Bomma 1, 12 - Bibeli do fee

Inɛ sinte ŋa iyi à too Davidi Sikilagi

¹ Inɛ ŋa iyi à bɔ Sikilagi bi Davidi si waati iyi í saa Saulu amai Kisiu wee. Inɛ ŋau sooge kaasãanɛ ŋai. À bɔ ku sobiɛi si igũu.

² Inɛ ŋau aa yɔkɔ a ta kuta ŋa nɔ a ta afa do bioo ŋa do awɔ canga walakɔ do awɔ njɛ. Dimii Bɛnzamɛɛ ŋai à jɛ, hai si nyaanzei Saulu.

³ Ahiezɛɛi í jɛ inɛ ngbo, do Zoasi aŋa minji amai Semaa inɛi Gibea ŋau, do Yeziɛli do Pelɛti amai Azumavɛti ŋau, do Beraka, do Yehu inɛi Anatɔti,

⁴ do Isemaya inɛi Gabaɔ̃ɔu. Nŋui í jɛ kaasãanɛ ilu wɔɔkɔ si inɔi aŋa kuntaau do si inɛ ngboi wuaai sooge kuntaa ŋau.

⁵ Do Zeremi, do Yahaziɛli, do Yohanaa, do Yozabadi inɛi Gedera ŋau,

⁶ do Eluzai do Yerimɔti, do Bealia, do Semaria, do Sefatia inɛi Harifu ŋau,

⁷ do Elikana do Yisia do Azareɛli do Yoezɛɛ do Yasobeamu inɛi Kore ŋau,

⁸ do Yoela do Zebadia amai Yerohamu inɛi Gedɔɔ ŋau.

⁹ Hai si dimii Gadi ŋa, kaasãanɛ ŋa à dede à bɔ bi Davidi má si inɔ inya ku nɛ gbugbã iyi í wa si gbaau. Sooge ŋai iyi à mà igũ ku ce jiida jiida, nɔ à nɛ tɛli do kaka ŋa. À ya dede laakaii inɛ bɛi muusu nla, nɔ à gbãai bɛi angbãii iri kuta ŋa.

¹⁰ Ezɛɛ inɛ ngbou do Abudiasi minjisiau do Eliabu mɛɛtasia,

¹¹ do Misimana mɛɛsia do Zeremi miiusia,

¹² do Atai mɛɛfasia do Eliɛli mɛɛjesia,

¹³ do Yohanaa mɛɛjɔsia do Elizabadi mɛɛsãsia,

¹⁴ do Zeremi mɛɛwasia, do Makubanai maatakãsia.

¹⁵ Aŋau bɛi à jɛ dimii Gadi ŋa. Nɔ à jɛ inɛ ngboi sooge ŋa. Inɛ akã nŋa iyi í kere í reu á yɔkɔ ku ce igũ do amanɛ cĩɔ. Nɔ inɛ iyi í re ŋau á yɔkɔ ku ba inɛ dubu ku ja.

¹⁶ Andi inɛ ŋa iyi à kua idoi Zuudɛ̃ɛu mbɛ, waati iyi í kɔ̃ hee wa dikã si cukpa sinteu. Nɔ í jɔ̀ inɛi ilu ŋa iyi à wa itĩɛ ŋau fei à sa à nɛ ikpa nunui daakɔ do ikpa nunui alɛ.

¹⁷ Dimii Bɛnzamɛɛ do ti Zudaa ŋa mɔ à koo bi Davidi má, si inɔ inya ku nɛ gbugbãu.

¹⁸ Ŋɔi Davidi í fita í ko ŋa nɔ í ba ŋa ide ku fɔ í ni, bii í jɛ do inɔ akãi ì waa naaò wa bi tom ku ba i naa i sobim ŋa, idɔm á wa si ŋɛ. Amma bii í jɛ ì naa ku lɛlɛm ŋa ku ba mbɛɛm ŋa a tom awɔi, si bɛi n kù cea inɛ kãma laalɔ, Aɔ̃ Lafɛ̃ɛi bala nwa ŋau wa yɔɔ, nɔ á kiiti nwa.

¹⁹ Ŋɔi hundei Ilaaɔ̃ í naa si Amasai inɛ ngboi wuaai sooge kuntaa ŋau nɔ í ni, Davidi, awa wee à wa awɔɛ nɔ à jɛ tɛɛ, awɔ amai Izai. Laakai ku sũ ku jɛ tɛɛ, nɔ ku jɛ ti inɛ ŋa iyi à naa ku sobiɛ, domi Aɔ̃ Lafɛ̃ɛɛ í faabaɛ. Ŋɔi Davidi í gba ŋa nɔ í jilɛ ŋa si inɔi inɛ ngboi sooge ŋau.

²⁰ Inɛi Manasee ŋa mɔ à too Davidi waati iyi aŋaò inɛi Filisi ŋau à tɔtɔɔ à waa bɔ igũ ku ce bi Saulu. Do nŋu fei de kù sobi ŋa, domi iyi inɛ ngboi Filisi ŋau à busi njɛ, ŋɔi à nyaa hai si inɔ nŋa à waa ni, á naa koo sobi lafɛ̃ɛɛ Saului nɔ á kpa wa.

²¹ Waati iyi í nyi Sikilagi, ŋɔi inɛi dimii Manasee ŋa à nyi fitiɛ. Iri nŋa wee. Aduna do Yozabadi do Yediaɛli do Mikaɛli do Yozabadi do Elihu do Silitai, aŋa iyi à jɛ inɛ ngboi sooge dubui Manasee ŋau.

²² Ŋɔi aŋa fei à sobi soogei Davidi ŋau ku ba a kãmia inɛi Amalɛki ŋa iyi à wa ba ŋa ijau, domi aŋa fei kaasãanɛ ŋai nɔ à jɛ inɛ ngboi sooge ŋa.

²³ Nɔ ajɔ do ajɔ inɛ ŋa à ya maa naa ku sobi Davidi hee soogeɛ ŋau à kpɔ bɛi soogei Ilaaɔ̃ ŋa.

Kukpɔi soogei Davidi ŋa iyi à naa Eborɔ̃ɔ

²⁴ Akpɔi woo ja igũ ŋa iyi à bɔ Eborɔ̃ɔ bi Davidi ku ba a gba bommau si Saulu nɔ a na Davidi si bɛi Aɔ̃ Lafɛ̃ɛ í jilɛ nŋau wee.

²⁵ Hai si dimii Zudaa sooge dubu mɛɛfa do cĩɔ mɛɛjɔi í koo (6.800), aŋa fei do tɛli nŋa ŋa do kakai igũ nŋa ŋa.

²⁶ Hai si dimii Simeɔ̃ ŋa, kaasãanɛ ku ja igũ dubu mɛɛje do cĩɔ (7.100).

²⁷ Hai si dimii Levii ŋa, amanɛ dubu mɛɛ do cĩɔ mɛɛfa (4.600).

²⁸ Nɔ Yoyada inɛ ngboi tɔkui Arɔ̃ɔ ŋau í nɛ amanɛ dubu mɛɛta do cĩɔ mɛɛje (3.700).

²⁹ Nɔ Sadɔku awaasũ ilu wɔɔkɔu do nyaanzei baaɛ ŋau à wɛɛ aŋa inɛ ngbo kɔnfia do minji (22).

³⁰ Hai si dimii Bɛnzamɛɛ ŋa, aŋa iyi à jɛ nyaanzei Sauluu, aŋa dubu mɛɛtai (3.000), domi hai tako mɔm wo inɛ mbɔ nŋa ŋa à leekĩò Saului dee dee.

³¹ Hai si dimii Efaraimu ŋa, kaasãanɛ dubu kɔnfia do cĩɔ mɛɛjɔi (20.800) iyi à nya iri si bɛi kpasɛ̃i bala nŋa ŋa à wɛɛ.

³² Hai si dimi bubui Manasee, amanɛ dubu mɛɛwa do mɛɛjɔi (18.000) à cica nɔ à ka ŋa do iri nŋa ŋa a koo a bii Davidi bomma.

³³ Hai si dimii Isakaa ŋa, akawe cĩɔ minjii (200) do inɛ ŋa iyi à waa too ŋa. Inɛ nŋu ŋau à mà mii fei ku wũaa. À ya mà waati iyi á sĩa inɛi Izirɛli ŋau à ce ngɔgɔ do bɛi aa coo.

³⁴ Hai si dimii Zabulɔ̃ɔ inɛ dubu ciitaai (50.000) aŋa iyi à to igũ ku bɔ. À nɛ jĩnɛi igũ fei nɔ à tã sɔɔlu a ce igũ do inɔ akã.

³⁵ Hai si dimii Nɛfitali, inɛ ngbo dubui (1.000) do inɛ dubu kuntaa do mɛɛje (37.000) iyi à nɛ tɛli do kaka.

³⁶ Hai si dimii Dãa ŋa, woo ce igũ dubu kɔnfia do mɛɛjɔ do cĩɔ mɛɛfa (28.600).

³⁷ Hai si dimii Azɛɛ, inɛ ŋa iyi à to a bɔ igũ nɔ à tã sɔɔlu à wɛɛi aŋa dubu ciiji (40.000).

³⁸ Nɔ dimii Rubɛ̃ɛ ŋa do ti Gadi ŋa do dimi bubui Manasee ŋa, aŋa iyi à wa icei Zuudɛ̃ɛu do jĩnɛi igũ nŋa ŋau fei à wɛɛi aŋa dubu cĩɔ do kɔnfia (120.000).

³⁹ Inɛ ŋau bɛ fei, aŋai à jɛ woo ce igũ ŋa nɔ à tã sɔɔlu a ce igũ, à naa Eborɔ̃ɔ do inɔ akã a bii Davidi bomma ku jɛ ilaalu si ilɛi Izirɛli fei. Nɔ inɛi Izirɛli ŋa iyi à gbeu fei à jɛsi Davidi ku jɛ bommau.

⁴⁰ Ŋɔi à ce ajɔ mɛɛta bi Davidi bɛ, aŋaò ŋa à jɛ à mɔ, domi kpaasi nŋa ŋau à ce nŋa sɔnda ŋa.

⁴¹ Nɔ baa inɛ ŋa iyi à wa kɔkɔ nŋa ŋa hee ku koo si dimii Isakaa ŋa do ti Zabulɔ̃ɔ ŋa do ti Nɛfitali ŋa à naaò ijɛ ŋa wa si antaii gbankɛlɛ ŋa do kpookpo ŋa do mulee ŋa do si antaii kɛtɛ ŋa. À naaò iyafũ ŋa wa do kaa ngbɛi isoi figi ŋa do ti rezɛ̃ɛ ŋa, do vɛ̃ɛ, do ikpoi olivi do kɛtɛ ŋa do angudã ŋa do iwo ŋa bututu, domi inɛi Izirɛli ŋau à wa si inɔ didɔ̃.