Bomma 1, 16 - Bibeli do fee

¹ Iyi à toò kpakou wa ŋɔi à koo à jilɔɔ si ilei acɔ iyi Davidi í gũaa. Si anyiɛ nɔ à cea Ilaaɔ̃ kuwee ŋa iyi à ya jo si ina fei sãa sãa do kuweei anu akã ŋa.

² Waati iyi Davidi í ce kuwee ŋau í tã, ŋɔi í weea zamaau do irii Aɔ̃ Lafɛ̃ɛ.

³ Si anyiɛ nɔ í kpɛ̃a inɛi Izirɛli ŋau fei sɔnda, hai inɛmɔkɔ do inaabo, inɛ fei í ba pɛ̃ɛ akã do kaai isoi kanda akã do kaai isoi rezɛ̃ɛ akã.

Inɛi Levii ŋa à kɔ̃ iri à waa saabu Aɔ̃ Lafɛ̃ɛ

⁴ Nɔ Davidi í jilɛ dimii Levii ŋau a maa ce icɛ bi kpakou nɔ a kɔ̃ iri a maa saabu Aɔ̃ Lafɛ̃ɛi inɛi Izirɛli ŋa a maa yeò gigiɛ.

⁵ Azafui í jɛ inɛ ngbo nŋa, minjisiaɛ Zakari. Yeiɛli do Semiramɔti do Yehiɛli do Matitia do Eliabu do Benaya do Obɛdi-Edɔmu do Yeiɛli ŋai à ya maa cã kundigi ŋa do mɔɔlɔ ŋau. Nɔ Azafui í ya maa cã sɛmbali ŋau.

⁶ Benaya do Yahaziɛli woo wee ŋaui à ya maa fã kãakãakĩ ŋau si wajui kpakoi akabuui Ilaaɔ̃u.

⁷ Hai ajɔ nŋu bɛi Davidi í sinti ku na Azafu do nyaanzeɛ ŋa icɛi Aɔ̃ Lafɛ̃ɛ ku cĩ do ku saabuɛ.

⁸ I saabu Aɔ̃ Lafɛ̃ɛ ŋa, i kɔ̃ iri do iriɛ. I sisia dimi mmu ŋa mii nla ŋa iyi í ce ŋa.

⁹ I kɔ̃a iri do jĩnɛi iri ku kɔ̃ ŋa. I sisi mii ŋa iyi í ce fei ŋa iyi í to biti.

¹⁰ I tɔɔ fufu na iriɛ ŋa. Inɛ ŋa iyi à waa dɛdɛ Aɔ̃ Lafɛ̃ɛ fei, a wɛɛò inɔ didɔ̃.

¹¹ I dɛdɛ Aɔ̃ Lafɛ̃ɛ ilu gbugbã fei ŋa. I ya maa dɛdɛɛ waati kãma fei ŋa.

¹² I ya ye gigii mii ŋa iyi í ce ŋa iyi í to biti do maamaakeɛ ŋa do kiitiɛ ŋa iyi í ce,

¹³ iŋɛ iyi ì jɛ dimii Izirɛli woo ce icɛɛ ŋa, iŋɛ iyi ì jɛ tɔkui Zakɔbu iyi í cicau ŋa.

¹⁴ Aɔ̃ Lafɛ̃ɛi í jɛ Ilaaɔ̃ Lafɛ̃ɛ nwa. Nŋui wa kiiti inɛi andunya fei.

¹⁵ I ya maa ye gigii akabuuɛ do ide iyi í fɔ í jilɛ hee si tɔku dubusia ŋa.

¹⁶ Akabuu nŋui í dĩ si gãmɛi Aburahamu, nɔ í cea Izaaki kuwã do kugbasi.

¹⁷ Í jilɔɔi bɛi wooda ti Zakɔbu nɔ kaa nɛ kɔɔ bi inɛi Izirɛli ŋa.

¹⁸ Si akabuuu í fɔ í ni, an na ŋɛ ilɛi Kanaã ku jɛ tubu nŋɛ.

¹⁹ Bala nŋɛ ŋau a kù kpɔ. Akpɔ nŋau í kere í caa. Inɛ njoo ŋai à waa jɛ si ilɛu.

²⁰ À ya maa nɛ̀i si ilɛ do ilɛ, do si dimi do dimi.

²¹ Amma Aɔ̃ Lafɛ̃ɛ ci ya jɔ̀ inɛ kãma ku wahala ŋa. Na iri nŋa í kpã ilaalu ŋa iju.

²² Í ni, i maà lu inɛ ŋa iyi ǹ cicau, nɔ i maà cea waliim ŋa laalɔ ŋa.

²³ I kɔ̃a Aɔ̃ Lafɛ̃ɛ iri ŋa, iŋɛ inɛi andunya fei. I sisi laabaau jiidai faabaɛ ajɔ fei ŋa.

²⁴ I sisia inɛi ilɛ mmu ŋa amboeɛ ŋa nɔ i sɔ̃ dimi mmu ŋa fei maamaake ŋa iyi í ce ŋa.

²⁵ Aɔ̃ Lafɛ̃ɛ í la nɔ í to a cũu. Nŋui inɛ fei í nɛ ku mà bɛɛrɛɛ ku re iwɛ̃ ŋa.

²⁶ Iwɛ̃i dimi mmu ŋau, a kù jɛ nkãma. Aɔ̃ Lafɛ̃ɛ njɛi í ce lele.

²⁷ Wajuɛ wa daana nɔ í nɛ amboe. Gbugbã do inɔ didɔ̃i í wa si inɔ kpasɛ̃ɛ.

²⁸ Iŋɛ inɛi andunya ŋa, i jɔ̀ i mà bɛɛrɛi Aɔ̃ Lafɛ̃ɛ do gbugbãɛ ŋa.

²⁹ I jɔ̀ i mà bɛɛrɛɛ ŋa. I naaò kuwee nŋɛ ŋa wa si wajuɛ ŋa. Aɔ̃ Lafɛ̃ɛ í má. I sɛɛbata si wajuɛ waati iyi ì yɔɔ ŋa.

³⁰ I yaya si wajuɛ ŋa, iŋɛ inɛi andunya fei. Icui ilɛ í nɛ gbugbã dim dim, nɔ kaa yaya.

³¹ Lele ku wɛɛò inɔ didɔ̃, ilɛ mɔ ku wɛɛò inɔ didɔ̃. A sɔ̃ inɛi ilɛ ŋa fei iyi Aɔ̃ Lafɛ̃ɛ í jɛ ilaalu.

³² Tenku ku ce ibaɛ wa do mii iyi í wa inɔɛ fei. Ilɛɛko ku wɛɛò inɔ didɔ̃ do mii iyi í wa siɛ fei.

³³ Jĩi ndii agbo ŋau a dɔ̃ anui inɔ didɔ̃ si wajui Aɔ̃ Lafɛ̃ɛ, domi wa naa ku kiiti inɛi andunya ŋa.

³⁴ I saabu Aɔ̃ Lafɛ̃ɛ ŋa, domi í jɛ jiida, nɔ araareɛ í ya wɛɛi hee do ajɔ fei.

³⁵ I ya ni ŋa, Ilaaɔ̃ woo faaba nwa, faaba wa. Tɔtɔɔ wa nɔ i nya wa hai si awɔi inɛi ilɛ mmu ŋa, ku ba ka saabu iri kumáɛu. Nɔ ka wɛɛò inɔ didɔ̃ ka kɔ̃ iri ka maa cĩɛ.

³⁶ Saabu ku jɛ ti Aɔ̃ Lafɛ̃ɛi inɛi Izirɛli ŋa hee do ajɔ fei. Nɔ inɛi Izirɛli ŋa fei à ni, ami. Nɔ à saabu Aɔ̃ Lafɛ̃ɛ.

³⁷ Ŋɔi Davidi í jɔ̀ Azafu do inɛi Levii nyaanzeɛ ŋau si wajui kpakoi akabuui Aɔ̃ Lafɛ̃ɛu bɛ ku ba a ya maa ce icɛ nŋa a maà leekĩ si bɛi à jilɛ nŋa woodaɛ ajɔ fei.

³⁸ Ŋɔi í so Obɛdi-Edɔmu do nyaanzeɛ ŋa aŋa kita do mɛɛjɔ (68) do Obɛdi-Edɔmu amai Yeditunu do Hosa a jɛ woo degbe anu koofa bii kpakou í wa.

³⁹ Nɔ í jilɛ Sadɔku do nyaanzeɛ ŋa woo wee ŋau si kpasɛ̃i Aɔ̃ Lafɛ̃ɛ si geete kumái Gabaɔ̃ɔu,

⁴⁰ ku ba a ya maa cea Aɔ̃ Lafɛ̃ɛ kuwee iyi à ya jo si ina fei sãa sãa ŋa waati kãma fei dasãò idũ si bi kuweeu, nɔ a ya maa ce mii ŋa iyi à kɔ si wooda iyi Aɔ̃ Lafɛ̃ɛ í jilɛa inɛi Izirɛli ŋau fei.

⁴¹ Bi tu ŋa bɛi Hemaa do Yedutunu à wa do inɛ mmu gɔ ŋa iyi à cica aŋaò ŋa a ya maa cĩ Aɔ̃ Lafɛ̃ɛ na kubi hai nɛ kɔɔɛ.

⁴² Hemaa do Yedutunu, aŋai à jɛ inɛ ngboi woo fã kãakãakĩ ŋau do woo cã sɛmbali ŋau, do woo cã jĩnɛ mmu gɔ ŋa iyi aa kɔ̃ iri a maa cĩò irii Ilaaɔ̃. Amai Yedutunu ŋai à jɛ woo degbe koofau.

⁴³ Si anyii nŋu, inɛ fei í bɔ ideɛ. Nɔ Davidi mɔ í sinda í nyi ku ba koo weea kpasɛ̃ɛ.