Bomma 1, 29 - Bibeli do fee

Amua ŋa iyi à ce ti kpasɛ̃i Ilaaɔ̃ ku ma

¹ Ŋɔi ilaalu Davidi í sɔ̃ zamaau fei í ni, amam Salomɔɔ nŋu iyi Ilaaɔ̃ í cicau ama awaasũi nɔ kù mà yaasei mii ŋa titã. Nɔ icɛ iyi í nɛ ku ceu í la, domi kpasɛ̃i bommau ihɛ̃ ku jɛ ti amanɛ gɔ, amma ti Aɔ̃ Lafɛ̃ɛi.

² Ǹ dasi kookaaim fei ǹ ceò sɔɔlui kpasɛ̃i Aɔ̃ Lafɛ̃ɛm si mii iyi í nɛ ku jɛ a coo do fei. Hai wura, do isɔ fũfũ, do isɔ nkpa, do isɔ, do jĩi ŋa iyi aa ceò mii ŋa iyi à nɛ bukaataɛ fei. Nɔ ǹ ce sɔɔlui kuta kusĩa ŋa do kuta mmu gɔ ŋa iyi aa ceò booda si kpasɛ̃u, do kuta ku daana gɔ ŋa, do kuta ku nɛ ila dimi ikã ikã baa yooma fei, do kuta jiida ŋa, do kuta ku yɔrɔ gɔ ŋa.

³ Si kubii kpasɛ̃i Aɔ̃ Lafɛ̃ɛm iyi ǹ nɛu, ǹ mua kpasɛ̃u wura do isɔ fũfũ iyi ǹ nɛ, baka ti ile kumáu iyi ǹ ce sɔɔluɛu baasi.

⁴ Ǹ muaa wurai ilɛi Ɔfii tɔnu cĩɔ (100) do isɔ fũfũ alala tɔnu cĩɔ minji do ciiji (240) iyi aa biiò idĩi ile ŋau.

⁵ Bɛbɛi, si inɔ nŋɛ, yooi í tã sɔɔlu ku na Aɔ̃ Lafɛ̃ɛ wura do isɔ fũfũ ŋa iyi woo ce icɛi awɔ ŋa aa ceò jĩnɛi wura ŋa do ti isɔ fũfũ ŋa iyi à nɛ bukaataɛ fei.

⁶ Ŋɔi inɛ ngboi kpasɛ̃ ŋau do ti dimii Izirɛli ŋau do ti wuaai sooge dubu ŋau do ti wuaai sooge cĩɔ ŋau do inɛ ngboi igbɛ ŋa iyi à waa cea ilaalu icɛ ŋau à ce amua ŋa do inɔ akã.

⁷ Si icɛi kpasɛ̃i Ilaaɔ̃u à ce amuai wura tɔnu cĩɔ do kitaò fɛɛwa (170), do wura kpɛkɛlɛ dubu mɛɛwa (10.000), do isɔ fũfũ tɔnu cĩɔ mɛɛta do ku lesi (300), do isɔ nkpa zakai tɔnu cĩɔ mɛɛfa (600) do isɔ tɔnu dubu mɛɛta do ku lesi (3.000).

⁸ Inɛ ŋa iyi à nɛ kuta jiida ŋau à so à daa Yehiɛli tɔkui Gɛɛsɔ̃ɔu si awɔ ku jɛ ti amanii kpasɛ̃i Aɔ̃ Lafɛ̃ɛu.

⁹ Ŋɔi zamaau í nɛ inɔ didɔ̃ si amua do inɔ akã nŋa iyi à ceu, domi idɔ nŋai í bi a ceaò Aɔ̃ Lafɛ̃ɛ amuau, nɔ inɔi ilaalu Davidi mɔ í dɔ̃ ntɔ ntɔ.

Kutɔɔi Davidi

¹⁰ Ŋɔi Davidi wa saabu Aɔ̃ Lafɛ̃ɛ si wajui zamaau fei. Davidi wa ni, saabui í jɛ tɛɛ Aɔ̃ Lafɛ̃ɛi Izirɛli, awɔ iyi ì jɛ baa nwa hai tako hee do ajɔ fei.

¹¹ Aɔ̃ Lafɛ̃ɛ, awɔi ì la, ì nɛ gbugbã, ì nɛ bɛɛrɛ, ì nɛ amboe nɔ hai bi tɛɛi inya kumá wa naa, domi mii iyi í wa lele do ilɛ fei titɛɛi. Awɔi ì jɛ ilaalu, nɔ awɔi ì wa antaii mii fei.

¹² Hai bi tɛɛi amani do amboe wa naa. Awɔi ì kãmia mii fei. Si awɔɛi gbugbã fei í wa. Awɔɛi í ya jɔ̀ inɛ ku la nɔ ku nɛ gbugbã.

¹³ Aɔ̃ Lafɛ̃ɛ, à waa saabuɛ, nɔ à waa cĩɛ.

¹⁴ Amu do zamaam a kù to nkãma hee ka ceɛ amua ŋau ihɛ̃ do inɔ akã. Mii fei wa naai hai bi tɛɛ, nɔ hai si awɔɛi à ya ka ba mii iyi à ya ka muɛ.

¹⁵ Si wajuɛ à yɛi bɛi inɛ njoo ŋa do bɛi inɛ ŋa iyi à nɛ à waa lɔ bɛi bala nwa ŋau fei. Kuwɛɛ nwa si ilɛ ihɛ̃ í yɛi bɛ jĩjĩ nɔ kù nɛ kpãai nkãma ku cɔ.

¹⁶ Aɔ̃ Lafɛ̃ɛ nwa, amani ŋa iyi à ce sɔɔluɛ ka maò kpasɛ̃ɛu ihɛ̃ fei, hai bi tɛɛi wa naa. Nɔ awɔi ì nɛ mii fei.

¹⁷ Aɔ̃ Lafɛ̃ɛm, ǹ mà iyi awɔ ì ya yɛ idɔi inɛ, nɔ í ya bi inɛ iyi í jɛ dee dee. Ǹ fũ inɔm nii n ceɛò amua ŋau ihɛ̃ do inɔ akã. Nɔ nsɛi ǹ yɛ zamaau ihɛ̃ mɔ í wa ihɛ̃ do inɔ didɔ̃ wa ceɛ amua ŋa do idɔɔbiɛ.

¹⁸ Aɔ̃ Lafɛ̃ɛi Aburahamu do Izaaki do Izirɛli bala nwa ŋa, jɔ̀ dimii lasabuu bɛ ku maa wa si idɔi zamaaɛu hee do ajɔ fei, nɔ i jɔ̀ idɔ nŋa ku nɛ gbugbã na iriɛ.

¹⁹ Mua amam Salomɔɔ lasabu jiida iyi á yɔkɔ ku jirimaò ikɔ ŋa iyi ì jilɛ, do woodaɛ ŋa, ku ba ku ceò mii ŋau bɛ fei icɛ nɔ ku ma kpasɛ̃ iyi ǹ ce sɔɔluɛu.

²⁰ Ŋɔi Davidi í sɔ̃ zamaau fei í ni, i saabu Aɔ̃ Lafɛ̃ɛ nŋɛ ŋa. Nɔ inɛ ŋau fei à saabu Aɔ̃ Lafɛ̃ɛi bala nŋa ŋau. À gulɛ à sɛɛbata si wajui Aɔ̃ Lafɛ̃ɛ do si wajui ilaaluu.

À so Salomɔɔ í jɛ ilaalu

²¹ Iju kumáɛ, ŋɔi à cea Aɔ̃ Lafɛ̃ɛ kuweei anu akã ŋa do iyi à ya jo si ina fei sãa sãa. À kpa kɛtɛ kombo dubu (1.000) do angudã kombo dubu (1.000) do ama angudã dubu (1.000), nɔ à ce kuweei atɛ̃ vɛ̃ɛ ŋa. Kuweei anu akã ŋau í to inɛi Izirɛli ŋau fei.

²² Ajɔ nŋu bɛ, à jɛ nɔ à mɔ si wajui Aɔ̃ Lafɛ̃ɛ, à ce ile ku fitai Salomɔɔ si bomma ku jɛɛu isɛ gbeejisia. À tontooaa ikpo si iri si wajui Aɔ̃ Lafɛ̃ɛ ku jɛ inɛ ngbo. Nɔ à tontooa Sadɔku mɔ ikpo si iri ku jɛ woo wee nla.

²³ Ŋɔi Salomɔɔ í buba si kitãi bommai Aɔ̃ Lafɛ̃ɛ í jɛ ilaalu si agbɛi Davidi baaɛ. Mii fei wa nɛa dee dee, nɔ inɛi Izirɛli ŋau fei à waa jirimaɛ.

²⁴ Inɛ ngbo ŋau fei, do sooge ŋau, hee do amai Davidi ŋa iyi à gbeu fei à waa sũa ilaalu Salomɔɔ iri ilɛ.

²⁵ Ŋɔi Aɔ̃ Lafɛ̃ɛ í so Salomɔɔ hee lele si wajui inɛi Izirɛli ŋau fei, nɔ í jɔ̀ bommaɛu í nɛ bɛɛrɛ í re ilaalu ŋa iyi à cuaa wa si ilɛi Izirɛliu fei.

Ikui Davidi

²⁶ Davidi amai Izai í jɛ bommaui si ilɛi Izirɛliu fei.

²⁷ Í mu bommai Izirɛlii adɔ̃ ciiji. Í ce titã adɔ̃ mɛɛje hai ilui Eborɔ̃ɔ, nɔ í ce adɔ̃ kuntaa do mɛɛta ilui Zeruzalɛmu.

²⁸ Í gboi ntɔ ntɔ í bɛi í ku. Í jɛ agboɛi si inɔ didɔ̃ nla nla. Í ba amani nɔ í nɛ bɛɛrɛ. Nɔ Salomɔɔ amaɛu í jɛ bommau si agbɛɛ.

²⁹ Icɛ ŋa iyi ilaalu Davidi í ce, hai sinteɛ do iri ku kpaɛ fei, à kɔɔ si tiai Samuɛli woo yɛu, do si tiai Natãa waliiu, do si tiai Gadi woo yɛu.

³⁰ À kɔ fei ndɛɛi, hai bomma ku jɛɛ do igũ ŋa iyi í jɛ fei, do mii ŋa iyi í ce si waatiɛ si ilɛi Izirɛli do si bommai ilɛ mmu ŋau fei.