya ka má fitilai wura ŋau si antaii bi ku lesi nŋau. Awa à ya ka maa ce icɛi Aɔ̃ Lafɛ̃ɛui dee dee. Amma iŋɛ ì kɔ̀siɛ ŋa.

¹² Ilaaɔ̃ do woo weeɛ ŋau à wɛɛ do awa, nɔ à tã sɔɔlu a fã kãakãakĩ a naò laabaaui igũ si gãmɛ nŋɛ. Iŋɛ inɛi Izirɛli ŋa, i maà ba Aɔ̃ Lafɛ̃ɛi bala nŋɛ ŋau igũ ku ce, domi i kaa jɛ igũ ŋa.

¹³ Zeroboamu í nya sooge ŋa à koo à manji wa do anyii inɛi Zudaa ŋau ku ba a ce igũu waju do anyi.

¹⁴ Iyi inɛi Zudaa ŋau à cɔ ilu, ŋɔi à ba aŋa à nɛ kujai waju do anyi. Ŋɔi à dɔ̃ anu à tɔɔ Aɔ̃ Lafɛ̃ɛ, nɔ woo wee ŋau à fã kãakãakĩ ŋa.

¹⁵ Inɛi Zudaa ŋau à dɔ̃ anui igũ. Ŋɔi Ilaaɔ̃ í lele Zeroboamu do inɛi Izirɛli ŋau fei si wajui Abiya do inɛi Zudaa ŋa.

¹⁶ Inɛi Izirɛli ŋau à sa nɔ Ilaaɔ̃ í so ŋa í daa inɛi Zudaa ŋa si awɔ.

¹⁷ Abiya do zamaaɛ ŋa à ce asɔɔ nŋa ntɔ ntɔ. Sooge kaasãanɛ dubu cĩɔ miiui (500.000) í ku si inɛi Izirɛli ŋau.

¹⁸ Si waati nŋu bɛ inɛi Izirɛli ŋau à yɛ anyɔ, nɔ inɛi Zudaa ŋa à jɛ igũ si na iyi í jɔ̀ à na gbugbã si Aɔ̃ Lafɛ̃ɛi bala nŋa ŋa.

¹⁹ Abiya í lele Zeroboamu nɔ í gba iluɛ ŋa. Í gba Betɛli do ilɛɛkoɛ ŋa do Yɛsana do ilɛɛkoɛ ŋa do Eforɔ̃ɔ do ilɛɛkoɛ ŋa.

²⁰ Zeroboamu kù nɛ gbugbã kãma si waatii kuwɛɛi Abiya. Si anyiɛ Aɔ̃ Lafɛ̃ɛ í jɔ̀ í ku.

²¹ Amma Abiya í ba gbugbã. Í nɛ abo maatɛ̃ɛ nɔ í bí ama inɛmɔkɔ kɔnfia do minji do ama inaabo mɛɛwa do mɛɛfa.

²² Faajii icɛ ŋa iyi Abiya í ce do mii iyi í ce do ide iyi í fɔ à kɔɔ si tiai walii Ido.

²³ Abiya í na í ku, nɔ à suu bi balaɛ ŋa ilui Davidi. Ŋɔi amaɛ Aza í jɛ bomma si agbɛɛ. Si waatii Aza, ilɛu í ba laakai ku sũi zakai adɔ̃ mɛɛwa.