Bomma 1, 21 - Bibeli do fee

Davidi í jɔ̀ à ka inɛi Izirɛli ŋa

¹ Seetam í dedeò laalɔ ku cea inɛi Izirɛli ŋa, nɔ í tale si Davidi ku ka inɛi Izirɛli ŋau.

² Ŋɔi Davidi í sɔ̃ Zoabu do inɛ ngboi sooge ŋau í ni, i koo i ce kukai inɛi Izirɛli ŋau wa ŋa, hai Bɛɛseba hee ku baa Dãa. Nɔ i naa i sɔ̃m ŋa ku ba n mà bɛi akpɔ nŋau í to.

³ Ŋɔi Zoabu í jɛaa í ni, Aɔ̃ Lafɛ̃ɛ ku jɔ̀ zamaau ku kpɔ ikɔ ciwa. Ilaalu lafɛ̃ɛm, inɛ ŋau fei woo ce icɛɛ ŋai. To, na mii í ce ì waa bi i ce bɛɛbɛ i dasiò inɛi Izirɛli ŋau dulum ku ce.

⁴ Amma ilaaluu í leekĩ dim dim si ide iyi í jilɛa Zoabuu. Ŋɔi Zoabu í koo í dabii si ilɛi Izirɛliu fei, nɔ í sinda í baa Zeruzalɛmu.

⁵ Ŋɔi Zoabu í sɔ̃ Davidi bɛi akpɔi zamaau í to. Si ilɛi Izirɛliu fei, inɛmɔkɔ ŋa iyi à to igũ ku bɔ, à dedei aŋa miliɔ̃ɔ do dubu cĩɔ (1.100.000). Si ilɛi Zudaa mɔ inɛmɔkɔ ŋa iyi à to igũ ku bɔ à dedei aŋa dubu cĩɔ mɛɛ do kitaò fɛɛwa (470.000).

⁶ Zoabu kù ka dimii Levii ŋa do dimii Bɛnzamɛɛ ŋa, domi wa yɔɔ iyi idei ilaaluu mii laalɔi.

Ilaaɔ̃ í kpã Davidi iju na dulum dɛɛ

⁷ Ideu kù dɔ̃a Ilaaɔ̃ si, nɔ í kpã inɛi Izirɛli ŋau iju.

⁸ Nɔ Davidi í tɔɔ Ilaaɔ̃ í ni, dulum nla nlai ǹ ce si ideu bɛ. Nsɛi, amu takam ǹ mà iyi ide sũmui ǹ ce. Na nŋu, ceem suurui dulum dom.

⁹ Ŋɔi Aɔ̃ Lafɛ̃ɛ í sɔ̃ Gadi woo yɛi Davidiu í ni,

¹⁰ koo i sɔ̃ Davidi i ni ijuukpã ikã ikã mɛɛtai amu Aɔ̃ Lafɛ̃ɛ ǹ jilɛaa. Si inɔi ijuukpã ŋau akã iyi í cicai an jɔ̀ ku naa siɛ.

¹¹ Ŋɔi Gadi í bɔ bi Davidi í sɔ̃ɔ í ni, Aɔ̃ Lafɛ̃ɛ í ni yoomai aa so.

¹² Ari ku ce adɔ̃ mɛɛta si ilɛu de, mà cukpa mɛɛta si bii mbɛɛɛ ŋa aa ce nfeɛ do taakuba, walakɔ ajɔ mɛɛta si bii Aɔ̃ Lafɛ̃ɛ á jɔ̀ amalekaɛ ku kpa inɛ ŋa do taakuba do patapoo má si ilɛu fei. Cɔ iyi ì bi n ba n koo n jɛaa inɛ iyi í bɛm wau.

¹³ Ŋɔi Davidi í jɛa Gadi í ni, ǹ wa si inɔ kufɔ nla nla. Á sĩa Aɔ̃ Lafɛ̃ɛ ku kpãm iju do iyi amanɛ ŋa aa kpãm iju, domi araarei Aɔ̃ Lafɛ̃ɛ í la.

¹⁴ Ŋɔi Aɔ̃ Lafɛ̃ɛ í jɔ̀ patapoo í naa si ilɛi Izirɛliu. Nɔ amanɛ dubu kitaò fɛɛwa (70.000) í ku si zamaau.

¹⁵ Ŋɔi Ilaaɔ̃ í bɛ amalekau koo ce nfei Zeruzalɛmu. Si bɛi í koo wa ce nfei iluu, ŋɔi Aɔ̃ Lafɛ̃ɛ í cɔ ilu nɔ í kpaasi idɔ si gãmɛi laalɔu. Ŋɔi í sɔ̃ amalekau í ni, í to bɛɛbɛ, fa awɔɛ. Waati bɛɛbɛ, amalekau í wai kɔkɔi bi ku kpokpo bileei Ɔɔnaa inɛi Zebusi.

¹⁶ Ŋɔi Davidi í yɛ iyi amalekai Aɔ̃ Lafɛ̃ɛ í wa aninii lele do ilɛ. Nɔ í yɔ taakuba wa muu si awɔ í too wa ikpa Zeruzalɛmu. Ŋɔi Davidi do inɛ ngbo ŋau à bii ara nŋa saaki à cuku à sɛɛbata.

¹⁷ Nɔ Davidi í tɔɔ Ilaaɔ̃ í ni, kù jɛ amui ǹ ni a ka zamaau ba. Amui ǹ ce dulum nɔ ǹ ce laalɔ. To, taale yoomai inɛ ŋau ihɛ̃ mɔ à ce. Debɛi Aɔ̃ Lafɛ̃ɛm, amu do nyaanzem nii ì nɛ ì kpã iju. Maà ti i jɔ̀ ijuukpã ku naa si zamaau.

Davidi í cea Aɔ̃ Lafɛ̃ɛ bi kuwee

¹⁸ Amalekai Aɔ̃ Lafɛ̃ɛ í sɔ̃ Gadi í ni koo ba Davidi ide ku fɔ ku ba ku bɔ bantuma bii Ɔɔnaa inɛi Zebusiu í ya kpokpo bilee koo maa nŋu bi kuwee.

¹⁹ Ŋɔi Davidi í dede í koo si bɛi Gadi í fɔ do irii Aɔ̃ Lafɛ̃ɛu.

²⁰ Ɔɔnaa wa kpokpo bilee. Iyi í sinda í cɔ ilu, ŋɔi í yɛ amaleka. Ŋɔi ama inɛmɔkɔ mɛɛɛ ŋau à sa à waa manji.

²¹ Iyi Davidi wa to wa bi tɛɛ, ŋɔi í hɔ̃nnɛ Davidi. Nɔ í fita hai si bantumau í koo í sɛɛbata si wajuɛ.

²² Ŋɔi Davidi í sɔ̃ɔ í ni, jɔ̀ɔm bantumaɛu ihɛ̃ ku ba n maa Aɔ̃ Lafɛ̃ɛ bi kuwee. Jɔ̀ɔm nɔ n sãaɛ fiaɛ zaka bɛi á jɛ, ku ba ijuukpãu ku fita hai si zamaau.

²³ Ŋɔi Ɔɔnaa í jɛaa í ni, soo ilaalu lafɛ̃ɛm, nɔ i ce bɛi í sĩaɛ si. An naɛ kɛtɛ ŋa i ceò kuwee iyi à ya jo si ina fei sãa sãau. Sarɛti mɔ wee i koò inai kuweeu. Bilee mɔ wee i ceò kuweei amaajɛ. Soo fei, ǹ muɛi.

²⁴ Amma ilaalu Davidi í jɛaa í ni, aawo. Ǹ bi n sã fiaɛi bɛi í nɛ ku jɛ, domi n kaa n cea Aɔ̃ Lafɛ̃ɛ kuwee do mii ndɛɛ. Nɔ n kaa n ce kuwee do mii iyi n kù sã nkãma.

²⁵ Nɔ í ra bantumau do wura kpɛkɛlɛ cĩɔ mɛɛfa (600).

²⁶ Tengi bɛi í maa Aɔ̃ Lafɛ̃ɛ bi kuweeu, nɔ í ce kuwee ŋa iyi à ya jo si ina fei sãa sãa do kuweei anu akã. Ŋɔi í tɔɔ Aɔ̃ Lafɛ̃ɛ, nɔ í jɛaa í jɔ̀ ina í kita wa hai lele si bi kuweeu í jo iŋau.

²⁷ Ŋɔi Aɔ̃ Lafɛ̃ɛ í sɔ̃ amalekau ide nɔ í sindo taakubaɛu si inɔ ankɔ̃ɔɛ.

²⁸ Si bɛi Davidi í yɔɔ iyi Aɔ̃ Lafɛ̃ɛ í gbɔ kutɔɔi nŋu si bantumai Ɔɔnaau, ŋɔi í ce kuwee ŋa.

²⁹ Ilei acɔi Aɔ̃ Lafɛ̃ɛ iyi Moizi í ce si gbaau do si bii à ya ce kuwee ŋau à wai si geetei Gabaɔ̃ɔu.

³⁰ Amma Davidi kaa yɔkɔ koo tɔɔ Ilaaɔ̃ bɛ si na iyi í jɔ̀ taakubai amalekai Aɔ̃ Lafɛ̃ɛu í jɔ̀ zigiɛ í da.