Amɔsu 9 - Bibeli do fee

Kuyɛ miiusia

¹ Ǹ yɛ Aɔ̃ Lafɛ̃ɛ wa leekĩ si wajui bi kuweeu nɔ í ni, a cã antaii sɔbei kpasɛ̃i Ilaaɔ̃u, nɔ icu ŋau a yaga. Nɔ a lɛgɛ ŋa a cuku wa si irii inɛ ŋau fei. Inɛ ŋa iyi à gbe an ce nfe nŋai do taakuba. Si inɔ nŋa inɛ kãma kaa ba ku sa. Baa inɛ akã kaa ba ku fita si.

² Bii à sa à bɔ bi kuwai iku ŋa an nya ŋa wa do awɔm. Bii à gũ lelei Aɔ̃ an kita ŋa wa.

³ Bii à koo à manji si iri kutai Kaamɛli, an koo n dɛdɛ ŋa n mu ŋa wa, bii à manjiim nɔ à lɔ lɛlɛi tenku, an na njoi tenkuu kpãa ku ŋɔ ŋa.

⁴ Bii mbɛɛ nŋa ŋa à mu ŋa bɛi aru à nɛò ŋa, an jɔ̀ taakuba ku ce nfe nŋa. Ijum á maa wa si ŋai ku ba n ce nŋa laalɔ, ku maà jɛ na n ce nŋa jiida.

⁵ Nɔ Amɔsu í ni má, waati iyi Aɔ̃ Lafɛ̃ɛi lele do ilɛ í lu ilɛ, ilɛu í ya yayai, nɔ inɛɛ ŋa fei à ya wa si inɔ kufɔi ikui. Ilɛu í ya dedei fei mam mam bɛi idoi Nili iyi í wa Ezibitiu, nɔ í ya na ku kayei bɛi inyii idou.

⁶ Inɛ iyi í ce kpasɛ̃ɛ lelei Aɔ̃ nɔ í bii ilɛ wa bɛi antaii ile nɔ í ya tɔtɔɔ inyii tenku ŋa nɔ ku nikã ŋa si ilɛ fei, iriɛi í jɛ Aɔ̃ Lafɛ̃ɛ.

Kiitii ilu taale ŋa

⁷ Ŋɔi Aɔ̃ Lafɛ̃ɛi lele do ilɛ í ni, iŋɛ inɛi Izirɛli ŋa ì re inɛi Etiopi ŋau ŋai? Bɛi ǹ nya inɛi Izirɛli ŋau wa hai ilɛi Ezibiti, bɛɛbɛi ǹ nya inɛi Filisi ŋa wa hai Kafitɔɔ, nɔ bɛɛbɛi mɔi ǹ nya inɛi Siri ŋa wa hai Kii.

⁸ Aɔ̃ Lafɛ̃ɛ wa kã ijuɛ ŋa si bomma ilu taaleu nɔ wa ni, an ce nfeɛi, amma do nŋu fei, n kaa n kpa irii hee do kpasɛ̃i Zakɔbu fei mam mam. Amu Aɔ̃ Lafɛ̃ɛi ǹ fɔ bɛɛbɛ.

⁹ An na wooda n jɔ̀ a yaga inɛi Izirɛli ŋa si ilɛ bii à wa fei bɛi à ya tɛmɛ sãa nɔ kuta kãma ci ya cuku ilɛ.

¹⁰ Ilu dulum dii inɛm ŋau fei aa kui do taakuba. Aŋai à ya maa ni, i kaa jɔ̀ laalɔu ku maai wa, nɔ i kaa jɔ̀ ku to wa si wa.

Bommai Davidi ku teese

¹¹ Waati wa naa si bii an teese n ma kusui Davidi iyi í cukuu, nɔ n dĩ fooɛ ŋau. An teese bommaɛ, nɔ n máa bɛi í tako í yɛ wo.

¹² Nɔ aa yɔkɔ a lɔ si ilɛi Edɔmu iyi í gbeu do si ilɛ mmu bii à waa kpe irim wo, amu Aɔ̃ Lafɛ̃ɛi ǹ fɔ bɛɛbɛ, amui an ce iyi bɛ fei.

¹³ Aɔ̃ Lafɛ̃ɛ í ni má, waati wa naa iyi bii à da amaajɛ ŋa kaa kpɛ má a maa fa ilɛ. Nɔ waati wa naa má iyi bii à gbɛ̃ bilee kaa kpɛ a maa fɔ̃ inyii rezɛ̃ɛ. Waati bɛɛbɛ, vɛ̃ɛ titɔ̃ á maa cãi si geete ŋa hee ku mi iri kuta ŋa.

¹⁴ An baaò inɛi Izirɛli inɛm ŋa iyi à mu ŋau wa, nɔ aa teese a ma ilu nla ŋa iyi à lɛgɛu. Bɛi aa wa, nɔ aa lɔ jĩi ndii rezɛ̃ɛ ŋa nɔ aa mɔ vɛ̃ɛ, aa ce lambo ŋa nɔ aa jɛ isoɛ.

¹⁵ An lɔ ŋai si ilɛ nŋa iyi ǹ na ŋau, nɔ si ilɛ nŋau, a kaa nya ŋa má. Amu Aɔ̃ Lafɛ̃ɛ nŋɛi ǹ fɔ bɛɛbɛ.