Bomma 1, 28 - Bibeli do fee

Davidi í sɔ̃ inɛ ŋa iyi Salomɔɔi á sãsi agbɛi nŋu

¹ Ŋɔi Davidi í tɔtɔɔ inɛ ngboi Izirɛli ŋau fei Zeruzalɛmu, hai inɛ ngboi dimi ikã ikã ŋau do ti inɛ ŋa iyi à kpɛ̃ si icɛi ilaalu ŋau do inɛ ngboi wuaai sooge dubu ŋau do ti cĩɔ ŋau, do inɛ ŋa iyi à jɛ woo ce wũaai amanii ilaaluu, do ti mɛɛmu gaaɛ ŋau fei do ti amaɛ ŋau fei do akaweɛ ŋa do woo ja igũ ŋau do inɛmɔkɔ kaasãanɛ ŋau.

² Ŋɔi í dede í leekĩ nɔ í ni, i sotĩ i gbɔ idem iŋɛ nyaanzem do zamaam ŋa. Ǹ wa n lasabui wo n ma ile bi ku jilɛ kpakoi akabuui Aɔ̃ Lafɛ̃ɛu do bi ku lesi isɛɛ, nɔ ǹ wasi sɔɔluɛ ku ce.

³ Amma Ilaaɔ̃ í sɔ̃m í ni kù jɛ amui an maa nŋu kpasɛ̃ bii inɛ ŋa aa ya naa a tɔɔ nŋu, domi amu woo ce igũi, nɔ ǹ dikã njɛ í kpɔ.

⁴ Aɔ̃ Lafɛ̃ɛi inɛi Izirɛli ŋaui í cicam hai si inɔi inɛi kpasɛ̃i baam ŋau fei, ku ba n jɛ ilaalui inɛi Izirɛli ŋa hee do ajɔ fei. Dimii Zudaai í cica ku jɛ inɛ ngbo. Nɔ í cica kpasɛ̃i baam hai si dimii Zudaau. Nɔ si amai baam ŋau, amui í bi n jɛ bomma si Izirɛli fei.

⁵ Aɔ̃ Lafɛ̃ɛ í muum amu ŋa nkpɔ nkpɔ. Nɔ si inɔ nŋa, Salomɔɔi í cica ku buba si kitãi bommai nŋu Aɔ̃ Lafɛ̃ɛu si ilɛi Izirɛli.

⁶ Aɔ̃ Lafɛ̃ɛ í sɔ̃m í ni Salomɔɔ amam nɔui á maa nŋu ileu do bantumaɛ ŋau, domi nŋu í cicaɛi ku jɛ amai nŋu, nɔ nŋu ku jɛ baaɛ.

⁷ Á jɔ̀ bommaɛu ku ba gbugbãi hee do ajɔ fei, bii í jɛ wa ceò woodaɛ ŋau do ideɛ ŋau icɛ, bɛi wa muu nnyiu ihɛ̃.

⁸ Bɛbɛi, si wajui iŋɛ inɛi Izirɛli ŋau fei, iŋɛ zamaai Ilaaɔ̃ ŋau, do si wajui Aɔ̃ Lafɛ̃ɛ nwa iyi wa desi wa itĩ, i jirima woodai Aɔ̃ Lafɛ̃ɛ ŋau fei ŋa, ku ba i nɛ ilɛ jiidau ihɛ̃ ŋa, nɔ i jɔ̀a ama nŋɛ ŋau tubuɛ hee do ajɔ fei ŋa.

⁹ Nɔ awɔ mɔ amam Salomɔɔ, jɔ̀ i mà Aɔ̃ Lafɛ̃ɛi baaɛ. Jɔ̀ i tɔɔɛ do inɔ akã, do lasabu jiida, domi Aɔ̃ Lafɛ̃ɛ wa yɛ idɔi amanɛ ŋa nɔ í ya wusɛ idɔɛ ku mà lasabuɛ ŋa fei. Bii ì waa dɛdɛɛ, á jɔ̀ i yɔɔ. Amma bii ì kɔ̀siɛ á fũsiɛ awɔi hee do ajɔ fei.

¹⁰ Nsɛi, jɔ̀ i mà iyi Aɔ̃ Lafɛ̃ɛ í cicaɛi ku ba i maa nŋu kpasɛ̃ iyi á jɛ ile kumáu. Dasi gbugbã nɔ i ce icɛu.

Davidi í sɔ̃ Salomɔɔ yaasei kpasɛ̃u ku ma

¹¹ Ŋɔi Davidi í nyisi Salomɔɔ amaɛu yaase bɛi á maò anu koofau do idĩ ŋau, do ilaawai amani ŋau do ilaawai lele ŋau do ti ilɛ ŋau do ti bi kuwai kpakou.

¹² Ŋɔi í nyisiɛ yaase bɛi á ma mii ŋa iyi nŋu wa lasabu ku mau fei, hai bantumai kpasɛ̃i Aɔ̃ Lafɛ̃ɛu do ilaawa ŋa iyi a kaakoɛò fei ku jɛ bi ku jilɛ amanii kpasɛ̃u do mii ŋa iyi à nya ikã à jɛ ti Ilaaɔ̃u.

¹³ Nɔ í naa wuaa ikã ikãi woo wee ŋau do ti inɛi Levii ŋau, do icɛ ŋa iyi à nɛ ku ce si kpasɛ̃i Aɔ̃ Lafɛ̃ɛu do si mii ŋa iyi à ya ceò icɛu.

¹⁴ Nɔ í sɔ̃ɔ bɛi á ce jĩnɛi wura ŋau do kuwoi wura bɛi á to a ceò jĩnɛi icɛ akã fei, do ti jĩnɛi isɔ fũfũ ŋau, do isɔ fũfũ iyi á to a ceò jĩnɛi icɛ akã fei.

¹⁵ Bɛɛbɛ mɔi í sɔ̃ɔ kuwoi wura iyi á ceò bi ku lesi fitilai wura ŋau do ti fitila ŋau do kuwoi isɔ fũfũ iyi á ceò bi ku lesi fitilai isɔ fũfũ ŋau do ti fitila ŋau, si bɛi á ceò aŋa fei icɛ.

¹⁶ Nɔ í sɔ̃ɔ kuwoi wura iyi á to a ceò taabui bi ku lesi pɛ̃ɛ iyi à ya jilɛa Ilaaɔ̃u. Í sɔ̃ɔ kuwoi wura ti taabui wura akã fei do kuwoi isɔ fũfũ ti taabui isɔ fũfũ akã fei.

¹⁷ Nɔ í sɔ̃ɔ bɛi á ce kaato cate cate ŋau do jɛɛ nantaa ŋau do ama fata ŋa iyi aa ce do wura alalau. Í sisiaa bɛi á ce kɔɔfui wura ŋau do bɛi akã fei í nɛ ku to, do bɛi á ce ti isɔ fũfũ ŋau do kuwoi akã nŋa fei,

¹⁸ do bɛi á ma bi kuweei wura ti tuaeu do kuwoɛ. Nɔ í naa yaase bɛi á ce sarɛtii wurau mɔ má do ti amalekai wura iyi à ya kpe serubɛ̃ɛ ŋa iyi aa fũ ikpa nŋa a biiò kpakoi akabuui Aɔ̃ Lafɛ̃ɛu.

¹⁹ Ŋɔi Davidi í ni, mii ŋau bɛ fei í wai si kukɔ iyi ǹ ba wa hai bi Aɔ̃ Lafɛ̃ɛ. Kukɔui í jɔ̀ ǹ mà yaase bɛi aa ce mii ŋau fei.

²⁰ Ŋɔi Davidi í sɔ̃ Salomɔɔ amaɛu í ni, jɔ̀ i nɛ gbugbã nɔ i dasi wɔɔkɔ i ce icɛɛ. Maà ce njo nɔ i maà jɔ̀ idɔɛ ku dede, domi Aɔ̃ Lafɛ̃ɛm á wɛɛ do awɔ. Kaa kɔ̀siɛ pai, nɔ kaa fũsiɛ awɔ hee icɛi kpasɛ̃ɛu koo tãò.

²¹ Wuai woo wee ŋau do inɛi Levii ŋa iyi à waa ce icɛ si kpasɛ̃i Ilaaɔ̃u, bi tɛɛi aa wa. Si icɛ ŋau fei, inɛ ŋa iyi à wa bi tɛɛ nɔ à nɛ kumà jiida jiida si icɛi awɔ dimi baa yooma fei, aa na ara nŋa. Nɔ inɛ ngbo ŋau do zamaau fei aa tã sɔɔlu a ceò ideɛ ŋa icɛ.