Bomma 2, 1 - Bibeli do fee

¹ Salomɔɔ amai Davidi í ba gbugbã si bommau. Aɔ̃ Lafɛ̃ɛɛ í wɛɛ do nŋu, nɔ í soo lele ntɔ ntɔ.

Salomɔɔ í tɔɔ Ilaaɔ̃ bisi

² Ŋɔi Salomɔɔ í tɔtɔɔ inɛi Izirɛli ŋau fei, hai inɛ ngboi sooge dubu ŋau do ti cĩɔ ŋau do woo kiiti ŋau do inɛ ngboi Izirɛli ŋau fei do inɛ ngboi kpasɛ̃ ŋau í ba ŋa ide ku fɔ.

³ Nɔ Salomɔɔ do zamaau fei à bɔ bi kuwee iyi í wa ilui Gabaɔ̃ɔu. Tengi bɛi ile bi kukoi Ilaaɔ̃u í wa iyi Moizi woo ce icɛi Aɔ̃ Lafɛ̃ɛu í ce si gbaau.

⁴ Tako wo Davidi í so kpakoi Ilaaɔ̃u hai ilui Kiriati-Yarimu í nyiò agbɛ bii í ceaa sɔɔluɛu domi í ceaa ilei acɔ gɔ ilui Zeruzalɛmu.

⁵ Do wajui ile bi kukoi Ilaaɔ̃ui à jilɛ bi kuweei isɔ nkpa iyi Besalɛli amai Uri tɔkui Uu í ceu. Salomɔɔ do zamaai Izirɛliu à waa dɛdɛ Aɔ̃ Lafɛ̃ɛi.

⁶ Nɔ si bi kuweei isɔ nkpa iyi í wa wajui ile bi kukou bɛi Salomɔɔ í cea Aɔ̃ Lafɛ̃ɛ kuwee iyi à ya jo si ina fei sãa sãa do mɛɛmu dubu (1.000).

⁷ Idũu ŋɔi Ilaaɔ̃ í naa si Salomɔɔ nɔ í sɔ̃ɔ í ni, tɔɔ mii iyi ì bi n muuɛ.

⁸ Ŋɔi Salomɔɔ í jɛa Ilaaɔ̃ í ni, awɔi ì cea baam Davidi jiida, nɔ ì jɔ̀ ǹ jɛ bomma si agbɛɛ.

⁹ Bɛbɛi Aɔ̃ Lafɛ̃ɛ, jɔ̀ kuwã iyi ì cea baam nɔu ku kɔ̃ si bɛi awɔi ì jɔ̀ ǹ jɛ bomma si zamaa iyi í kpɔ bɛi sãai ilɛ.

¹⁰ Na nŋu, muum bisi do laakai ku ba n mà bɛi an gbãò zamaau. Bii kù jɛ bɛɛbɛ, yooi á yɔkɔ ku gbã zamaaɛ si bɛi akpɔu í la.

¹¹ Ŋɔi Ilaaɔ̃ í sɔ̃ Salomɔɔ í ni, si bɛi iyi bɛi ì wa idɔɛ, nɔ i kù tɔɔ amani ŋa, walakɔ mii jiida ŋa, walakɔ amboe, walakɔ ikui mbɛɛɛ ŋa hee má jɛ hunde sisɔ, nɔ í gbe bisi do laakaii ì tɔɔ ku ba i gbãò inɛm ŋa iyi ǹ jɔ̀ ì jɛ ilaalu nŋa,

¹² bisi do laakaiu fei an naɛ. Si anyii iyi bɛ ŋa má, an muaɛ amani ŋa do mii jiida ŋa do amboe dimi iyi ilaalu ŋa iyi à takoɛ a kù ba, nɔ ilaalu gɔ kaa nɔ ku baa ajɔ kãma si anyiɛ.

¹³ Iyi Salomɔɔ í nɛ hai bi kuweei Gabaɔ̃ɔu do hai bi ile bi kukou, ŋɔi í baa Zeruzalɛmu. Nɔ í na í jɛ bomma si ilɛi Izirɛliu.

Gbugbãi Salomɔɔ do amaniɛ

¹⁴ Ŋɔi Salomɔɔ í tɔtɔɔ sarɛtii igũ ŋa do acĩ ŋa. À dede sarɛtii igũ dubu akã do cĩɔ mɛɛ (1.400) do acĩ dubu maateeji (12.000). Nɔ í jilɛ ŋa si ilu ŋa bii sarɛtii igũ ŋau à wa do Zeruzalɛmu bi nŋu takaɛ bɛ.

¹⁵ Ŋɔi í jɔ̀ isɔ fũfũ do wura í kpɔ Zeruzalɛmu bɛi kuta, nɔ jĩi ndii sɛɛdi mɔ í kpɔ bɛi jĩi ndii sikomɔɔ iyi í ya fita si lɔɔma.

¹⁶ Woo nya sĩai Salomɔɔ ŋa à ya bɔ Ezibiti do Kevee à koo à raa acĩ ŋa wa

¹⁷ do sarɛtii igũ ŋa. Sarɛti akã fei sikilii cĩɔ mɛɛfai (600) à ya sã, acĩ akã mɔ cĩɔ do ciitaa (150). Bɛɛbɛ mɔi à ya kooa ilaalui Hɛti ŋau fei do ilaalui Siri ŋa.

Salomɔɔ wa ce sɔɔlui kpasɛ̃i Ilaaɔ̃ ku ma

¹⁸ Ŋɔi Salomɔɔ í ni a ma kpasɛ̃ akã ti Aɔ̃ Lafɛ̃ɛ, akã mɔ ti nŋu ilaalu.