Bomma 1, 19 - Bibeli do fee

Akawe nlai Davidi ŋau à yɛ anyɔ

¹ Si anyiɛ, ŋɔi Nahasi ilaalui inɛi Amɔɔ ŋa í ku, nɔ amaɛ í jɛ bomma si agbɛɛ.

² Ŋɔi Davidi í ni, ǹ bi n cea Hanunu jiida bɛi Nahasi baaɛ í ceem. Nɔ í bɛ inɛ ŋa a koo a coo fɔɔi ikui baaɛ nɔ a tũ inɔɛ. Iyi akawei Davidi ŋau à to ilɛi inɛi Amɔɔ ŋa bi Hanunu,

³ ŋɔi inɛ ngboi inɛi Amɔɔ ŋau à koo à sɔ̃ Hanunu à ni, ì waa tamaa bɛi Davidi í bɛ inɛ ŋau ihɛ̃ wai a naa a tũ idɔɛ si na iyi í jɔ̀ í mà bɛɛrɛi baaɛ? I kù mà iyi à naa a cɔ yaasei ilɛu ku ba ku naa ku ce asɔɔɛ?

⁴ Ŋɔi Hanunu í mu woo bɛi Davidi ŋau, nɔ í jɔ̀ à wa nŋa iri, nɔ à bu ibɔ sisɔ nŋa ŋa si anini hee si akai icu. Si anyiɛ nɔ í ni a nɛ.

⁵ Ŋɔi Davidi í gbɔ ideu, nɔ í bɛ inɛ ŋa a bɔ ku kò nŋa, domi inɛ ŋau à wa si anyɔ nla nla. Nɔ í ni a sɔ̃ ŋa a wa ilui Zeriko titã hee agbã nŋa ŋau a wu, si anyiɛ nɔ a baa wa.

Davidi í ce igũ do inɛi Amɔɔ ŋa do inɛi Siri ŋa

⁶ Iyi inɛi Amɔɔ ŋa à yɛ iyi aŋa à cea Davidi taale, ŋɔi aŋa do Hanunu ŋa à bɛ inɛ ŋa do isɔ fũfũ tɔnu kuntaa a koo a haya nŋa sooge ŋa do sarɛtii igũ ŋa do masa ŋa wa hai bi inɛi Siri ŋa iyi à wa ilɛi Mezopotami do iyi à wa Maaka do Soba.

⁷ Ŋɔi à haya sarɛtii igũ dubu kuntaa do minji (32.000) do ilaalui Maaka nŋu do soogeɛ ŋa, nɔ à na à ce asɔ do wajui Mɛdeba. Inɛi Amɔɔ ŋau à tɔtɔɔ wa hai ilu nŋa ŋa nɔ à waa naa igũu.

⁸ Iyi Davidi í gbɔ ideu, ŋɔi í jɔ̀ Zoabu í koo si ŋa, nŋu do sooge kaasãanɛ ŋau fei.

⁹ Ŋɔi inɛi Amɔɔ ŋau à fita wa do sɔɔlui igũ à na à wa anu koofai ilu nla nŋau. Nɔ ilaalu ŋa iyi à naa ku sobi ŋau à wa inya mmu inɔ sako.

¹⁰ Zoabu í yɛ iyi igũu anyi do wajui á jɛ. Ŋɔi í cica sooge kaasãanɛ ku mà igũi Izirɛli ŋau fei í ce ŋa wuaa akã a ce igũ do soogei Siri ŋa.

¹¹ Nɔ í so ifɔɛ Abisai inɛ ngboi sooge ŋa iyi à gbeu a koo a ce igũ do soogei Amɔɔ ŋa.

¹² Ŋɔi í sɔ̃ ifɔɛu í ni, bii inɛi Siri ŋa à waa kãmiam naa i sobim. Bii inɛi Amɔɔ ŋa mɔi à na à waa kãmiaɛ, an sobiɛ.

¹³ Ka maà ti ka tɛkɛɛò anyi, ka ce wɔɔkɔ na zamaa nwa do ilui Ilaaɔ̃ Lafɛ̃ɛ nwa ŋau, nɔ Aɔ̃ Lafɛ̃ɛ ku ce bɛi í sĩaa.

¹⁴ Ŋɔi Zoabu do soogeɛ ŋa à waa koo si soogei Siri ŋau, nɔ inɛi Siri ŋau à waa sa nŋa.

¹⁵ Iyi inɛi Amɔɔ ŋa à yɛ iyi inɛi Siri ŋa à waa sa, ŋɔi aŋa mɔ à saa Abisai ifɔi Zoabuu à koo à dasi inɔ ilu. Ŋɔi Zoabu í baa Zeruzalɛmu.

¹⁶ Iyi inɛi Siri ŋa à yɛ inɛi Izirɛli ŋa à kãmia aŋa, ŋɔi à bɛ inɛ ŋa a koo a gbã inɛi Siri ŋa iyi à wa icei idoi Efaratau wa. Nɔ Sofaki inɛ ngboi soogei Hadadezɛɛ ŋaui wa jɛ iri nŋa.

¹⁷ Ŋɔi à koo à sɔ̃ Davidi laabaau nŋa. Nɔ í tɔtɔɔ soogei Izirɛli ŋau fei í kuaò idoi Zuudɛ̃ɛu í nɛ wa koo si ŋa koo ba ŋa ku ja. Ŋɔi inɛi Siri ŋa à kòo do igũ,

¹⁸ amma à saa inɛi Izirɛli ŋa. Nɔ Davidi í kpa sooge dubu mɛɛje (7.000) iyi à wa si sarɛti ku ja igũ ŋau do masa dubu ciiji (40.000). Ŋɔi í jɔ̀ à kpa Sofaki inɛ ngboi sooge ŋau.

¹⁹ Ŋɔi ilaalui ilu ŋa iyi Hadadezɛɛ wa mu ŋau fei à tɔɔ laakai ku sũ bi inɛi Izirɛli ŋa si bɛi à yɛ à jɛ aŋa igũ. Nɔ inɛi Izirɛli ŋa à ce ŋa aru. Ŋɔi inɛi Siri ŋau a ci ya bi inɛi Amɔɔ ŋau ku sobi si igũ má.