Bomma 1, 13 - Bibeli do fee

Davidi í jilɛ si a bɔò kpakoi akabuuu Zeruzalɛmu

¹ Ŋɔi Davidi í tɔtɔɔ inɛ ngboi sooge dubu ŋau do ti cĩɔ ŋau do woo cua ŋau fei.

² Nɔ í sɔ̃ inɛi Izirɛli ŋa iyi à tɔtɔɔ bɛ fei í ni, bii í jɛ ì yɔɔ iyi í sĩa ŋa, nɔ Aɔ̃ Lafɛ̃ɛ nwai í jilɔɔ si bɛɛbɛ, ka bɛ inɛ ŋa bii fei si kpaasi nwa ŋa iyi à gbe si ilɛi Izirɛliu fei, do bi woo wee ŋau do si dimii Levii ŋau do si ilui ilɛ nŋa ŋa ku ba awaò ŋa ka tɔtɔɔ inya akã.

³ Nɔ ka baaò kpakoi Aɔ̃ Lafɛ̃ɛ nwau wa bi tu wa, domi à jɔ̀ ideɛ si waatii Saulu.

⁴ Ŋɔi inɛ ŋa iyi à tɔtɔɔ bɛu fei à jilɛ si a ce bɛɛbɛ, domi ideu í sĩaa zamaau fei si.

⁵ Ŋɔi Davidi í tɔtɔɔ inɛi Izirɛli ŋau fei hai kɔɔi ilɛi Ezibitiu hee ku bɔ andɛi ilui Amati ku ba a baaò kpakoi Ilaaɔ̃u wa hai Kiriati-Yearimu.

⁶ Nɔ Davidi do inɛi Izirɛli ŋau fei à bɔ Baala waatɔ Kiriati-Yearimu si ilɛi Zudaa kpakoi Aɔ̃ Lafɛ̃ɛu ku so wa. Si antaii kpakoui amaleka iyi à ya kpe serubɛ̃ɛ ŋau à wa, nɔ bɛi à ya maa kpe irii Aɔ̃ Lafɛ̃ɛu.

⁷ Ŋɔi à so kpakou si antaii sarɛti titɔ̃ hai kpasɛ̃i Abinadabu à nɛò. Uza do Ahiyo à waa mu sarɛtiu.

⁸ Ŋɔi Davidi do inɛi Izirɛli ŋau fei à waa kɔ̃ iri do gbugbã nŋa fei, à waa cãò kundigi ŋa do mɔɔlɔ ŋa do ama gãgã ŋa do sɛmbali ŋa, nɔ à waa fã kãakãakĩ ŋa.

⁹ Iyi à to si bantuma bi ku kpokpo bileei Kidɔ̃ɔ, ŋɔi Uza í yɔ awɔ í mu kpakou si bɛi kɛtɛ ŋau à jɔ̀ wa bi ku cuku.

¹⁰ Ŋɔi idɔɔkɔ̃i Aɔ̃ Lafɛ̃ɛ í dede siɛ, nɔ í kpaa si na iyi í jɔ̀ í ya kpakou. Nɔ Uza í ku bɛ si wajui Ilaaɔ̃.

¹¹ Ŋɔi idɔi Davidi í kɔ̃ si na iyi í jɔ̀ Aɔ̃ Lafɛ̃ɛ í kpa Uza do idɔɔkɔ̃. Nɔ í kpe inyau Perɛsi-Uza waatɔ idɔɔkɔ̃i Aɔ̃ Lafɛ̃ɛ í kpa Uza anu akã. Nɔ bɛɛbɛi à ya kpe inyau baa nnyi.

¹² Ajɔ nŋu bɛ njo í mu Davidi si Ilaaɔ̃ nɔ í ni, iwoi amu mɔ an jɛ a lɔò kpakoi akabuui Ilaaɔ̃u ihɛ̃ wa si ilum má.

¹³ Ŋɔi Davidi í kɔ̀ a naaò kpakou wa iluɛ nɔ í jɔ̀ à koo à jilɔɔ kpasɛ̃i Obɛdi-Edɔmu inɛi Gatiu.

¹⁴ Ŋɔi kpakoi Ilaaɔ̃u í ce cukpa mɛɛta kpasɛ̃ɛ bɛ. Nɔ Aɔ̃ Lafɛ̃ɛ í weea kpasɛ̃ɛu do mii iyi í jɛ titɛɛ fei.