Bomma 1, 27 - Bibeli do fee

Igbɛi soogei bommau

¹ Irii inɛi Izirɛli ŋa iyi à waa ce icɛ bi ilaalu wee. Inɛ ngboi kpasɛ̃ ŋa, do inɛ ngboi sooge dubu ŋa, do ti sooge cĩɔ ŋa, do akawe ŋa. Icɛ nŋa í wai si gãmɛi sooge ŋa iyi à kpɛ̃ wuaa do wuaa iyi aa ya ce icɛ a maa jɔ̀aa njɛ cukpa do cukpa si adɔ̃u fei. Nɔ kukpɛ̃ ikɔ̃ akã fei, amanɛ dubu kɔnfia do mɛɛi (24.000).

² Si ikɔ̃ sinte bɛi à kpɛ̃ ŋau, Yasobeamu amai Zabudiɛlii í jɛ inɛ ngboi inɛ dubu kɔnfia do mɛɛ ŋau (24.000).

³ Yasobeamuu tɔkui Perɛsii, nɔ nŋui wa jɛ irii inɛ ngboi sooge ŋa iyi à jɛ ti cukpa sinteu fei.

⁴ Si cukpa minjisia, Dodai inɛi Ahohi í jɛ inɛ ngbo, nɔ Mikilɔtii í jɛ minjisiaɛ si amanɛ dubu kɔnfia do mɛɛ ŋau (24.000).

⁵ Inɛ ngboi ikɔ̃ mɛɛtasia si cukpa mɛɛtasiau, Benaya amai Yoyada woo wee nlaui í jɛ inɛ ngboi amanɛ dubu kɔnfia do mɛɛ ŋau (24.000).

⁶ Benayau í wa si wuaai ilu wɔɔkɔ kuntaa ŋau nɔ wa jɛ nŋa inɛ ngbo. Waati bɛɛbɛ, amaɛ Amizabadui í baa wa jɛ inɛ ngboi wuaai soogeɛ ŋau.

⁷ Mɛɛsia, Azaɛli ifɔi Zoabui, si anyiɛ nɔ Zebadia amaɛ í sãsi agbɛɛ wa jɛ inɛ ngbo. Nɔ í nɛ amanɛ dubu kɔnfia do mɛɛ (24.000).

⁸ Miiusiau, Samehuti inɛi Yisiraii í jɛ inɛ ngbo. Nɔ í nɛ amanɛ dubu kɔnfia do mɛɛ (24.000).

⁹ Si mɛɛfasiau, Ira amai Ikɛsi inɛi Tekoaui í jɛ inɛ ngbo. Nɔ í nɛ amanɛ dubu kɔnfia do mɛɛ (24.000).

¹⁰ Si mɛɛjesiau, Helɛti inɛi Peloniui í jɛ inɛ ngbo si dimii Efaraimu ŋa. Nɔ í nɛ amanɛ dubu kɔnfia do mɛɛ (24.000).

¹¹ Si mɛɛjɔsiau, Sibekai inɛi Husati si inɛi Zera ŋaui í jɛ inɛ ngbo. Nɔ í nɛ amanɛ dubu kɔnfia do mɛɛ (24.000).

¹² Si mɛɛsãsiau, Abiezɛɛ inɛi Anatɔti si dimii Bɛnzamɛɛ ŋaui í jɛ inɛ ngbo. Nɔ í nɛ amanɛ dubu kɔnfia do mɛɛ (24.000).

¹³ Si mɛɛwasiau, Maharai inɛi Netofa si inɛi Zera ŋaui í jɛ inɛ ngbo. Nɔ í nɛ amanɛ dubu kɔnfia do mɛɛ (24.000).

¹⁴ Si maatakãsia, Benaya inɛi Piratɔ̃ɔ si dimii Efaraimu ŋaui í jɛ inɛ ngbo. Nɔ í nɛ amanɛ dubu kɔnfia do mɛɛ (24.000).

¹⁵ Si maateejisia, Helidai inɛi Netofa si tɔkui Otiniɛlii í jɛ inɛ ngbo. Nɔ í nɛ amanɛ dubu kɔnfia do mɛɛ (24.000).

Inɛ ngboi dimi ŋa iyi à wa si ilɛu

¹⁶ Inɛ ngboi dimii inɛi Izirɛli ŋau wee. Si dimii Rubɛ̃ɛ ŋa, Eliezɛɛ amai Zikirii í jɛ inɛ ngbo. Si ti Simeɔ̃ ŋa, Sefatia amai Maakai í jɛ inɛ ngbo.

¹⁷ Si ti Levii ŋa, Hasabia amai Kemuɛlii í jɛ inɛ ngbo. Si ti nyaanzei Arɔ̃ɔ ŋa, Sadɔkui í jɛ inɛ ngbo.

¹⁸ Si dimii Zudaa ŋa, Elihu inɛ akãi igbãi Davidi ŋaui í jɛ inɛ ngbo. Si ti Isakaa ŋa, Ɔmuri amai Mikaɛlii í jɛ inɛ ngbo.

¹⁹ Si ti Zabulɔ̃ɔ ŋa, Isemaya amai Abudiasii í jɛ inɛ ngbo. Si ti Nɛfitalii ŋa, Yerimɔti amai Aziriɛlii í jɛ inɛ ngbo.

²⁰ Si ti Efaraimu ŋa, Ozee amai Azaziai í jɛ inɛ ngbo. Si dimi bubui Manasee ŋa, Zoɛli amai Pedayai í jɛ inɛ ngbo.

²¹ Si dimi bubui Manasee ŋa si ilɛi Galaadiu, Ido amai Zakarii í jɛ inɛ ngbo. Si dimii Bɛnzamɛɛ ŋa, Yaasiɛli amai Abinɛɛi í jɛ inɛ ngbo.

²² Si dimii Dãa ŋa, Azareɛli amai Yerohamui í jɛ inɛ ngbo. Inɛ ŋau bɛi à jɛ inɛ ngboi dimii Izirɛli ŋau.

²³ Davidi kù ce kukai inɛ ŋa iyi à nɛ adɔ̃ kɔnfia do inɛ ŋa iyi a kù to adɔ̃ kɔnfia ŋa, domi Aɔ̃ Lafɛ̃ɛ í ce kuwã nŋu ku kɔ̃ɔsi akpɔi inɛi Izirɛli ŋa bɛi leleaɔ̃ ŋa.

²⁴ Zoabu amai Seruyai í sinti ku ce kukau, amma kù kpa iriɛ, domi idɔɔkɔ̃i Ilaaɔ̃ í dede si inɛi Izirɛli ŋau na irii kukau. Na ŋɔi í jɔ̀ a kù kɔ jia nŋa si tiai icɛi ilaalu Davidi.

Inɛ ŋa iyi à jɛ woo ce wũaai amanii ilaalu

²⁵ Azumavɛti amai Adiɛlii à so í jɛ inɛ ngbo si wũaai amanii ilaalu ŋau. Zonatãa amai Oziasi mɔi í jɛ inɛ ngboi amaajɛ ŋa si ilɛu. Hai ilu ŋa hee ku koo si ilɛɛko ŋa do si ile kugboka ŋau.

²⁶ Eziri amai Kelubu mɔi í jɛ inɛ ngboi woo logoo ŋa si ilɛu.

²⁷ Simei inɛi Ramai í jɛ inɛ ngboi ikoi jĩi ndii rezɛ̃ɛ ŋau. Zabudi inɛi Sefamuu mɔi í jɛ inɛ ngboi bi ku jilɛ atɛ̃ vɛ̃ɛ ŋau.

²⁸ Baali-Hanaa inɛi Gedɛɛu mɔi í jɛ inɛ ngboi jĩi ndii olivi ŋau do ti sikomɔɔi lɔɔma ŋau. Yoasi mɔi í jɛ inɛ ngboi bi ku jilɛ ikpoi olivi ŋa.

²⁹ Sitarai inɛi Sarɔ̃ɔu mɔi í jɛ inɛ ngbo si gãmɛi kɛtɛ gaa ŋa iyi à ya maa bɔ ku jɛ ilɛi Sarɔ̃ɔ. Safati amai Adulai mɔi í jɛ inɛ ngbo si gãmɛi kɛtɛ gaa ŋa iyi à ya maa jɛ si lɔɔma ŋau.

³⁰ Obili inɛi Isimaɛliu mɔi í jɛ inɛ ngbo si gãmɛi kpookpo ŋau. Yedeya inɛi Meronɔtiu mɔi í jɛ inɛ ngbo si gãmɛi gbankɛlɛ abo ŋau.

³¹ Yazizu inɛi Agaau mɔi í jɛ inɛ ngbo si gãmɛi angudã ŋa do iwo ŋau. Inɛ ŋau bɛi à jɛ inɛ ngbo ŋa si wũaai amanii ilaalu Davidi.

Inɛ ŋa iyi à ya wa bi ilaalu

³² Zonatãa asii Davidii í jɛ woo mua inɛ ŋa ikɔ jiida. Inɛmɔkɔ gɔi iyi í nɛ laakai do kumà. Yeiɛli amai Hakimonii í jɛ woo kɔi amai ilaalu ŋau.

³³ Ahitofɛlii í jɛ woo kɔi ilaaluu. Husai inɛi Aakiui í jɛ kpaasii ilaaluu.

³⁴ Si anyii Ahitofɛli Yoyada amai Benaya do Abiataa ŋai à sãsi agbɛɛ. Zoabui í jɛ inɛ ngboi sooge ŋau.