Bomma 1, 18 - Bibeli do fee

Davidi í jɛ inɛi ilɛ ŋa iyi à wa kɔkɔɛ igũ

¹ Si anyiɛ, ŋɔi Davidi í jɛ inɛi Filisi ŋa igũ í dasi ŋa anyɔ. Nɔ í gba si ŋa ilui Gati do ilɛɛkoɛ ŋa.

² Nɔ í koo í jɛ inɛi Moabu ŋa mɔ igũ má, í jɔ̀ à baa à jɛ aruɛ ŋa nɔ í jilɛ nŋa mii iyi aa ya maa sã adɔ̃ fei.

³ Davidi í jɛ Hadadezɛɛ ilaalui Soba igũ ikpa Amati, waati iyi í koo wa gba ilɛ iyi í wa kɔkɔi idoi Efaratau.

⁴ Davidi í gba siɛ sarɛtii igũ dubu (1.000) do masa ŋa aŋa dubu mɛɛje (7.000) do sooge woo nɛ do isɛ ŋa aŋa dubu kɔnfia (20.000). Nɔ í bu atĩi kɔbisii acĩ ŋau fei, í gbe acĩ cĩɔ (100) iyi í jɔ̀a araɛ na sarɛtii igũ ku fa.

⁵ Ŋɔi inɛi Siri ŋa à naa Hadadezɛɛ ku sobi hai ilui Damasi wa. Nɔ Davidi í kpa inɛi Siri dubu kɔnfia do minji (22.000)

⁶ nɔ í jilɛ soogeɛ ŋa Siri bɛ. Do yaase bɛɛbɛi inɛi Siri ŋa à baa à jɛ aruɛ ŋa nɔ í jilɛ nŋa mii iyi aa maa sã adɔ̃ fei. Aɔ̃ Lafɛ̃ɛ í ya jɔ̀ Davidi ku jɛ igũi bii í bɔ fei.

⁷ Nɔ Davidi í gba tɛlii wura ŋa iyi woo degbei Hadadezɛɛ ŋa à waa mu í nɛò Zeruzalɛmu.

⁸ Ŋɔi í gba isɔ nkpa nkpɔ nkpɔ má hai ilui Tibati do hai ilui Kunu ilui Hadadezɛɛ ŋau. Nɔ Salomɔɔ í na í ceò dangalai isɔ nkpa nla nla do sɔbe ŋa do jĩnɛi isɔ nkpa ŋau.

⁹ Ŋɔi Toou ilaalui Amati í gbɔ iyi Davidi í koo í jɛ soogei Hadadezɛɛ ilaalui Soba ŋau fei igũ,

¹⁰ ŋɔi í bɛ amaɛ Hadoramu wa ku na ku coo fɔɔ nɔ ku saabuɛ si bɛi í bɔ igũ bi Hadadezɛɛ nɔ í kãmiaɛ. Toou í tako wa ce igũi wo do Hadadezɛɛ. Nɔ í kooa jĩnɛi wura ŋa do ti isɔ fũfũ do ti isɔ nkpa dimi ikã ikã baa yooma fei.

¹¹ Nɔ Davidi í koo í jilɛa Aɔ̃ Lafɛ̃ɛ jĩnɛ ŋau, bɛi í tako í jilɛa isɔ fũfũ do wura iyi í ba wa hai ilɛ bii í jɛ igũ ŋau fei, waatɔ ilɛi inɛi Edɔmu ŋa do ti inɛi Moabu ŋa do ti inɛi Amɔɔ ŋa do ti inɛi Filisi ŋa do ti inɛi Amalɛki ŋa.

¹² Abisai amai Seruya í kpa inɛi Edɔmu dubu mɛɛwa do mɛɛjɔ (18.000) si Lɔɔma ku da Imuu.

¹³ Nɔ Davidi í jilɛ soogeɛ ŋa si ilɛi Edɔmu, nɔ inɛi Edɔmu ŋau fei à baa à jɛ aruɛ ŋa. Aɔ̃ Lafɛ̃ɛ í ya jɔ̀ Davidi ku jɛ igũi tengi bii í bɔ fei.

Irii akawei Davidi ŋa

¹⁴ Davidi í jɛ bomma si ilɛi Izirɛli fei, nɔ wa mu ilɛu dee dee, wa cea inɛ fei kiiti si ntɔ.

¹⁵ Zoabu amai Seruyai í jɛ inɛ ngboi sooge ŋa. Zozafati amai Ahiludui í jɛ woo singa tia ŋau.

¹⁶ Sadɔku amai Ahitubu do Abimelɛki amai Abiataa ŋai à jɛ woo wee ŋa. Savusai í jɛ woo kɔ tia.

¹⁷ Benaya amai Yehoyadai í jɛ inɛ ngboi inɛi Kerɛti ŋa do inɛi Pelɛti ŋa iyi à jɛ woo degbe Davidi. Nɔ amai Davidi ŋai à jɛ inɛ ŋa iyi à waa tɛkɛ siɛ.