Bomma 1, 11 - Bibeli do fee

À cica Davidi ilaalu si ilɛi Izirɛli

¹ Ŋɔi inɛi Izirɛli ŋau fei à tɔtɔɔ Eborɔ̃ɔ bi Davidi à sɔ̃ɔ à ni, wee awa mɔ à jɛ dimiɛ ŋa do nyaanzeɛ ŋa.

² Tako wo, waati iyi Saulu wa jɛ ilaalu nwa, awɔi ì ya maa cua soogei inɛi Izirɛli ŋa bii à waa bɔ igũ do bi ku baa. Nɔ Aɔ̃ Lafɛ̃ɛɛ í sɔ̃ɛ í ni awɔi aa maa gbã zamaai nŋu inɛi Izirɛli ŋau nɔ awɔi aa jɛ ilaalu nŋa.

³ Do yaase bɛɛbɛi inɛ ngboi ilɛi Izirɛli ŋau fei à bɔ Eborɔ̃ɔ bi ilaaluu, nɔ í dĩ akabuu aŋaò ŋa si wajui Aɔ̃ Lafɛ̃ɛ. Ŋɔi à tontooa ikpo si iri à cicaɛ ku jɛ ilaalui inɛi Izirɛli ŋa, si bɛi Aɔ̃ Lafɛ̃ɛ í ni Samuɛli ku fɔ takou.

Davidi í gba Zeruzalɛmu

⁴ Davidi do inɛi Izirɛli ŋau fei à bɔ igũ Zeruzalɛmu iyi à ya nyi a kpe Zebusi má. Inɛi Zebusi ŋai à wa si ilɛu.

⁵ Nɔ à sɔ̃ Davidi à ni, i kaa lɔ wa ihɛ̃. Amma Davidi í gba Siɔ̃ɔ ilu ku nɛ gbugbã iyi à na à kpe ilui Davidiu.

⁶ Davidi í sɔ̃ soogeɛ ŋa wo í ni, inɛ iyi í tako í koo si inɛi Zebusi ŋau í kãmia ŋa, lafɛ̃ɛi á jɛ inɛ ngboi sooge ŋau. Ŋɔi Zoabu amai Seruya í koo si ŋa í kãmia ŋa, nɔ í baa í jɛ inɛ ngboi sooge ŋau.

⁷ Ŋɔi Davidi í koo í buba si inya ku nɛ gbugbãi iluu. Na ŋɔi í jɔ̀ à sɔɔ ilui Davidi.

⁸ Ŋɔi Davidi í ma iluu hai Miloo í kaakoɛ fei. Nɔ Zoabu í teese iluu bii í gbe.

⁹ Gbugbãi Davidi í la wa kɔ̃ɔsi nɔ Aɔ̃ Lafɛ̃ɛi lele do ilɛ í wɛɛ do nŋu.

Woo ja igũi Davidi ŋa

¹⁰ Davidi í nɛ inɛ ngboi woo ja igũ ilu wɔɔkɔ ŋa iyi à waa ce icɛ do nŋu. Aŋa do inɛi Izirɛli ŋa feii à sobiɛ si bommau ku dɛdɛ ku ba ku jɛ ilaalu si bɛi Aɔ̃ Lafɛ̃ɛ í fɔ si gãmɛi inɛɛ ŋa.

¹¹ Iri nŋa ŋa wee. Yasobeamu amai Hakumɔnii í jɛ inɛ ngbo si inɔi inɛ mɛɛta ŋa iyi à nya iri. Nŋui í kpa amanɛ cĩɔ mɛɛta (300) do kakaɛ si igũ tuuba akã.

¹² Si anyiɛ Eleazaa amai Dodo tɔkui Ahohi í wa si inɔi inɛ mɛɛta ŋau.

¹³ Nŋui í gbe bi Davidi ilui Pasi-Damɛɛ tengi bii inɛi Filisi ŋau à tɔtɔɔ ku ba a ce igũ. Bɛi ikoi ɔɔzu gɔ í wa. Nɔ soogei Izirɛli ŋau à waa saa inɛi Filisi ŋa.

¹⁴ Ŋɔi Eleazaa do inɛɛ ŋa à koo à leekĩ si anini ikou, nɔ à gbaa hai bi inɛi Filisi ŋau, à jɛ inɛ ŋau igũ. Faaba nla nlai Aɔ̃ Lafɛ̃ɛ í nyisi ŋa ajɔ nŋu bɛ.

¹⁵ Ajɔ nŋu gɔ má, inɛ mɛɛta si inɔi inɛ ngbo kuntaa ŋau à bɔ bi Davidi si inɔ isai kutai Adulamu. Waati nŋu soogei Filisi ŋau à ce asɔ si lɔɔmai Refaimu.

¹⁶ Wee í kò Davidi í wa si inya ku nɛ gbugbãu bɛ nɔ soogei Filisi gɔ ŋa mɔ à ce asɔ nŋa Betelehɛmu.

¹⁷ Ŋɔi Davidi wa ce bɛgɛi Betelehɛmu nɔ í ni, yooi á baam inyii isɔ̃ iyi í wa anu koofai Betelehɛmuu wa n mɔ.

¹⁸ Ŋɔi inɛmɔkɔ ilu wɔɔkɔ mɛɛta ŋau à lɔ si asɔi soogei Filisi ŋau do gbugbã nɔ à koo à kpã inyii isɔ̃ iyi í wa anu koofai Betelehɛmuu wa, nɔ à naa à na Davidi. Amma Davidi í kɔ̀ ku mɔɔ, nɔ í dikãɛ í ceaò Aɔ̃ Lafɛ̃ɛ kuwee.

¹⁹ Nɔ í ni, Ilaaɔ̃ Lafɛ̃ɛm ku maà jɔ̀ n mɔ inyii inɛ ŋa iyi à ta hunde nŋa a koo à kpãaò wa. Inyiu ku mɔɛ á yɛi bɛi ǹ wa n mɔ njɛi inɛ ŋa iyi à koo à kpãa wau. Nɔ í kɔ̀ ku mɔ inyiu. Mii iyi inɛ mɛɛta ŋau à ce mbɛ.

²⁰ Abisai ifɔi Zoabui í jɛ inɛ ngboi inɛ mɛɛta ŋau. Nŋui í kpa amanɛ cĩɔ mɛɛta (300) do kakaɛ nɔ í nya iri bɛi aŋa mɛɛta ŋau.

²¹ Nŋui í jɛ inɛ akãi inɛ iyi í nya iri si inɔi inɛ kuntaa ŋau nɔ nŋui í baa í jɛ inɛ ngbo nŋa. Amma kù wa si inɔi inɛ mɛɛta ŋau.

²² Benaya amai Yehoyada inɛi Kabuseɛli gɔi iyi í nɛ wɔɔkɔ nɔ í nya iri na igũ nkpɔ nkpɔ iyi í jɛ. Nŋui í kpa woo ja igũ nla minjii Moabu ŋau. Nŋui í bɔ hee inɔ lɔgɔ í koo í kpa muusu nla gɔ bɛ sukui tũtũ nla nla gɔ.

²³ Nŋui í kpa inɛi Ezibiti kaasãanɛ gɔ iyi kugbokaɛ í to agbãawɔ miiu, nɔ í nɛ kaka iyi í la bɛi gomboi caacɛ. Benaya í koo si inɛi Ezibitiui do golo, nɔ í gba kakaɛu í sinda í kpaaò.

²⁴ Bɛɛbɛi Benaya amai Yehoyadau í ce, nɔ í nya iri bɛi ilu wɔɔkɔ mɛɛta ŋau.

²⁵ Í nyi í wa si wuaai ilu wɔɔkɔ kuntaa ŋau má, nɔ í nɛ bɛɛrɛ í re inɛ kuntaa ŋau, amma kù to inɛ mɛɛta sinte ŋau. Nɔ Davidi í soo si inɔi ciiku woo degbeɛ ŋa.

²⁶ Irii woo ja igũ ilu wɔɔkɔ gɔ ŋa wee má, Asaɛli ifɔi Zoabu, do Elihanaa amai Dodo inɛi Betelehɛmu,

²⁷ do Samɔti inɛi Haroduu, do Helɛsi inɛi Pɛlɔ̃ɔu,

²⁸ do Ira amai Ikɛsi inɛi Tekoa, do Abiezɛɛ inɛi Anatɔti,

²⁹ do Sibekai inɛi Husa, do Ilai inɛi Ahoa,

³⁰ do Maharai inɛi Netofa, do Helɛdu amai Baana inɛi Netofa,

³¹ do Itai amai Ribai inɛi Gibea si dimii Bɛnzamɛɛ, do Benaya inɛi Piratɔ̃ɔ,

³² do Hurai inɛi Nahale-Gaasi, do Abiɛli inɛi Araba,

³³ do Azimavɛti inɛi Baahumu, do Eliaba inɛi Saalubɔ̃ɔ,

³⁴ do Bene-Hasɛmu inɛi Gizɔ̃ɔ, do Zonatãa amai Sagei inɛi Haraa,

³⁵ do Ahiamu amai Sakaa inɛi Haraa, do Elifali amai Uu,

³⁶ do Hefɛɛ inɛi Mekera, do Ahiya inɛi Palɔ̃ɔ,

³⁷ do Hɛsiro inɛi Kaamɛli, do Naarai amai Ezubai,

³⁸ do Zoɛli ifɔi Natãa, do Mibuhaa amai Hagiri,

³⁹ do Selɛki inɛi Amɔɔ, do Naharai inɛi Berɔti, nŋui iyi í ya maa soa Zoabu amai Seruya jĩnɛi igũɛ ŋa,

⁴⁰ do Ira do Garɛbu inɛi Yetɛɛ ŋau,

⁴¹ do Uri inɛi Hɛti, do Zabadi amai Alai,

⁴² do Adina amai Siza inɛi Rubɛ̃ɛ iyi í jɛ inɛ ngboi dimii Rubɛ̃ɛ ŋa do inɛ ngboi wuaai sooge kuntaaɛ ŋa,

⁴³ do Hanaa amai Maaka, do Zozafati inɛi Mitini,

⁴⁴ do Uzia inɛi Asitarɔti, do Sama do Yehiɛli amai Hotamu inɛi Aroɛɛ ŋau,

⁴⁵ do Yediaɛli amai Simuri, do Yoha ifɔɛ inɛi Tisiti,

⁴⁶ do Eliɛli inɛi Mahavimu, do Yeribai do Yosavia amai Elinaamu ŋa, do Yitima inɛi Moabu,

⁴⁷ do Eliɛli do Obɛdi do Yaasiɛli-Mɛsobaya.