Amɔsu 7 - Bibeli do fee

Kuyɛ sintei Amɔsu - kɛtɛngbo ŋa

¹ Mii iyi Aɔ̃ Lafɛ̃ɛ í jɔ̀ ǹ yɛ wee. Í tɔtɔɔ kɛtɛngbo ŋa nkpɔ nkpɔ waati iyi fɔfɔ í sinti ku la wa. Si anyii iyi ilaalu í bu fɔfɔ sinte ti mɛɛmuɛ ŋa, ŋɔi fɔfɔ í nyi wa la wa má.

² Si bɛi kɛtɛngbo ŋau à tɛ à waa ŋɔ fɔfɔu fei, ŋɔi ǹ ni, Aɔ̃ Lafɛ̃ɛ, í gbe i ce suuru. Bii kù jɛ bɛɛbɛ, bɛirei dimii Zakɔbu á na ku yɛ, nŋu iyi í kere.

³ Ŋɔi Aɔ̃ Lafɛ̃ɛ í kpaasi idɔ nɔ í ni, inɛ bɛ kaa ce má.

Kuyɛ minjisia - ina

⁴ Mii iyi Aɔ̃ Lafɛ̃ɛ í jɔ̀ ǹ yɛ má wee. Í ni nŋu á kpã inɛ ŋa ijui do ina. Ŋɔi inau í naa nɔ í jo ilɛi inɛi Izirɛli ŋa nɔ inyii lɛlɛi ilɛ nŋau fei í gbɛ.

⁵ Ŋɔi ǹ ni, Aɔ̃ Lafɛ̃ɛ, leekĩ iyi bɛ. Bii kù jɛ bɛɛbɛ, bɛirei dimii Zakɔbuu á na ku yɛ, nŋu iyi í kere.

⁶ Ŋɔi Aɔ̃ Lafɛ̃ɛ í kpaasi idɔ nɔ í ni, inɛ bɛ mɔ kaa ce má.

Kuyɛ mɛɛtasia - Ilaaɔ̃ á cɔ inɛi Izirɛli ŋa

⁷ Kuyɛ mɛɛtasia iyi ǹ ceò wee. Ǹ yɛ Aɔ̃ Lafɛ̃ɛ wa leekĩ kɔkɔi idĩ nɔ si awɔɛ wa mu mii iyi à ya cɔò anu ku mungai ngɔgɔ.

⁸ Nɔ í beem í ni, mii ì waa yɛ Amɔsu. Nɔ ǹ jɛa ǹ ni, mii iyi à ya cɔò anu ku mungai ngɔgɔ. Nɔ í sɔ̃m í ni, do mii nɔu bɛi an cɔò inɛi Izirɛli ŋa mà à tɛ. N kaa n ce nŋa suuru má.

⁹ An jɔ̀ bi ku ce kuweei tɔkui Izaaki ŋa ku lɛgɛ. An jɔ̀ ile bii inɛi Izirɛli ŋa à ya ce kutɔɔu ku cuku. Nɔ do taakubai an ceò nfei kpasɛ̃i ilaalu Zeroboamu.

À lele Amɔsu hai Betɛli

¹⁰ Ŋɔi Amasia woo weei Betɛliu í ni a koo a sɔ̃ Zeroboamu ilaalui Izirɛliu a ni, Amɔsu wa ce bɛi á ce ku kɛkɛ bommaɛ domi ide ŋa iyi wa fɔu, inɛi Izirɛli ŋau a kaa yɔkɔ a so asoɛ.

¹¹ Si ide ku fɔɛ ŋau wa ni, Zeroboamu á kui do taakuba nɔ aa mu inɛi Izirɛli ŋai hai si ilɛ nŋa a nɛò ŋa jĩijĩ.

¹² Ŋɔi Amasia í sɔ̃ Amɔsu í ni, woo yɛ, nɛ, bɔ ikpa ilɛi Zudaa. Bɛ aa yɔkɔ i maa jɛ kuwɛɛɛ nɔ i maa mɔsi walii ku ceɛ.

¹³ Amma maà mɔsi walii ku ceɛ Betɛli ihɛ̃ má, domi bi kuweei ilaalui nɔ kpasɛ̃u ti ilaalui.

¹⁴ Ŋɔi Amɔsu í jɛa Amasia í ni, n kù jɛ walii, n kù nɔ n kù jɛ amai woo ce walii, amma amu woo sɛ̃ angudã ŋai nɔ ǹ ya n ce ikoi jĩi ndii sikomɔɔ má.

¹⁵ Aɔ̃ Lafɛ̃ɛ í som nii hai si anyii mɛɛmu gaa ŋa, nɔ í sɔ̃m í ni, koo ce walii si Izirɛli inɛm ŋa.

¹⁶ Nsɛi sotĩ i gbɔ idei Aɔ̃ Lafɛ̃ɛ, awɔ iyi ì ni, maà ce walii si inɛi Izirɛli ŋa, maà ce ide nkpɔ si kpasɛ̃i Izaaki.

¹⁷ Na nŋu, mii iyi Aɔ̃ Lafɛ̃ɛ í ni a baɛ wee. Aboɛ sakarai á maa ce si inɔ iluu, ama inɛmɔkɔ do ama inaaboɛ ŋa, aa kpa ŋai do taakuba, ilɛɛ aa kpɛ̃a inɛ ŋai do ikũ, nɔ awɔ takaɛ aa kui si ilɛ ku riisi, nɔ aa mu inɛi Izirɛli ŋai hai si ilɛ nŋa a nɛò ŋa hee jĩijĩ.