Bomma 1, 15 - Bibeli do fee

Davidi wa ce sɔɔlui kpakoi Ilaaɔ̃ ku tekĩu

¹ Davidi í jɔ̀ à maa ile ŋa si ilui Davidi. Nɔ í ce bi kuwai kpakoi Ilaaɔ̃u nɔ í gũa ilei acɔ.

² Ŋɔi Davidi í ni, inɛi Levii ŋa aŋa akãi aa so kpakou, domi aŋai Aɔ̃ Lafɛ̃ɛ í cica a soo nɔ a ya maa ce icɛɛ hee do ajɔ fei.

³ Ŋɔi Davidi í tɔtɔɔ inɛi Izirɛli ŋau fei Zeruzalɛmu bɛ ku ba a koo a baaò kpakou wa si bi kuwa iyi í ceau.

⁴ Ŋɔi í tɔtɔɔ tɔkui Arɔ̃ɔ ŋa do dimii Levii ŋa,

⁵ do tɔkui Kehati ŋa aŋa cifa (120). Uriɛlii í jɛ inɛ ngbo nŋa.

⁶ Tɔkui Merari ŋa aŋa cĩɔ minjii do kɔnfia (220). Asayai í jɛ inɛ ngbo nŋa.

⁷ Tɔkui Gɛɛsɔ̃ɔ ŋa aŋa cifaò fɛɛwai (130). Zoɛlii í jɛ inɛ ngbo nŋa.

⁸ Tɔkui Elisafãa ŋa aŋa cĩɔ minjii (200). Semayai í jɛ inɛ ngbo nŋa.

⁹ Tɔkui Eborɔ̃ɔ ŋa aŋa cinɛi (80). Eliɛlii í jɛ inɛ ngbo nŋa.

¹⁰ Tɔkui Uziɛli ŋa aŋa cĩɔ do maateejii (112). Aminadabui í jɛ inɛ ngbo nŋa.

¹¹ Ŋɔi Davidi í kpe Sadɔku do Abiataa aŋa woo wee ŋau do inɛi Levii ŋau, Uriɛli do Asaya do Zoɛli do Semaya do Eliɛli do Aminadabu.

¹² Ŋɔi í sɔ̃ ŋa í ni, iŋɛi ì jɛ inɛ ngboi kpasɛ̃ ŋa si dimii inɛi Levii ŋa. I ce buki iyi á jɔ̀ i maaju ŋa iŋɛ do inɛi kpasɛ̃ nŋɛ ŋa fei. Nɔ i koo i so kpakoi akabuui Aɔ̃ Lafɛ̃ɛi inɛi Izirɛli ŋau i baaò wa si bi kuwa iyi ǹ cea sɔɔluɛu ŋa.

¹³ Hai sinte, kù jɛ iŋɛi ì soo wa. Na ŋɔi í ce Aɔ̃ Lafɛ̃ɛ í jɔ̀ iku í kpa wa, domi a kù soo wa si yaase bɛi í jilɛ nwa woodaɛ.

¹⁴ Ŋɔi woo wee ŋau do dimii Levii ŋau à ce buki iyi á jɔ̀ a maaju ku ba a koo a so kpakoi Aɔ̃ Lafɛ̃ɛi inɛi Izirɛli ŋau wa.

¹⁵ Ŋɔi dimii Levii ŋau à so kpakou si yaase bɛi Ilaaɔ̃ í sɔ̃ Moizi í ni a ya ceu. À ce gadagaau si cingaa minjii kpakou à waa sooò si kɔngɔ nŋa.

¹⁶ Ŋɔi Davidi í ni inɛ ngboi dimii Levii ŋau a nya woo kɔ̃ iri ŋa si inɔ nŋa do jĩnɛi ijo nŋa ŋa, kundigi ŋa do mɔɔlɔ ŋa do sɛmbali ŋa iyi aa cã a maa nyisiò inɔ didɔ̃.

¹⁷ Ŋɔi inɛi Levii ŋau à nya Hemaa amai Zoɛliu, do Azafu amai Berekia. Hai si tɔkui Merari ŋau mɔ, à nya Etãa amai Kusaya,

¹⁸ à bɛi à tɔtɔɔ ŋa do nyaanze minjisia nŋa ŋau. À so Zakari do Bɛni do Yaaziɛli do Semiramɔti do Yeiɛli, do Uni do Eliabu do Benaya do Maaseya do Matitia, do Elifeleu do Mikeneya do Obɛdi-Edɔmu do Yeiɛli iyi à jɛ woo degbe anu koofa ŋau.

¹⁹ Hemaa do Azafu do Etãa woo kɔ̃ iri ŋau à nɛ sɛmbali ŋa iyi à ce do isɔ nkpa iyi à waa cã.

²⁰ Zakari do Aziɛli do Semiramɔti do Yeiɛli do Uni do Eliabu do Maaseya do Benaya à waa cã kundigi imù wɛwɛɛɛ ŋa.

²¹ Nɔ Matitia do Elifeleu do Mikeneya do Obɛdi-Edɔmu do Yeiɛli do Azazia ŋa à waa cã mɔɔlɔ ìmù mɛɛjɔ ŋa iyi aa maa cuaò iri ku kɔ̃u.

²² Kenania iyi í jɛ inɛ ngboi kpakou ku soɛ si inɛi Levii ŋaui wa cua nŋa si iri ku kɔ̃u, domi nŋui í nɛ kumàɛ.

²³ Berekia do Elikana ŋai à jɛ woo so kpakou.

²⁴ Sebania do Zozafati do Netaneɛli do Amasai do Zakari do Benaya do Eliezɛɛ woo wee ŋau à waa fã kãakãakĩ ŋa do wajui kpakoi Ilaaɔ̃u. Obɛdi-Edɔmu do Yeiya ŋai à jɛ woo so kpakou.

Kpakoi akabuui Aɔ̃ Lafɛ̃ɛ í to wa Zeruzalɛmu

²⁵ Ŋɔi Davidi do inɛ ngboi Izirɛli ŋau do inɛ ŋa iyi à jɛ inɛ ngboi wuaai sooge dubu ŋau à dasi kpãa à bɔ kpakoi akabuui Aɔ̃ Lafɛ̃ɛu ku so wa hai kpasɛ̃i Obɛdi-Edɔmu do inɔ didɔ̃.

²⁶ Do sobii Ilaaɔ̃i inɛi Levii ŋau à koo à soò kpakoi akabuuu wa. Nɔ à mu kɛtɛ kombo mɛɛje do angudã kombo mɛɛje a ceò kuwee.

²⁷ Davidi wa dasi ibɔ sisɔ fɛrɛ fɛrɛ gɔ. Nɔ ibɔ dimii bɛɛbɛi inɛi Levii ŋau mɔ à waa dasi aŋa iyi à waa so kpakou do woo kɔ̃ iri ŋau do Kenania iyi í jɛ inɛ ngbo nŋau. Nɔ Davidi í nɛ ibɔi acɔ ku nɛ gbugbã iyi í jɔ efodui woo wee ŋa.

²⁸ Ŋɔi inɛi Izirɛli ŋau fei à koo à so kpakoi akabuui Aɔ̃ Lafɛ̃ɛu wa do anu ku dɔ̃i inɔ didɔ̃, à waa fãò kuu do kãakãakĩ ŋa, nɔ à waa cã sɛmbali ŋa do kundigi ŋa do mɔɔlɔ ŋa.

²⁹ Iyi à waa lɔò kpakoi akabuui Aɔ̃ Lafɛ̃ɛu wa ilui Davidi, ŋɔi Mikali ama inaaboi Sauluu wa cɔ ilu hai do fɛrɛnti. Nɔ í yɛ ilaalu Davidi í fo wa dingaa wa jojo, ŋɔi í dondaɛ.