Bomma 2, 11 - Bibeli do fee

¹ Waati iyi Roboamu í to Zeruzalɛmu ŋɔi í tɔtɔɔ inɛi Zudaa ŋa fei do inɛi Bɛnzamɛɛ woo ja igũ aŋa dubu cĩɔ do cinɛ (180.000) ku ba a bɔ igũ bi inɛi Izirɛli ŋa nɔ a baaò ŋa wa si bommai nŋu.

² Amma Aɔ̃ Lafɛ̃ɛ í sɔ̃ walii Semaya í ni,

³ koo sɔ̃ Roboamu amai Salomɔɔ ilaalui Zudaau do inɛi Izirɛli ŋa iyi à wa ilɛi Zudaa do Bɛnzamɛɛu fei

⁴ ku ni amu Aɔ̃ Lafɛ̃ɛ ǹ ni, i maà bɔ igũ bi nyaanze nŋɛ ŋau ŋa. Iŋɛ fei i nyi ide nŋɛ ŋa, domi hai bi tom nii fei ndɛɛ wa naa. Ŋɔi à jirima idei Aɔ̃ Lafɛ̃ɛu nɔ à nyi ide nŋa ŋa, a kù koo si Zeroboamu má.

Roboamu í kɔ̃a ilu nkpɔ si gbugbã

⁵ Roboamu í wa Zeruzalɛmu bɛ. Nɔ í ma ilu nkpɔi Zudaa í kɔ̃ɔ nŋa si gbugbã.

⁶ Í ma Betelehɛmu do Etamu do Tekoa,

⁷ do Bɛti-Suu do Soko do Adulamu

⁸ do Gati do Maresa do Zifu,

⁹ do Adoraimu do Lakisi do Azeka,

¹⁰ do Sorea do Ayalɔ̃ɔ do Eborɔ̃ɔ. Ilu ŋau bɛi à jɛ ilu ku nɛ gbugbãi ilɛi Zudaa do ilɛi Bɛnzamɛɛu.

¹¹ Í teese ile ku nɛ gbugbã nŋa ŋau nɔ í jilɛ inɛ ngbo ŋa bɛ. Í jɔ̀ à ma ile bi ku jilɛ amaajɛ ŋa do ikpoi olivi do atɛ̃ vɛ̃ɛ.

¹² Si ilu akãi ilu ŋau fei í jilɛ tɛli ŋa bɛ do kaka ŋa nɔ í jɔ̀ à ba gbugbã ntɔ ntɔ. Ŋɔi ilɛi Zudaa do ti Bɛnzamɛɛ í jɛ titɛɛ.

Woo wee ŋa do dimii Levii ŋa à too Roboamu

¹³ Ŋɔi woo wee ŋau do inɛi Levii ŋau iyi à wa ilɛi Izirɛliu fei à jɔ̀ ide nŋa ŋa à bɔ bi Roboamu.

¹⁴ Inɛi Levii ŋau à jɔ̀ ilɛ nŋa do ilu nŋa ŋa nɔ à naa Zeruzalɛmu si ilɛi Zudaa si na iyi í jɔ̀ Zeroboamu do amaɛ ŋa à waa ganji ŋa icɛi kuweeu ku ce na Aɔ̃ Lafɛ̃ɛ.

¹⁵ Nɔ Zeroboamu í so woo wee mmu ŋa si iwɛ̃ ŋa iyi í ce à yɛ bɛi iwo kombo ŋa do iyi í ce à yɛ bɛi ama kɛtɛ ŋa.

¹⁶ Dimii Izirɛli ŋa iyi à wa do ikpa awɔ njɛi kpãai inunu, aŋa iyi lasabui Aɔ̃ Lafɛ̃ɛ ku dɛ í wa nŋa si idɔu fei, à ya too inɛi Levii ŋau wa a naa Zeruzalɛmu ku ba a cea Aɔ̃ Lafɛ̃ɛi bala nŋa ŋau kuwee.

¹⁷ Bɛɛbɛi aŋa mɔ à na bommai Zudaau gbugbã nɔ à jɔ̀ Roboamu amai Salomɔɔu í ce icu jiida zakai adɔ̃ mɛɛta. Ntɔ ntɔ, zakai adɔ̃ mɛɛta ŋau bɛ fei à waa tooi si kucei Davidi do Salomɔɔ.

Nyaanzei Roboamu

¹⁸ Roboamu í so Mahalati ama inaaboi Yerimɔti amai Davidiu í ce abo. Iyeɛi Abihaili amai Eliabu amai Izaiu.

¹⁹ Abou í bía ama inɛmɔkɔ ŋa. Aŋai Yeusu do Semaria do Zahamu.

²⁰ Si anyii abo iyi bɛ, nɔ í so Maaka ama inaaboi Abusalɔmu. Nɔ í bíaa Abiya do Atai do Ziza do Selomitu.

²¹ Roboamu í bi Maaka ama inaaboi Abusalɔmuu í re aboɛ ŋa do abo mmuɛ ŋa iyi í nɛu fei. Abo mɛɛwa do mɛɛjɔi í nɛ do abo mmuɛ ŋa má aŋa kita. Nɔ í bí ama inɛmɔkɔ kɔnfia do mɛɛjɔ do ama inaabo kita.

²² Roboamu í na Abiya igbã ku jɛ nɔ í soo inɛ ngbo si igbã do ifɔɛ ŋau si na iyi í jɔ̀ wa bi ku soo ilaalu.

²³ Nɔ í ce bisi ntɔ ntɔ í kpɛ̃ amaɛ ŋa fei si ilɛi Zudaa do ti Bɛnzamɛɛ ŋau fei do si ilu ku nɛ gbugbã ŋau fei. Nŋui í ya maa na ŋa mii ku jɛ ŋa nkpɔ nkpɔ. Nɔ í dɛdɛ nŋa abo ŋa bututu.