Azee 1 - Bibeli do fee

Awaatii kpasɛ̃i Ilaaɔ̃ ku teese ku ma

¹ Si adɔ̃ minjisiai bomma ku jɛi Dariusi, cukpa mɛɛfasia si ajɔ sinteɛ, Aɔ̃ Lafɛ̃ɛ í jɔ̀ walii Azee í ba Zorobabɛli ilu ilɛi Zudaa, do Zozue woo wee nlau ide ku fɔ. Zorobabɛliui í jɛ amai Seatiɛli, nɔ Zozueu mɔ í jɛ amai Yosadaki.

^2-3 Í sɔ̃ ŋa í ni, Aɔ̃ Lafɛ̃ɛi lele do ilɛ í ni, iŋɛ inɛi Izirɛli ŋa ì waa ni ŋa awaatii kpasɛ̃i amu Aɔ̃ Lafɛ̃ɛ ku teese ku ma kù to titã.

⁴ Í sĩa nŋɛ si i wa si kpasɛ̃ jiida ŋa iyi à ce si booda, nɔ kpasɛ̃m ku yɛ bɛi bomma?

⁵ Na ŋɔi í ce nsɛi, amu Aɔ̃ Lafɛ̃ɛi lele do ilɛ ǹ ni i lasabu ŋa do yaasei kuce nŋɛ.

⁶ Wee ì waa gbɛ̃ amaajɛ nla nla ŋa, nɔ keekei ì waa da ŋa, ì waa jɛ ŋa amma i kù waa yo ŋa, ì waa mɔ ŋa, amma kumɔ nŋɛu kù waa nya ŋɛ agbɛ, ì waa dasi jĩnɛ ŋa amma kù waa nya nŋɛ tũtũ. Bii ì gba fiai kusã nŋɛ ŋa í ya nɛi bɛi mii iyi si ziba ku lui ì dasi ŋa.

⁷ Na nŋu, amu Aɔ̃ Lafɛ̃ɛi lele do ilɛ ǹ sisi ǹ wa n fɔ má n ni, i lasabu ŋa si yaasei isɛɛnɛ nŋɛ.

⁸ I dede i bɔ iri kuta ihɔ̃ i dɛdɛ jĩi wa i na i teese i ma kpasɛ̃m nɔu ŋa, an nɛ si inɔ didɔ̃ nɔ inɛ ŋa aa mà bɛɛrɛm. Amu Aɔ̃ Lafɛ̃ɛi ǹ fɔ bɛɛbɛ.

⁹ Ì waa tamaa mà aa ba amaajɛ nkpɔ nkpɔ wa hai si iko nŋɛ ŋa. Amma wee keeke iyi ì ba ì baaò wa kpasɛ̃u ŋa, ǹ fufuɛ ǹ fangaaɛ. Na mii í jɔ̀ ǹ ce bɛɛbɛ amu Aɔ̃ Lafɛ̃ɛi lele do ilɛ. Ǹ ce bɛɛbɛi si na iyi í jɔ̀ ì jɔ̀ kpasɛ̃m í kpɔò bomma ŋa. Nɔ inɛ baa yooma nŋɛ fei wa saasa ku ma kpasɛ̃ɛ.

¹⁰ Na ŋɔi í ce ijĩ kù tontoo wa hai lele nɔ nkãma kù ce ncɛɛ.

¹¹ Ǹ jɔ̀ agbɛ í ce si ilɛu hee do si iri kuta ŋa fei, nɔ hai bilee do jĩi ndii rezɛ̃ɛ do isoi jĩi ndii olivi ŋau fei à gbɛ hee ku koo si mii mmu ŋa iyi à fita si ilɛ fei. Amanɛ do mɛɛmu ŋa fei à wahala ntɔ ntɔ nɔ icɛ iyi ì ce ŋa í ce nfe.

¹² Ŋɔi Zorobabɛli amai Seatiɛli do Zozue woo wee nlau hee do inɛ ŋa iyi à gbe fei à jirima idei Aɔ̃ Lafɛ̃ɛ nŋa bɛi Azee waliiu í fɔ wo. Do yaase bɛi Aɔ̃ Lafɛ̃ɛ í sɔ̃ Azee ideu í ni ku sɔ̃ ŋau bɛɛbɛi í sɔ̃ ŋa bɛ fei. Ŋɔi zigi nŋa í da si wajui Aɔ̃ Lafɛ̃ɛ.

¹³ Azee woo bɛi Aɔ̃ Lafɛ̃ɛu í sɔ̃ ŋa ide iyi Aɔ̃ Lafɛ̃ɛ í sɔ̃ɔu í ni, Aɔ̃ Lafɛ̃ɛ í wɛɛ do iŋɛ.

¹⁴ Ŋɔi Aɔ̃ Lafɛ̃ɛ í jĩ Zorobabɛli ilu ilɛu do Zozue woo wee nlau do inɛ ŋa iyi à gbeu si iri njoo, nɔ à naa à sinti icɛi kpasɛ̃i Aɔ̃ Lafɛ̃ɛi lele do ilɛ,

¹⁵ si ajɔ kɔnfia do mɛɛsiai cukpa mɛɛfasia, si adɔ̃ minjisiai bomma ku jɛi Dariusi.