Bomma 1, 23 - Bibeli do fee

Davidi í jɔ̀ à ka inɛi Levii ŋau

¹ Davidi í gbo ntɔ ntɔ, nɔ í so amaɛ Salomɔɔ ilaalui Izirɛli.

² Ŋɔi í tɔtɔɔ inɛ ngboi Izirɛli ŋau fei do woo wee ŋau do inɛi Levii ŋau.

³ Nɔ à ka inɛi Levii ŋau, hai inɛ ŋa iyi à nɛ adɔ̃ kuntaa hee do ku lesi. À ka ŋai akã akã inɛ fei do iriɛ. Nɔ jia nŋa í dede dubu kuntaa do mɛɛjɔ (38.000).

⁴ Ŋɔi Davidi í ni si inɔ nŋa, amanɛ dubu kɔnfia do mɛɛi (24.000) á jɛ woo cɔ icɛi kpasɛ̃i Aɔ̃ Lafɛ̃ɛu, dubu mɛɛfa (6.000) mɔ ku jɛ inɛ ngbo do woo kiiti ŋa.

⁵ Dubu mɛɛ (4.000) ku jɛ woo degbe anu koofa, nɔ dubu mɛɛ má (4.000) a jɛ woo cĩ Aɔ̃ Lafɛ̃ɛ ŋa do jĩnɛ ŋa iyi í jɔ̀ a ce a ya saabuɛò.

⁶ Davidi í kpɛ̃ ŋai si bɛi amai Levii ŋau à wɛɛ. Gɛɛsɔ̃ɔ do Kehati do Merari.

⁷ Amai Gɛɛsɔ̃ɔ ŋai Ladãa do Simei.

⁸ Amai Ladãa ŋai Yehiɛli do Zetamu do Zoɛli aŋa mɛɛta. Yehiɛlii í jɛ inɛ ngbo nŋa.

⁹ Amai Simei ŋai Selomiti do Haziɛli do Harãa aŋa mɛɛta. Aŋau bɛi à jɛ ilu kpasɛ̃ ŋa si nyaanzei Ladãa ikpa idei baa.

¹⁰ Simei í nɛ ama mɛɛ mmu gɔ ŋa má. Yahati do Ziza do Yeusu do Beria.

¹¹ Yahatii í jɛ inɛ ngbo, nɔ Ziza í jɛ minjisia. Yeusu do Beria a kù ba ama nkpɔ. Ŋɔi à ka ŋa bɛi inɛi kpasɛ̃ akã ŋa.

¹² Amai Kehati ŋai Amuramu do Yisehaa do Eborɔ̃ɔ do Uziɛli aŋa mɛɛ.

¹³ Amai Amuramu ŋai Arɔ̃ɔ do Moizi. Ŋɔi à cica Arɔ̃ɔ nŋu do amaɛ ŋa à jilɛ ŋa ikã hee do ajɔ fei a ya maa ce icɛ si ile iyi í re do kumáu. Aŋai aa ya cea Aɔ̃ Lafɛ̃ɛ kuwee do tuae nɔ a maa ceaa icɛ nɔ a ya weea zamaaɛu do ajɔ fei do irii Aɔ̃ Lafɛ̃ɛ.

¹⁴ Amma amu ŋa iyi à jɛ ti Moizi inɛi Ilaaɔ̃u, à ka ŋai si tuubai dimii Levii ŋa.

¹⁵ Amai Moizi ŋai Gɛɛsɔ̃ɔ do Eliezɛɛ.

¹⁶ Sebuɛlii í jɛ ama yemmai Gɛɛsɔ̃ɔ.

¹⁷ Nɔ Rehabia mɔi í jɛ ama yemmai Eliezɛɛ. Eliezɛɛ kù bí ama kãma si antaiɛ má. Amma amai Rehabia ŋa à kpɔ ntɔ ntɔ.

¹⁸ Selomitii í jɛ ama yemmai Yisehaa.

¹⁹ Yeriai í jɛ ama yemmai Eborɔ̃ɔ, minjisiaɛ Amaria, mɛɛtasiaɛ Yahaziɛli, mɛɛsiaɛ Yekameamu.

²⁰ Miseei í jɛ ama yemmai Uziɛli, Yisiya mɔi í jɛ minjisiaɛ.

²¹ Amai Merari ŋai Mali do Musi. Amai Mali ŋai Eleazaa do Kisi.

²² Eleazaa í ku, kù ba ama inɛmɔkɔ. Amma í bí ama inaabo ŋa iyi amai Kisi ŋau à so à ce abo ŋa.

²³ Ama mɛɛtai Musi í nɛ. Mali do Edɛɛ do Yeremɔti.

²⁴ Aŋai à jɛ tɔkui Levii ŋa, nɔ à jɛ ilu kpasɛ̃ ŋa si nyaanze nŋa ŋa si kuka iyi à ce iri do iriu. À dasi ŋa icɛi kpasɛ̃i Aɔ̃ Lafɛ̃ɛu ku cei hai inɛ ŋa iyi à ba adɔ̃ kɔnfia hee do ku lesi.

²⁵ Davidi í ni, Aɔ̃ Lafɛ̃ɛi inɛi Izirɛli ŋau í mua zamaaɛ kusĩmi, nɔ nŋu takaɛ Zeruzalɛmui á maa wa hee do ajɔ fei.

²⁶ Do yaase bɛɛbɛ, dimii Levii ŋa a kù nɛ a so ilei acɔu do jĩnɛ ŋa iyi à ya cea do icɛu má.

²⁷ Si ide ankãanyi ŋa iyi Davidi í jilɛu, à ka tɔkui Levii ŋaui hai inɛ iyi í ba adɔ̃ kɔnfia hee ku bɔ kɔnfia do ku lesi.

²⁸ À jilɛ ŋai bi tɔkui Arɔ̃ɔ ŋa, a maa ce icɛ si kpasɛ̃i Aɔ̃ Lafɛ̃ɛu. À nɛ a maa ce icɛi si bantumai kpasɛ̃u do si inɔ ile ŋau, nɔ aŋai aa ya jɔ̀ jĩnɛ ŋa iyi à nya ikã ŋa si icɛi kpasɛ̃i Aɔ̃ Lafɛ̃ɛu a maa maaju.

²⁹ Aŋai aa ya maa ce wũaai pɛ̃ɛ ŋau, do kuweei iyafũ ŋau, do kaa hai nɛ levɛ̃ɛ ŋa iyi a kù sɔ̃, do kaa hai nɛ levɛ̃ɛ ŋa iyi à sɔ̃, do si mii ku wã inyi do mii ku wã ilɛ ŋau fei.

³⁰ Daakɔ do alɛ fei à nɛ a ya koo a kɔ̃ iri a maa cĩ Aɔ̃ Lafɛ̃ɛi,

³¹ nɔ a ya maa ceaa kuwee waati kãma fei, si ajɔi kusĩmi ŋa do si cukpa titɔ̃ ŋa do jingau ŋau si bɛi í jilɛ nŋau.

³² Aŋai aa maa woolu si icɛi ile bi kukou do ile kumáu, nɔ a maa sobi tɔkui Arɔ̃ɔ nyaanze nŋa ŋau si icɛi kpasɛ̃i Aɔ̃ Lafɛ̃ɛu.