Bomma 1, 14 - Bibeli do fee

Davidi í wa Zeruzalɛmu

¹ Hiramu ilaalui Tiiu í bɛ akaweɛ gɔ ŋa wa bi Davidi do jĩi ndii sɛɛdi ŋa, nɔ í bɛ woo gbe kuta ŋa do woo gbe jĩi ŋa mɔ a na a maa kpasɛ̃.

² Ŋɔi Davidi í mà kãm kãm iyi Aɔ̃ Lafɛ̃ɛi í so nŋu ku jɛ ilaalui ilɛi Izirɛli nɔ í jɔ̀ bɛɛrɛi bommau wa kɔ̃ɔsi na zamaaɛ inɛi Izirɛli ŋa.

³ Davidi í so abo ŋa Zeruzalɛmu bɛ má í bíò ama inɛmɔkɔ do ama inaabo ŋa.

⁴ Amu ŋa iyi í bí Zeruzalɛmuu wee. Samua do Sobabu do Natãa do Salomɔɔ,

⁵ do Yibaa do Elipelɛti do Elisua,

⁶ do Noga do Nefɛgi do Yafia,

⁷ do Elisama do Beeliada do Elifelɛti.

Davidi í jɛ inɛi Filisi ŋa igũ

⁸ Inɛi Filisi ŋau à gbɔ iyi à cica Davidi ku jɛ ilaalui Izirɛliu fei, ŋɔi aŋa fei à dede à waa koo siɛ igũ. Iyi à na à sɔ̃ Davidi, ŋɔi í fita í bɔ ku ko nŋa.

⁹ Iyi inɛi Filisi ŋau à to Refaimu ŋɔi à fangaa si lɔɔmau.

¹⁰ Ŋɔi Davidi í bee Ilaaɔ̃ í ni, n dede n koo si inɛi Filisi ŋau? Aa so ŋa i daam si awɔ? Ŋɔi Aɔ̃ Lafɛ̃ɛ í jɛaa í ni, dede i koo domi an so ŋa n daaɛ si awɔ.

¹¹ Ŋɔi Davidi í dede í bɔ Baali-Perasimu. Bɛi í jɛ ŋa igũ. Nɔ í ni, Ilaaɔ̃ í jɔ̀ faata í ce si gãmɛi mbɛɛm ŋa bɛi bii inyi wa cã í ya ga geete ku jɔ̀ faata ku ce. Nɔ à kpe inyau Baali-Perasimu, waatɔ lafɛ̃ɛ iyi í jɔ̀ faata í ce.

¹² Nɔ inɛi Filisi ŋau à sa à jɔ̀ iwɛ̃ nŋa ŋa bɛ nɔ Davidi í ni a jo ŋa.

¹³ Ŋɔi inɛi Filisi ŋau à na à nyi wa si ŋa igũ Refaimu nɔ à fangaa si lɔɔmau má.

¹⁴ Ŋɔi Davidi í bee Ilaaɔ̃ má. Nɔ Ilaaɔ̃ í sɔ̃ɔ í ni, koo, amma maà bɔ do waju nŋa. Bɔ do anyi nŋa wa nɔ i koo i ba ŋa kɔkɔi agbou.

¹⁵ Waati iyi aa na i maa gbɔ ibai isɛɛnɛ si antaii jĩi ŋau, fita i koo i ja igũ, domi amu Ilaaɔ̃i ǹ wa n nɛ do wajuɛ n koo n kpa soogei Filisi ŋau.

¹⁶ Ŋɔi Davidi í ce bɛi Ilaaɔ̃ í sɔ̃ɔu. Nɔ í jɛ inɛi Filisi ŋau igũ, í kpa ŋa wa hai Gabaɔ̃ɔ hee à toò wa Gezɛɛ.

¹⁷ Ŋɔi Davidi í nya iri si ilɛ ŋa bii fei, nɔ Ilaaɔ̃ í jɔ̀ inɛi ilɛ ŋau fei à waa ce njoɛ.