Amɔsu 8 - Bibeli do fee

Kuyɛ mɛɛsia - kɔlɔi isoi jĩi

¹ Kuyɛ iyi Aɔ̃ Lafɛ̃ɛ í jɔ̀ ǹ ce wee má. Ǹ yɛ kɔlɔi isoi jĩi ŋa iyi à jĩa.

² Í beem í ni, mii ì yɛ Amɔsu. Ŋɔi ǹ jɛ ǹ ni, kɔlɔi isoi jĩi ŋa iyi à jĩa. Nɔ Aɔ̃ Lafɛ̃ɛ í sɔ̃m í ni, kɔɔi kuwɛɛi inɛi Izirɛli ŋai í to bɛ. N kaa n ce ŋa suuru kãma má.

³ Amu Aɔ̃ Lafɛ̃ɛ ǹ ni, ajɔ nŋu bɛ, iri ŋa iyi aa maa kɔ̃ si kabai ilaalu fei, irii inɔ kufɔ ŋai á jɛ. Bii fei iku ŋai aa maa nyɔ. Nɔ ilu á maa cokoi.

Kɔdɛɛi woo nya sĩa ŋa

⁴ I sotĩ i gbɔ ŋa, iŋɛ iyi ì ya maa tɛɛsɛ ilu are ŋa nɔ ì ya maa nya inɛ dee dee ŋa hai si iluu ŋa.

⁵ Iŋɛ iyi ì waa ni, waati yoomai cukpa titɔ̃ á lɔ ka bɛi ka naaò amaajɛ nwa ŋa ku ta wa. Waati yoomai ajɔi kusĩmi á lɔ ka bɛi ka cĩ suu nwa ŋa. Aa ka kaye gũai nɔ ka kɔ̃ɔsi fia. Aa ka fɔtɔtɔi kilooi ka zambaò inɛ ŋa.

⁶ Aa ka ra ilu are ŋai do fia, nɔ ka ra ŋa má do baata isɛ akã. Baa riisii bileeu aa ka taai.

⁷ Aɔ̃ Lafɛ̃ɛ iyi inɛi Izirɛli ŋa à waa tɔɔ í fɔ do kugbasi í ni, n kaa n gbɛjɛ kuce nŋa ŋa baa akã.

⁸ Na nŋui ilɛu á yaya, nɔ inɛɛ ŋau fei aa wa si inɔ kufɔi iku. Ilɛu á dedei fei mam mam bɛi idoi Nili iyi í wa Ezibiti, nɔ á na ku kayei bɛi inyii idou.

⁹ Aɔ̃ Lafɛ̃ɛ í ni, ajɔ nŋu bɛ an jɔ̀ inunu ku lɔ dasã mam mam. Dasãu ilu kukui á ce si ilɛu fei.

¹⁰ An kpaasi jingau nŋɛ ŋaui do inɔ kufɔ, nɔ iri ku kɔ̃ nŋɛ ŋa mɔ do kukpata. Jĩnɛi inɔ kufɔi inɛ fei á dasi. Nɔ inɛ fei á gbogoo iriɛi na inɔ kufɔ. Inɔ kufɔi ikui á naa si ilɛu fei bɛi ti ajɔi ikui ama akã, nɔ mii fei á kpa irii do inɔ kufɔ nla nla.

¹¹ Aɔ̃ Lafɛ̃ɛ í ni, ajɔ ŋa wee à waa naa bii an jɔ̀ ari ku naa si ilɛu. Ariu kaa jɛ ti sɔnda ku kua nɔ agbɛu mɔ kaa jɛ ti inyi ku kua. Amma ari do agbɛi idei Aɔ̃ Lafɛ̃ɛi aa maa gbɔ.

¹² Aa jɛ inɛ ŋa iyi à nyɔi hai awɔ cangai kpãai inunu do nunui alɛ, hai awɔ njɛi kpãai inunu do nunui daakɔ. Aa maa dɛdɛ idei Aɔ̃ Lafɛ̃ɛi amma a kaa baa.

¹³ Ajɔ nŋu bɛ, baa awaasũ kusĩa ŋa do mudɛ̃ɛ kusĩa ŋa aa maa kasãm nii do agbɛ.

¹⁴ Aŋa iyi à waa ce kugbasi do irii iwɛ̃i Samari ŋa nɔ naanɛ nŋa í wa si iwɛ̃i inɛi Dãa ŋa do iwɛ̃i inɛi Bɛɛseba ŋau à waa ceò iro nŋa, aŋa fei aa cukui nɔ a kaa dede má.