Amɔsu 6 - Bibeli do fee

Laakai ku sũ ibo

¹ Iŋɛ ilu inɔ kufɔ ŋai iŋɛ iyi ì wa Siɔ̃ɔ do laakai ku sũ ŋa, do iŋɛ mɔ iyi ì wɛɛò laakai ku sũ si iri kutai Samari, iŋɛ iyi ì jɛ inɛ nla ŋa, nɔ ilɛ nŋɛi wa jɛ iri si ilɛ ŋa, iŋɛ iyi inɛi Izirɛli ŋau à waa naa bi tu ŋɛ.

² I sɔ̃ inɛ nŋɛ ŋa i ni a bɔ Kaline a cɔ, nɔ hai bɛ a bɔ hee Amati ilu nlau nɔ a bɔ Gati ilui inɛi Filisi ŋau. Nɔ i bee ŋa ŋa i ni, ilu ŋau bɛ à nɛ baaka à re bomma minji nwa ŋaui? Ilɛ nŋa í la í re tu wai?

³ Iŋɛ ilu inɔ kufɔ ŋai. I kù bi ajɔi ijuukpãu ku to wa ŋa. Amma iŋɛi aa jɔ̀ ilu inɔ kukã ŋa a na a gba ilɛ nŋɛ.

⁴ Ì ya koo i maa sũ si daayi nŋɛ ŋa iyi à ce si booda do inyíi jua. Ì ya maa ŋɔ angudã do ama kɛtɛ ku nɛ ikpo ŋa.

⁵ Ì ya bi iri ku kɔ̃ ŋai do mɔɔlɔ bɛi Davidi, nɔ ì ya ce jĩnɛi iri ku kɔ̃ titɔ̃ ŋa.

⁶ Ì ya maa mɔ atɛ̃ vɛ̃ɛ do kɔɔfu nla ŋa nɔ ì ya maa jɔ ikpo ku dɔ̃ inunu ŋa, amma nfe ku cei kpasɛ̃i Zozɛfu kù waa bitandi ŋɛ.

⁷ Na nŋu, iŋɛi aa jɛ inɛ sinte ŋa iyi aa mu a nɛò, nɔ jingaui ilu ika ŋau fei ku kpa iri.

Nfe ku cei Samari

⁸ Amu Aɔ̃ Lafɛ̃ɛi lele do ilɛ ǹ fɔɔi si kuwɛɛm do kugbasi ǹ ni, faaui inɛi Zakɔbu ŋa wa fɔ inɔm nɔ ǹ cé kabai bomma ku nɛ gbugbãɛ ŋa. Na nŋu, ilu nla nŋa do mii iyi í wa si fei, an daa mbɛɛ nŋa ŋa si awɔi.

⁹ Nɔ bii si kpasɛ̃ gɔ amanɛ mɛɛwa í gbe, aa kui.

¹⁰ Bii inɛ iyi inɛɛ ŋa à kuu wa nya iku ŋau wa fitaò wa hai kpasɛ̃ bɛ, nɔ hee kɔkɔlɛ inɛ gɔ í kɔ̀ í wɛɛ njaawɛ, bii à beeɛ à ni, inɛ gɔ í wa bɛ má do awɔ? Á jɛi ku ni, aawo. Inɛ ihɔ̃ á ni, coko, domi kù jɛ awaati iyi aa kpe irii Aɔ̃ Lafɛ̃ɛ ihɛ̃.

¹¹ Na nŋu, i ce laakai ŋa, domi Aɔ̃ Lafɛ̃ɛ á na wooda ku jɔ̀ kpasɛ̃ nla ŋa a kpɔò bomma nɔ kpasɛ̃ keeke ŋa mɔ a lɛgɛ a ce kumbulu.

Igũ ku jɛ minji iyi kaa bukaata

¹² Acĩ ŋa aa sɛi si kuta ba. À ya fa ilɛ do kɛtɛ ŋa si iri kuta ba. To, na mii í ce ì waa kpaasi ntɔ ku jɛ bɛi acĩ ŋa, nɔ dee dee ku jɛ mɔ ku baa ku jɛ bɛi mii kuro gɔ.

¹³ Inɔ didɔ̃i igũ iyi ì jɛ si ilui Lo-Dabaai ì waa kpɛ̃ ŋa. Nɔ ì fɔ ì waa ni ŋa, na saabui gbugbã nwai à kãmiaò ilui Kanaimu.

¹⁴ Na nŋu, mii iyi amu Aɔ̃ Lafɛ̃ɛi lele do ilɛ an ce si iŋɛ inɛi Izirɛli ŋa wee. An jɔ̀ dimi gɔ ku kãmia ŋɛ wai hai Lebo-Amati ikpa awɔ njɛi kpãai inunu hee ku bɔ si acãi inyii Araba do ikpa awɔ cangai kpãai inunuu.