Azee 2 - Bibeli do fee

Bɛɛrɛi kpasɛ̃ titɔ̃u

¹ Si cukpa mɛɛjesiai adɔ̃u, si ajɔ kɔnfia do akãsiaɛi Aɔ̃ Lafɛ̃ɛ í sɔ̃ Azee í ni,

² koo bi Zorobabɛli ilu ilɛi Zudaau do Zozue woo wee nlau hee do inɛ ŋa iyi à gbeu, i bee ŋa i ni,

³ si inɔi inɛ ŋa iyi à wɛɛ si hunde, yooma nŋai í yɛ kpasɛ̃i takou do bɛɛrɛ iyi í nɛ wo. Nsɛi, bɛirei ì waa yɔɔ ŋa. Kù jɛ nŋɛ bɛi mii hai nɛ bɛɛrɛ si waju nŋɛ?

⁴ Na nŋu, nsɛi, amu Aɔ̃ Lafɛ̃ɛi lele do ilɛ ǹ ni, awɔ Zorobabɛli do Zozue do inɛi Zudaa ŋa fei, i mua njɛ gbugbã ŋa nɔ i ce icɛ ŋa domi ǹ wɛɛ do iŋɛ.

⁵ Waati iyi ǹ nya bala nŋɛ ŋa wa hai ilɛi Ezibiti ǹ dĩ akabuu do aŋa. Do yaase bɛɛbɛ, hundem í wɛɛ do iŋɛ, i maà jɔ̀ zigi nŋɛ ku da.

⁶ Ntɔ ntɔ, amu Aɔ̃ Lafɛ̃ɛi lele do ilɛ ǹ ni, kaa kpɛ n yaga lele do ilɛ do tenku ŋa fei.

⁷ An na n yaga dimii ŋau feii nɔ n jɔ̀ a ko amani jiida nŋa ŋa a naaò wa kpasɛ̃m bɛ. Nɔ do yaase bɛɛbɛi an kɔ̃ kpasɛ̃u do bɛɛrɛ. Amu Aɔ̃ Lafɛ̃ɛi lele do ilɛi ǹ fɔ bɛɛbɛ.

⁸ Isɔ fũfũ do wura fei amui ǹ nɔɔ.

⁹ Nsɛi, kpasɛ̃ iyi à teese à mau ihɛ̃, bɛɛrɛɛ á re ti takou, nɔ tengi bɛi an na ŋɛ laakai ku sũ. Amu Aɔ̃ Lafɛ̃ɛi lele do ilɛi ǹ fɔ bɛɛbɛ.

Inɛ ŋau a kù maaju

¹⁰ Si adɔ̃ minjisiai bomma ku jɛi Dariusi, si cukpa mɛɛsãsiaɛ si ajɔ kɔnfia do mɛɛsia, Aɔ̃ Lafɛ̃ɛi lele do ilɛ í ba Azee ide ku fɔ má í ni,

¹¹ bee woo wee ŋau bɛi wooda í ni si ideu ihɛ̃.

¹² Bii inɛ gɔ í so iŋai kuwee í woo si itĩi ibɔ sisɔɛ, nɔ ibɔu í lu pɛ̃ɛ, walakɔ ayɛ gɔ, walakɔ atɛ̃, walakɔ ikpo, walakɔ sɔnda gɔ, mii ŋau bɛ aa baa a má a jɛ ti Aɔ̃ Lafɛ̃ɛ mbɛ? Ŋɔi woo wee ŋau à jɛ à ni, aawo.

¹³ Ŋɔi Azee í bee ŋa má í ni, bii inɛ í jɛ ilu riisi si na iyi í jɔ̀ í lu iku gɔ, nɔ í koo í lu mii ŋau bɛ aŋa mɔ aa baa a jɛ mii riisi ŋai? Nɔ woo wee ŋau à jɛaa à ni, oo mii ŋau bɛ fei à riisi mbɛ.

¹⁴ Ŋɔi Azee í ni má, Aɔ̃ Lafɛ̃ɛ í ni, bɛɛbɛi ì yɛ ŋa iŋɛ do zamaau fei si wajuɛ. Nɔ bɛɛbɛ mɔi icɛ nŋɛ ŋa mɔ fei à yɛ. Kuwee ŋa iyi ì waa cea amu Aɔ̃ Lafɛ̃ɛ ŋa fei mii riisi ŋai.

I jɔ̀ i ce laakai hai nnyi

¹⁵ Nɔ Aɔ̃ Lafɛ̃ɛ í ni má, na nŋu, i jɔ̀ i ce laakai ŋa si mii iyi á na ku ce nnyi do ala fei. Hee i maa lesi kuta si antaii kuta i maò kpasɛ̃m nɔu ŋa,

¹⁶ bii inɛ gɔ í so bilee gũa kɔnfia wa hai inɔ suu fei, gũa mɛɛwai í ya na ku ba si. Bii inɛ í koo í kpã atɛ̃ vɛ̃ɛ liiti ciitaa wa hai si boonyi nla, liiti kɔnfiai í ya na ku ba si.

¹⁷ Ǹ ce nfei icɛ nŋɛ ŋa, ǹ jɔ̀ kutai ijĩ gɔ ŋa à cuku wa hai lele si iko nŋɛ ŋa, nɔ amaajɛ nŋɛ ŋa à gbɛ si icu nŋa. Amma do nŋu fei i kù nyi wa bi tom ŋa amu Aɔ̃ Lafɛ̃ɛ.

¹⁸ Na nŋu, i jɔ̀ i ce laakai ŋa hai nnyi do ala fei si mii iyi á na ku ce, hai ajɔ kɔnfia do mɛɛi cukpa mɛɛsãsiai adɔ̃ bii à jilɛ icui kpasɛ̃u, i jɔ̀ i ce laakai ŋa.

¹⁹ Suu nŋɛ ŋa à nɛ amaajɛ má? Aawo. Baa jĩi ndii rezɛ̃ɛ nŋɛ ŋa do jĩi ndii figi nŋɛ ŋa do jĩi ndii gerenadi nŋɛ ŋa do jĩi ndii olivi nŋɛ ŋa a kù so. Amma hai nnyi amu Aɔ̃ Lafɛ̃ɛ an wee nŋɛ.

Kuwã ŋa iyi Aɔ̃ Lafɛ̃ɛ í cea Zorobabɛli

²⁰ Si ajɔ kɔnfia do mɛɛi cukpau Aɔ̃ Lafɛ̃ɛ í ba Azee ide ku fɔ isɛ gbeejisia má í ni,

²¹ sɔ̃ Zorobabɛli ilu ilɛi Zudaau í ni, amu Aɔ̃ Lafɛ̃ɛi lele do ilɛ ǹ ni an yaga lele do ilɛ.

²² An kɛkɛ bommai ilaalu ŋa nɔ an ce nfei gbugbã nŋa. An kɛkɛ sarɛti ku ce igũ ŋa do inɛ ŋa iyi à wa si inɔɛ ŋa. Nɔ acĩ ŋau do inɛ ŋa iyi à waa gũ ŋa ŋau aa cukui. Nɔ akã akã do taakubai aa kpaò njɛ.

²³ Ajɔ nŋu bɛ, awɔ woo ce icɛm Zorobabɛli amai Seatiɛli, an soɛ i jɛ bɛi sɛɛda domi awɔi ǹ cica. Mii iyi an ce mbɛ amu Aɔ̃ Lafɛ̃ɛi lele do ilɛ.