Bomma 1, 17 - Bibeli do fee

Kuwã iyi Ilaaɔ̃ í cea Davidi do tɔkuɛ ŋa

¹ Waati iyi Davidi í buba si kpasɛ̃ɛu í tã, ŋɔi í sɔ̃ Natãa waliiu í ni, amu wee ǹ wa si ile iyi à ce do jĩi ndii sɛɛdi, nɔ kpakoi akabuui Aɔ̃ Lafɛ̃ɛu í wai si ilei acɔ.

² Ŋɔi Natãa í jɛaa í ni, ce iyi í wa si idɔɛ fei, domi Ilaaɔ̃ í wɛɛ do awɔ.

³ Amma idũ, Ilaaɔ̃ í sɔ̃ Natãa í ni,

⁴ koo sɔ̃ Davidi woo ce icɛm nɔu i ni amu Aɔ̃ Lafɛ̃ɛ ǹ ni kù jɛ nŋui á maam kpasɛ̃ bii an wa.

⁵ N kù sũ si ile hai waati iyi ǹ fitaò inɛi Izirɛli ŋa wa hai ilɛi Ezibiti hee ku baa nnyi. Ǹ ya n wai si ilei acɔ tengi bii à waa bɔ fei.

⁶ Si isɛɛnɛ iyi awaò inɛi Izirɛli ŋau à ce fei, n kù sɔ̃ inɛ ngbo nŋa gɔ baa akã si aŋa iyi ǹ ni a maa gbã zamaam inɛi Izirɛli ŋau n kù ni, na mii í ce i kù ceem ile do jĩi ndii sɛɛdi ŋa.

⁷ Nsɛi koo i sɔ̃ Davidi woo ce icɛm i ni, amu Aɔ̃ Lafɛ̃ɛi lele do ilɛ ǹ ni ǹ soɛ wai hai bi ku degbe angudã ŋa ku ba i na i jɛ woo gbãi zamaam inɛi Izirɛli ŋa.

⁸ Ǹ wɛɛ do awɔ tengi bii ì bɔ fei. Ǹ kpa mbɛɛɛ ŋau fei, nɔ an jɔ̀ i nya iri bɛi inɛ nla nlai andunya ŋa.

⁹ An mua zamaam nɔu bi kuwa, nɔ n lɔɔ n jɔ̀ ku ce icã ku mi ilɛ ku ba ku maà yaya má, nɔ inɛ laalɔ ŋa a maà wahalaɛ bɛi à tako à ce wo

¹⁰ hai waati iyi ǹ jilɛ woo kiiti ŋa iyi aa maa gbã Izirɛli inɛm ŋau. An kɛkɛ mbɛɛɛ ŋau fei. Nɔ amu Aɔ̃ Lafɛ̃ɛ ǹ wa n sɔ̃ɛ iyi an jɔ̀ tɔkuɛ nkpɔ ku na ku jɛ bomma si anyiɛ.

¹¹ Bii ì na ì ku nɔ ì bɔ bi balaɛ ŋa, an nya amaɛ akã ku jɛ bomma si agbɛɛ, nɔ n jɔ̀ bommaɛ ku nɛ gbugbã.

¹² Nŋui á na ku maam kpasɛ̃, nɔ n jɔ̀ bommaɛ ku nɛ gbugbã hee do ajɔ fei.

¹³ Amui an jɛ baaɛ, nɔ nŋu mɔ á jɛ amam. N kaa n leekĩ jiida ku jɛm si gãmɛɛ bɛi ǹ cea inɛ iyi ì sãsi agbɛɛu.

¹⁴ An jilɔɔi ti zamaam do si bommam hee do ajɔ fei nɔ kitãi bommaɛu á maa nɛ gbugbãi hee do ajɔ fei.

¹⁵ Ŋɔi Natãa í koo í sɔ̃ Davidi ide ŋa iyi í gbɔ si kuyɛu fei.

Kutɔɔi Davidi

¹⁶ Nɔ ilaalu Davidi í koo í tɔɔ Aɔ̃ Lafɛ̃ɛ í ni, Aɔ̃ Lafɛ̃ɛm, mii kpasɛ̃m í jɛ nɔ yooi ǹ jɛ iyi ì jɔ̀ ǹ to bii ǹ wau ihɛ̃.

¹⁷ Amma ì waa cɔɔ mii keeke bi tɛɛ, nɔ ì nyi ì jɔ̀ ǹ mà bɛi tɔkum ŋa aa na a jɛ ala má. Ì waa cɔm bɛi inɛ nla, awɔ Aɔ̃ Lafɛ̃ɛ.

¹⁸ Mii ǹ nɛ iyi an sɔ̃ɛ má si bɛɛrɛ iyi ì jɔ̀ ǹ nɛ. Ì màm tã, amu woo ce icɛɛ.

¹⁹ Aɔ̃ Lafɛ̃ɛ, na kubii amu woo ce icɛɛi ì ce mii nla nla ŋau ihɛ̃ fei si bɛi idɔɛ í bi ku ba inɛ ŋa a yɔɔ.

²⁰ Aɔ̃ Lafɛ̃ɛ inɛ kãma kù jɛ saaɛ. Ntɔ ntɔ Aɔ̃ mmu kãma kù wɛɛ má bii kù jɛ awɔ, si bɛi à sisi nwa ideɛ à gbɔɔ do itĩ nwa.

²¹ Dimi yoomai í wɛɛ má si andunya iyi í yɛ bɛi zamaaɛ inɛi Izirɛli ŋau. Iwɛ̃ yoomai í ya inɛ ŋa ku ba ku ce ŋa zamaaɛ nɔ ku nya iri na saabu nŋa. Iwɛ̃ yoomai í ce maamaake ŋa í leleò dimi mmu ŋa si waju nŋa. Awɔ akãi ì ce bɛɛbɛ ì nya waò hai ilɛi Ezibiti.

²² Awɔi ì jilɛ inɛi Izirɛli ŋa ku ba a jɛ zamaaɛ hee do ajɔ fei. Nɔ awɔi ì baa ì jɛ Aɔ̃ Lafɛ̃ɛ nŋa.

²³ Bɛbɛi Aɔ̃ Lafɛ̃ɛ, jɔ̀ ide iyi ì fɔa amu woo ce icɛɛ do kpasɛ̃m ku maa wɛɛ hee do ajɔ fei. Ce bɛi ì fɔu,

²⁴ ku ba iriɛ ku nɛ amboe hee do ajɔ fei nɔ amanɛ ŋa a ni, Aɔ̃ Lafɛ̃ɛi lele do ilɛi í jɛ Lafɛ̃ɛi inɛi Izirɛli ŋa, nŋui í jɛ Lafɛ̃ɛi Izirɛli. Jɔ̀ kpasɛ̃i amu Davidi woo ce icɛɛ ku ba gbugbã bi tɛɛ.

²⁵ Ntɔ ntɔ Ilaaɔ̃ Lafɛ̃ɛm, awɔ takaɛi ì sɔ̃m ì ni aa jɔ̀ tɔkum ŋa a jɛ bomma si anyim. Na ŋɔi í jɔ̀ ǹ dasi wɔɔkɔ ǹ wa n tɔɔɛ.

²⁶ Aɔ̃ Lafɛ̃ɛ, awɔ Ilaaɔ̃i, nɔ awɔi ì sɔ̃m idei didɔ̃u ihɛ̃.

²⁷ Bɛbɛi ì ni ì weea kpasɛ̃m ku ba ku maa wɛɛ hee do ajɔ fei si wajuɛ. Aɔ̃ Lafɛ̃ɛ, mii iyi ì weea, í ya ba kuweei hee do ajɔ fei.