Bomma 1, 20 - Bibeli do fee

Zoabu í gba ilui Raba

¹ Iyi adɔ̃ í ka si sukui igũ ku bɔi ilaalu ŋa, Zoabu í gbã soogei Izirɛli ŋa à koo à lɛgɛ ilɛi inɛi Amɔɔ ŋa, nɔ í koo í bu ilui Raba koe. Amma Davidi takaɛ í gbe Zeruzalɛmu. Ŋɔi Zoabu í jɛ iluu igũ í ce asɔɔɛ.

² Ŋɔi Davidi í nya fulai bommau hai si irii ilaalu nŋau nɔ í ba wee kuwoɛ do ti wura kiloo kuntaa wa mungai nɔ í nɛ kuta ku nɛ fia gɔ. Ŋɔi à daa Davidi si fulau, nɔ í ko amani nkpɔ nkpɔ hai iluu í nɛò.

³ Nɔ í dasi inɛi Raba ŋa iyi à gbe ŋau icɛi aru ŋa ku ce. Í jɔ̀ à ce icɛ ikã ikã baa yooma fei, inɛ gɔ ŋa do sii, inɛ gɔ ŋa do dunduusu, inɛ gɔ ŋa mɔ do dagba. Bɛɛbɛi í cea ilui inɛi Amɔɔ ŋau fei. Si anyiɛ nɔ í sinda í baa Zeruzalɛmu do soogeɛ ŋau fei.

Inɛi Izirɛli ŋa à ce igũ do inɛi Filisi ŋa

⁴ Si anyiɛ, inɛi Izirɛli ŋau à ce igũ má aŋaò inɛi Filisi ŋa ilui Gezɛɛ. Ŋɔi Sibekai inɛi Husau í kpa Sipai inɛ akãi dimii Rafa ŋau. Nɔ à dasi inɛi Filisi ŋau anyɔ.

⁵ À nyi à ce igũ gɔ má do inɛi Filisi ŋa. Nɔ Elihanaa amai Yaii í kpa Lami ifɔi Goliati inɛi Gati iyi akpai kakaɛ í la bɛi gomboi caacɛ.

⁶ Igũ í ce má ilui Gati. Mɔkɔ doogo gɔ í wa bɛ, mɔkɔu mɔ dimii Rafai, í nɛ amaawɔ mɛɛfa si awɔ akãɛ fei do amaasɛ mɛɛfa si kutɛ akã fei, nɔ fei í dede ara kɔnfia do mɛɛ.

⁷ Nŋui í bu inɛi Izirɛli ŋa. Nɔ Zonatãa amai Sama igbãi Davidi í kpaa.

⁸ Inɛ ŋau bɛ fei dimii Rafa inɛi Gati ŋai. Davidi do soogeɛ ŋa à kpa ŋa.