Bomma 1, 26 - Bibeli do fee

Igbɛi woo degbe anu koofa ŋau

¹ Tuuba ikã ikã bɛi woo degbe anu koofa ŋau mɔ à kpɛ̃ wee. Si tuubai inɛi Kore ŋau, Meselemia amai Kore tɔkui Azafui à cica.

² Ama mɛɛjei Meselemia í nɛ. Iri nŋa ŋa wee. Zakari ama sinteu, minjisia Yediaɛli, mɛɛtasia Zebadia, mɛɛsiaɛ Yatiniɛli,

³ miiusiaɛ Elamu, mɛɛfasiaɛ Yohanaa, mɛɛjesiaɛ Elihoenai.

⁴ Ama mɛɛjɔi Obɛdi-Edɔmu mɔ í nɛ. Iri nŋa ŋa wee. Semaya ama sinte, minjisia Yozabadi, mɛɛtasia Yoa, mɛɛsia Sakaa, miiusia Netaneɛli,

⁵ mɛɛfasia Amiɛli, mɛɛjesia Isakaa, mɛɛjɔsia Peulitai. Ntɔ ntɔ Ilaaɔ̃ í weea Obɛdi-Edɔmu.

⁶ Semaya ama yemmaɛ í bí amu ŋa iyi à ba gbugbã si kpasɛ̃i baa nŋa, domi inɛmɔkɔ kaasãanɛ ŋai.

⁷ Amai Semaya ŋai Otini do Refaɛli do Obɛdi do Elizabadi do ifɔ kaasãanɛ nŋa ŋa Elihu do Semakia.

⁸ Inɛ ŋau bɛ fei nyaanzei Obɛdi-Edɔmu ŋai. Nɔ aŋaò ama nŋa ŋa, do nyaanze nŋa ŋa à nɛ himma do gbugbã si icɛu. Aŋa kita do minjii.

⁹ Amai Meselemia ŋa do nyaanzeɛ ŋa, kaasãanɛ ŋai, nɔ à wɛɛi aŋa mɛɛwa do mɛɛjɔ.

¹⁰ Si tɔkui Merari ŋa, Hosa í ba ama mɛɛ. Simurii baa nŋau í na inɛ ngbo ku jɛ baa do iyi nŋu sisi í jɛ yemma.

¹¹ Hilikiyai í jɛ minjisiaɛ. Tebalia, mɛɛtasia, Zakari mɛɛsia. Nyaanzei Hosau, hai amaɛ ŋa do ifɔɛ ŋa fei, aŋa maatɛtai.

¹² Inɛ ngbo ŋau do inɛi igbɛi woo degbe anu koofa ŋau à ya maa ce icɛi si kpasɛ̃i Aɔ̃ Lafɛ̃ɛu.

¹³ À ta kpasai si nyaanze ŋau a ba a mà anu koofa bii inɛ fei á degbe, hai awaasũ ŋa do mɔkɔ ngbo fei.

¹⁴ Ŋɔi kpasau í so Selemia si ti nunui daakɔ. Nɔ amaɛ Zakari iyi í nɛ bisi nɔ í jɛ woo mua inɛ ikɔ jiida, kpasa í soo si ti ikpa awɔ njɛi kpãai inunu.

¹⁵ Ikpa awɔ cangai kpãai inunu mɔ, kpasau í so Obɛdi-Edɔmu. Nɔ amaɛ ŋa mɔi à jɛ ti ile bi ku dasi aso ŋau.

¹⁶ Nɔ à so Supimu do Hosa si ti nunui alɛu do ikpa anu koofai Salekɛti iyi wa cɔ ikpa kpãau. Woo degbe ŋau à ya maa cɔ njɛi.

¹⁷ Do nunui daakɔ inɛi Levii mɛɛfai í wa bɛ. Do awɔ njɛi kpãai inunu inɛ mɛɛi í ya degbe si ajɔ akã fei. Do awɔ cangai kpãai inunu, inɛ mɛɛ si ajɔ akã. Nɔ à kpɛ̃a amanɛ mɛɛ ile bi ku jilɛ aso ŋau si inya minji.

¹⁸ Ti ile minjisia iyi ì wa ikpa nunui alɛu, inɛ mɛɛi í wa do kpãa, nɔ inɛ minji mɔ í wa inɔ ileu.

¹⁹ Yaase bɛi à kpɛ̃ woo degbe ŋau mbɛ si tɔkui Kore do ti Merari ŋa.

Icɛ gɔ ŋa iyi à dasi inɛi Levii ŋa

²⁰ Ahiya inɛ akãi dimii Levii ŋaui í jɛ woo mu amanii kpasɛ̃i Ilaaɔ̃ ŋau do si mii ŋa iyi à nya ikãu.

²¹ Si nyaanzei Ladãa ŋa, dimii Gɛɛsɔ̃ɔ ŋai à jɛ inɛ ngboi kpasɛ̃i Yehiɛli ŋa.

²² Amai Yehiɛli ŋa Zetamu do Zoɛli ifɔɛi à jɛ woo mu amanii kpasɛ̃i Ilaaɔ̃ ŋau.

²³ Si tɔkui Amuramu ŋa do ti Yisehaa ŋa do ti Eborɔ̃ɔ ŋa do ti Uziɛli ŋa,

²⁴ Sebuɛlii í jɛ inɛ ngboi woo mu amani ŋau. Sebuɛliu tɔkui Gɛɛsɔ̃ɔi, Gɛɛsɔ̃ɔ mɔ amai Moizi.

²⁵ Si nyaanzeɛ bɛi tɔkui Eliezɛɛ ifɔi Gɛɛsɔ̃ɔ í wa. Rehabia amai Eliezɛɛi, do Yesaya do Yoramu do Zikiri do Selomiti.

²⁶ Amani ŋa iyi ilaalu Davidi do inɛ ngboi kpasɛ̃ ŋa do inɛ ngboi wuaai sooge dubu ŋa do ti cĩɔ ŋa do ti sooge mmu gɔ ŋa à jilɛa Ilaaɔ̃ ikãu, Selomiti do inɛɛ ŋai à jɛ inɛ ngboi amani ŋau.

²⁷ Mii ŋa iyi à gba wa hai si igũ ŋaui à jilɛa Aɔ̃ Lafɛ̃ɛ a teeseò kpasɛ̃ɛ.

²⁸ Mii ŋa iyi Samuɛli woo yɛu do Saulu amai Kisiu do Abinɛɛ amai Nɛɛu do Zoabu amai Seruyau à jilɛa Aɔ̃ Lafɛ̃ɛu, Selomiti do inɛɛ ŋai à jɛ inɛ ngboɛ.

²⁹ Si tuubai inɛi Yisehaa ŋa, Kenania do amaɛ ŋai à jɛ woo wũa idei inɛ ŋa si ilɛ, waatɔ woo kɔ tia ŋa do woo kiiti ŋa.

³⁰ Si tuubai inɛi Eborɔ̃ɔ ŋa, Hasabia do nyaanzeɛ ŋa, aŋa iyi à jɛ kaasãanɛ ŋa, nɔ akpɔ nŋa í wɛɛ dubu do cĩɔ mɛɛjeui (1.700) à so a maa cɔ ilɛi Izirɛliu do nunui alɛi icei idoi Zuudɛ̃ɛ, si wũai icɛi Aɔ̃ Lafɛ̃ɛ do si icɛi ilaalu.

³¹ Si gãmɛi inɛi Eborɔ̃ɔ ŋa Yeriai wa jɛ inɛ ngbo nŋa. Si adɔ̃ ciijisiai bomma ku jɛi Davidi, à ce kudɛdɛ ŋa si tuubai bala nŋa ŋa. Nɔ à koo à ba wee inɛmɔkɔ kaasãanɛ ŋa à wa si inɔ nŋa si ilui Yazɛɛ si ilɛi Galaadi.

³² Inɛmɔkɔ kaasãanɛ ŋa iyi à jɛ inɛ ngboi kpasɛ̃ ŋau à dedei dubu minji do cĩɔ mɛɛje (2.700). Ŋɔi ilaalu Davidi í kpɛ̃ ŋa si inɔi dimii Rubɛ̃ɛ ŋa do ti Gadi ŋa do ti dimi bubui Manasee ŋa, a maa ce icɛ si wũa ŋa iyi í jɛ icɛi Ilaaɔ̃ do iyi í jɛ ti ilaaluu fei.