Amɔsu 5 - Bibeli do fee

Kukpata na irii inɛi Izirɛli ŋa

¹ Amɔsu í ni, iŋɛ inɛi Izirɛli ŋa i de itĩ i gbɔ irii akũ iyi ǹ wa n kɔ̃ na iri nŋɛ.

² Izirɛli iyi í jɛ bɛi mudɛ̃ɛ, í cuku nɔ kaa dede má. Wa sũ ilɛi ideɛ nɔ inɛ gɔ kù dedeɛ.

³ Aɔ̃ Lafɛ̃ɛ í ni, bii à nya amanɛ dubu (1.000) í bɔ igũ hai si ilu nŋɛ, amanɛ cĩɔi á baa, nɔ bii amanɛ cĩɔ í bɔ igũ, amanɛ mɛɛwai á baa si inɔi iŋɛ inɛi Izirɛli ŋa.

I dɛdɛ Aɔ̃ Lafɛ̃ɛ ku ba i wɛɛ ŋa

⁴ Aɔ̃ Lafɛ̃ɛ wa ba inɛi Izirɛli ŋa ide ku fɔ í ni, i dɛdɛɛm ŋa ku ba i wɛɛ ŋa.

⁵ I maà bɔ ku dɛdɛɛm Betɛli ŋa walakɔ Giligali, nɔ i maà bɔ ku tɔɔm Bɛɛseba ŋa, domi aa na a mu inɛi Giligali ŋa a nɛò ŋa nɔ a ce nfei ilui Betɛli.

⁶ Amɔsu í ni, i dɛdɛ Aɔ̃ Lafɛ̃ɛ, ku ba i wɛɛ ŋa. I ce njo ku ba ku maà na ku ce nfei kpasɛ̃i Zozɛfu bɛi ina nɔ inɛ kãma kù wa Betɛli ku ba ku kpaa.

⁷ Iŋɛi ì ya maa kpaasi ntɔ ibo ŋa nɔ ì ya maa tɛɛsɛ wooda ŋa.

⁸ Aɔ̃ Lafɛ̃ɛ í ce leleaɔ̃ ikã ikã nɔ í jilɛ aŋa fei si inya ikã ikã. Í ya kpaasi ilu kuku ku baa ku jɛ inya kumái daakɔ. Í ya jɔ̀ dasã ku kpɔò idũ, nɔ í ya tɔtɔɔ inyii tenku ŋa nɔ ku nikã ŋa si ilɛ fei. Iriɛi í jɛ Aɔ̃ Lafɛ̃ɛ.

⁹ Í ya jɔ̀ a mu ilu gbugbã a kpaa nɔ a bɛjɛ ilu ku nɛ gbugbãɛ.

¹⁰ Iŋɛ inɛi Izirɛli ŋa ì cé ntɔ ŋai, nɔ bi ku ce kiiti, i ci ya bi woo fɔɛ ŋa.

¹¹ Wee ì taa ilu are ŋa gbugbã ì gba amaajɛ nŋa ŋa, ì koo ì maò kpasɛ̃ ilu bɛɛrɛ ŋa. Amma i kaa lɔ kpasɛ̃ ŋau ŋa. Ì lɔ jĩi ndii rezɛ̃ɛ ŋa amma i kaa ba baa vɛ̃ɛ nŋa ŋa i mɔ ŋa.

¹² Ntɔ ntɔ, ǹ mà iyi kurara nŋɛ í la nɔ dulum du ŋɛ mɔ í caa, domi ì ya kɔ̀ inɛ dee dee ŋa ntɔ na amua ŋa iyi ì ya gba hai bi inɛ laalɔ ŋa. Nɔ bi ku ce kiiti ŋa ì ya kɔ̀ ilu are ŋa mɔ ntɔ.

¹³ Na ŋɔi í ce si waati dimi bɛɛbɛ ilu bisi í ya maa cokoi, domi waati gɔi iyi í gaabu.

¹⁴ I jɔ̀ i dɛdɛ jiida ku ce ŋa, ku maà ti ku jɛ laalɔ, ku ba i maa wɛɛ ŋa, nɔ Aɔ̃ Lafɛ̃ɛi lele do ilɛ á wɛɛ do iŋɛ bɛi ì ya fɔɔ ŋau.

¹⁵ I cé laalɔ ŋa nɔ i bi jiida ŋa, i jɔ̀ dee dee ku jɛ ku jɛ bomma bi ku ce kiiti nŋɛ ŋa. Á yɔkɔ ku jɛ do yaase bɛɛbɛ Aɔ̃ Lafɛ̃ɛi lele do ilɛ á ce araarei inɛi kpasɛ̃i Zozɛfu ŋa iyi à gbe.

¹⁶ Aɔ̃ Lafɛ̃ɛi lele do ilɛ í ni, si bantuma ŋa, aa maa gbɔ kukpatai inɛ ŋai. Si kpãa ŋa inɛ ŋa aa maa dɔ̃ anu a maa ni, irei ì gbɔ inɔ kufɔ, aa kpe woo ce icɛi iko ŋa bii iku í ceu do inɛ ŋa iyi à mà irii akũ ku kɔ̃.

¹⁷ Si ikoi jĩi ndii rezɛ̃ɛ nŋɛ ŋa, waati iyi ǹ na ǹ wa n lɔ anini nŋɛ, inɛ ŋa aa maa kpatai. Amu Aɔ̃ Lafɛ̃ɛi ǹ fɔ bɛɛbɛ.

Ajɔi Aɔ̃ Lafɛ̃ɛ

¹⁸ Inɔ kufɔi á jɛ ti inɛ ŋa iyi à waa bi ajɔi Aɔ̃ Lafɛ̃ɛ ku yɛ. Na mii í ce ì waa degbe ajɔi Aɔ̃ Lafɛ̃ɛ do saasa ŋa. Ajɔ nŋu ilu kuku nla nlai á ce nɔ inya kumá kaa wɛɛ.

¹⁹ Á yɛi bɛi mɔkɔ gɔ iyi wa saa muusu nla nɔ i koo i kò muãa. Iyi í to kpasɛ̃, ŋɔi í tɛ̀ awɔ si idĩi ileɛ nɔ njo wukuku í ŋɔɔ.

²⁰ Ajɔi Aɔ̃ Lafɛ̃ɛu inya kumái á jɛ? Aawo, ilu kukui á jɛ. Ilu kukui á jɛ, inya kumá kaa wa bɛ.

Kutɔɔ iyi Ilaaɔ̃ í cé

²¹ Ǹ cé jingau nŋɛ ŋa iyi ì waa jɛ na irim ŋa nɔ n kù saalu ŋa, n kù bi inunui tuaei buki nŋɛ ŋa ku gbɔ.

²² Waati iyi ì naa ì waa ceem kuwee ŋa iyi à ya jo si ina fei sãa sãa do kuweei iyafũ wa ŋa, n kaa n nɛ si inɔ didɔ̃ kãma, nɔ baa do kuweei anu akã iyi ì ce do mɛɛmu ku nɛ ikpo ŋa fei n kaa n cɔɔ mɔm.

²³ I jɔ̀ ibai iri ku kɔ̃ nŋɛ ŋa ku jĩim n kù bi imui mɔɔlɔ nŋɛ ŋa ku gbɔ.

²⁴ Amma i jɔ̀ ntɔ ku wɛɛ nŋɛ bɛi acãi inyi iyi ci ya da, nɔ dee dee ku jɛ nŋɛ mɔ ku jɛ bɛi acãi inyi hai nɛ kɔɔ.

²⁵ Iŋɛ inɛi Izirɛli ŋa waati iyi ì ce adɔ̃ ciiji si gbaau ŋa, ì ceem kuwee ikã ikã walakɔ amua ŋa?

²⁶ Amma nsɛi ì ce iwɛ̃ Sakutu nɔ ì waa cɔɔ bɛi ilaalu nŋɛ. Ì ce Kiyonu mɔ ŋa iyi ì waa cɔ bɛi leleaɔ̃ nŋɛ. Nɔ aŋai ì waa tɔɔ ŋa.

²⁷ Na nŋu, an jɔ̀ a mu ŋɛ aru a nɛò ŋɛ i jĩò Damasi ŋa. Amu iyi irim í jɛ Aɔ̃ Lafɛ̃ɛi lele do ilɛi ǹ fɔ bɛɛbɛ.