Bomma 1, 10 - Bibeli do fee

Ikui Saulu

¹ Inɛi Filisi ŋa à bɔ igũ si inɛi Izirɛli ŋa si antaii iri kutai Giliboa. Ŋɔi inɛi Izirɛli ŋa à waa sa nɔ à kpa si ŋa inɛ bututu.

² Ŋɔi inɛi Filisi ŋau à waa lele Saulu do amaɛ ŋa nɔ à kpa Zonatãa do Abinadabu do Maliki-Sua amai Saulu ŋau.

³ Nɔ igũu í mante Saulu ntɔ ntɔ nɔ woo ta afa ŋau à taa à mɛɛ nla nla.

⁴ Ŋɔi Saulu í sɔ̃ woo so jĩnɛi igũɛu í ni ku yɔ taakubaɛ wa nɔ ku naa ku kpa nŋu ku ba inɛi Filisi hai bu bango ŋau a maà naa a kpa nŋu a bɛi a maa nyaanyiò. Amma inɛ iyi wa so jĩnɛi igũu í kɔ̀, domi zigiɛ í da ntɔ ntɔ. Nɔ Saulu takaɛ í so taakubau í cuku í sɛɛbata si imɔɛ.

⁵ Si bɛi woo so jĩnɛi igũu í yɛ Saulu í ku, ŋɔi nŋu mɔ í ce bɛɛbɛ nɔ í ku.

⁶ Bɛɛbɛi Saulu do ama inɛmɔkɔ mɛɛtaɛ ŋau à ku ajɔ nŋu bɛ, nɔ kpasɛ̃ɛu fei í kpa iri.

⁷ Ŋɔi inɛi Izirɛli ŋa iyi ide nŋa í wa si lɔɔmau fei à yɛ soogei Izirɛli ŋau à waa sa, nɔ à gbɔ iyi Saulu do amaɛ ŋa à ku. Ŋɔi aŋa fei à sa à jɔ̀ ilu nŋa ŋa, nɔ inɛi Filisi ŋau à naa à buba si.

⁸ Iyi iju í má, ŋɔi inɛi Filisi ŋau à bɔ jĩnɛi iku ŋau ku ko, nɔ à yɛ ikui Saulu do amaɛ ŋa si antaii iri kutai Giliboau.

⁹ Ŋɔi à so jĩnɛi igũɛ ŋau nɔ à bu iriɛ à nɛò. Si anyiɛ nɔ à bɛ inɛ ŋa a koo a sisia inɛ fei laabaau jiidau si ilɛ nŋau fei hee do bi iwɛ̃ nŋa ŋa.

¹⁰ Jĩnɛi igũi Saulu iyi à sou, à koo à dasi inɔ ilei iwɛ̃ nŋa ŋa. Nɔ à kɔa iriɛu mɔ si inɔ ilei iwɛ̃ Dagɔ̃ɔu.

¹¹ Iyi inɛi Yabɛsi-Galaadi ŋau fei à gbɔ bɛi à cea Saulu,

¹² ŋɔi inɛmɔkɔ ilu wɔɔkɔ ŋau fei à dede à koo à so ikui Saulu do ti amaɛ ŋau à baaò wa Yabɛsi. Ŋɔi à na à si kũkũ nŋa ŋau si abɛ jĩi ndii bombom gɔ à bɛi à dĩ anu ajɔ mɛɛje.

¹³ Saulu í kui si na iyi í jɔ̀ kù leekĩ do Aɔ̃ Lafɛ̃ɛ nŋu akã, nɔ kù jirima ideɛ. Í koo í ce kubee hee do bi woo kpe iku ŋa fei.

¹⁴ Kù ce kubeeu bi Aɔ̃ Lafɛ̃ɛ, nɔ Aɔ̃ Lafɛ̃ɛ mɔ í kpaa, nɔ í baaò bommau wa si Davidi amai Izai.