Bomma 2, 10 - Bibeli do fee

Kutɔtɔɔi Sikɛmu

¹ Ŋɔi Roboamu í bɔ Sikɛmu, domi bɛi inɛi Izirɛli ŋau fei à bɔ ku biiɛ bomma.

² Zeroboamu amai Nebati í tako í saa Salomɔɔ wo í koo í wa ilɛi Ezibiti. Waati iyi í gbɔ baaui kutɔtɔɔi Sikɛmuu, í dasi idɔ nŋu ku gbe ilɛi Ezibiti bɛ.

³ Amma à bɛ inɛ ŋa a koo a kpoo wa. Ŋɔi Zeroboamu í baa, nɔ nŋu do inɛi Izirɛli ŋau fei à bɔ bi Roboamu à sɔ̃ɔ à ni,

⁴ baaɛ í ce nwai bɛi aru ŋa. Amma nsɛi, bii awɔ ì kaye nwa asou bɛ iyi í wo bɛi zuugu si kɔngɔ nwa ŋa à tã sɔɔlu ka ceɛ icɛ.

⁵ Ŋɔi í sɔ̃ ŋa í ni, i koo i bɔ ŋa nɔ i nyi wa bi tom si afei ajɔ mɛɛta ŋa. Ŋɔi zamaau í nɛ.

⁶ Ŋɔi ilaalu Roboamu í bee ikɔ bi mɔkɔ ngbo ŋa iyi à tako à wa bi baaɛ Salomɔɔ wo í ni, bɛirei í jɔ n jɛa zamaau ŋa.

⁷ Ŋɔi à sɔ̃ɔ à ni, bii ì jɛ inɛ jiida si wajui zamaau nɔ i ya gba ŋa do inɔ akã nɔ i jɛ nŋa ide didɔ̃ aa jɛ woo ce icɛɛ ŋai hee do ajɔ fei.

⁸ Amma Roboamu í jɔ̀ ikɔi mɔkɔ ngbo ŋau nɔ í koo í bee awaasũ saaɛ ŋa iyi à wa bi tɛɛ

⁹ í ni, inɛ ŋau ihɛ̃ à naa à tɔɔm n kayea aŋa aso iyi baam í kã nŋau. Bɛirei iŋɛ mɔ ì bi n jɛ ŋa.

¹⁰ Ŋɔi awaasũ saaɛ ŋau à sɔ̃ɔ à ni, zamaau í naa í sɔ̃ɛ í ni baaɛ í kãa aŋa aso kuwo nɔ á sĩa awɔ i kayea aŋa. Sɔ̃ ŋa i ni, amu Roboamu amaawɔ kɛsɛɛdɛm í la í re gbankilii baam.

¹¹ Baam í kã nŋɛ aso kuwo, amma nsɛi amu an kɔ̃ɔ nŋɛ si ku re bɛɛbɛ má. Baam í tɛ nŋɛ kpɔtɔɔ, amu kpɔtɔɔi isɔi an tɛ nŋɛ.

¹² Ŋɔi Zeroboamu do zamaau fei à nyi wa si ajɔ mɛɛtasia bɛi ilaaluu í fɔ.

¹³ Nɔ ilaaluu í jɛ nŋa do kugaabu. Í jɔ̀ ikɔi mɔkɔ ngbo ŋau,

¹⁴ nɔ í sɔ̃ ŋa bɛi saaɛ ŋa à ni ku fɔu. Í sɔ̃ ŋa í ni, baam í kãa nŋɛ aso kuwo, amma amu an kɔ̃ɔ nŋɛ si ku re bɛɛbɛ má. Baam í tɛ nŋɛ kpɔtɔɔi, amu kpɔtɔɔi isɔi an tɛ nŋɛ.

¹⁵ Do yaase bɛɛbɛi ilaaluu í kɔ̀si idei zamaau, domi Aɔ̃ Lafɛ̃ɛi í jilɔɔ bɛɛbɛ ku ba ide iyi í sɔ̃ Ahiya inɛi Siloo koo sɔ̃ Zeroboamu amai Nebatiu ku ce.

Bommau í kpɛ̃ nɔ Roboamu í jɛ ilaalui Zudaa

¹⁶ Iyi inɛi Izirɛli ŋa à yɛ iyi ilaaluu kù waa gbɔa aŋa, ŋɔi zamaau fei í koo í sɔ̃ ilaaluu í ni, baa yoomai à nɛ do Davidi. A kù nɛ ikpɛ̃ kãma do amai Izai. Iŋɛ inɛi Izirɛli ŋa, ka nɛ ide nwa. Nɔ bɛbɛi awɔ amai Davidi, wũa idei bommaɛ. Iyi à fɔ bɛɛbɛ à tã, ŋɔi inɛi Izirɛli ŋau fei à nɛ ide nŋa.

¹⁷ Nɔ inɛi Izirɛli ŋa iyi à wa ilɛi Zudaa aŋa akãi Roboamu í jɛ ilaalu nŋa.

¹⁸ Do nŋu fei Roboamu í bɛ Hadoramu iyi à so í jɛ inɛ ngboi icɛi tilasi ŋau bi inɛi Izirɛli ŋa iyi à wa ikpa awɔ njɛi kpãai inunuu. Amma inɛi Izirɛli ŋau fei à taa kuta à kpaa. Ŋɔi Roboamu í ce gbãa gbãa í gũ sarɛtiɛ í sa í nɛ Zeruzalɛmu.

¹⁹ Do yaase bɛɛbɛi inɛi Izirɛli ŋa iyi à wa do ikpa awɔ njɛi kpãai inunuu à dedeò ide ku kɔ̀ si gãmɛi inɛi kpasɛ̃i Davidi ŋa hee ku baa nnyi.