Bomma 2, 12 - Bibeli do fee

Sisaki ilaalui Ezibitiu í bɔ igũ Zudaa

¹ Waati iyi Roboamu í buba í ce ncɛɛ si bommau nɔ í ba gbugbã, ŋɔi í fũsi woodai Aɔ̃ Lafɛ̃ɛu awɔ nŋu do zamaai Izirɛliu fei.

² Si adɔ̃ miiusiai bomma ku jɛi Roboamu, Sisaki ilaalui Ezibitiu í naa igũ ku ce Zeruzalɛmu si na iyi í jɔ̀ à ce dulum bi Aɔ̃ Lafɛ̃ɛ.

³ Sarɛti dubu akã do cĩɔ minjii (1.200) í naaò wa do masa dubu kita (60.000). Nɔ zamaa nkpɔ nkpɔi í tooɛ wa hai ilɛi Ezibiti. Inɛ ŋa iyi à tooɛ wa ŋau, inɛi Libii ŋai do inɛi Suki ŋa do inɛi Etiopi ŋa.

⁴ Ŋɔi í gba ilu ku nɛ gbugbãi Zudaa ŋau hee í toò wa Zeruzalɛmu.

⁵ Ŋɔi walii Semaya í bɔ bi Roboamu do bi inɛ ngboi Zudaa ŋa iyi à sa à bɔ Zeruzalɛmu waati iyi Sisaki wa naau. Ŋɔi í sɔ̃ ŋa í ni, Aɔ̃ Lafɛ̃ɛ í ni, ì kɔ̀sim ŋa. Amu mɔ ǹ kɔ̀si ŋɛ. Nɔ ǹ so ŋɛ ǹ daa Sisaki si awɔ.

⁶ Ŋɔi ilaaluu do inɛ ngboi Izirɛli ŋau à kaye ara nŋa nɔ à fɔ à ni, Aɔ̃ Lafɛ̃ɛ í nɛ ntɔ.

⁷ Iyi Aɔ̃ Lafɛ̃ɛ í yɛ iyi à kaye ara nŋa, ŋɔi í sɔ̃ Semaya í ni, si bɛi à kaye ara nŋa, n kaa n kpa ŋa má. An faaba ŋa kaa kpɛ. Nɔ n kaa n jɔ̀ Sisaki ku ce asɔɔi ilui Zeruzalɛmuu má na idɔɔkɔ̃m.

⁸ Amma de aa jɛ aruɛ ŋa ku ba a mà iyi í sĩa a ceem icɛ do iyi a koo a maa cea bommai ilɛ mmu ŋa icɛ.

⁹ Ŋɔi Sisaki í koo si ilui Zeruzalɛmu nɔ í ko amanii kpasɛ̃i Aɔ̃ Lafɛ̃ɛ ŋau do ti ilei ilaaluu fei. Í so tɛlii wura ŋa iyi Salomɔɔ í ceu.

¹⁰ Ŋɔi Roboamu í jɔ̀ à ce tɛlii isɔ nkpa à sãsi, nɔ í jɔ̀a inɛ ngboi sooge ŋa iyi à ya maa degbe anu koofaɛ à maa cɔɔ.

¹¹ Waati iyi ilaaluu í fita wa bɔ kpasɛ̃i Aɔ̃ Lafɛ̃ɛ fei, woo degbe anu koofa ŋau à ya naa a so tɛli ŋaui, nɔ à nyiò wa ilaawa nŋa bɛ má.

¹² Si bɛi Roboamu í kaye araɛ, ŋɔi Aɔ̃ Lafɛ̃ɛ í jɔ̀ idɔɔkɔ̃ɛ í sũ, nɔ kù ce nfei Roboamu má do iluu do ilɛu fei mam mam. Nɔ mɔm mii jiida ŋa í gbe má si ilɛi Zudaa.

Kɔɔi bomma ku mui Roboamu

¹³ Roboamu í na í ba gbugbã si bomma iyi í jɛ Zeruzalɛmuu. Adɔ̃ ciiji do akãi í nɛ waati iyi í jɛ bommau. Iyeɛi à ya kpe Naama inɛi Amɔɔ. Nɔ í ce si bommau adɔ̃ mɛɛwa do mɛɛje Zeruzalɛmu ilu iyi Aɔ̃ Lafɛ̃ɛ í cica si inɔi ilui dimii Izirɛli ŋau fei ku jɛ bii á ya maa wau.

¹⁴ Roboamu í ce mii laalɔ si na iyi í jɔ̀ kù dasi idɔ nŋu ku dɛdɛ Aɔ̃ Lafɛ̃ɛ.

¹⁵ Faajii icɛi Roboamu ŋau hai sinte nŋa hee ku bɔ kɔɔɛ à kɔɔ si tia ŋa iyi walii Semaya í kɔu do ti Ido waliiu. Nɔ Roboamu do Zeroboamu à ya maa ce igũi waati kãma fei.

¹⁶ Roboamu í ku nɔ à suu bi balaɛ ŋa si ilui Davidi. Ŋɔi amaɛ Abiya í jɛ bomma si agbɛɛ.