Amɔsu 4 - Bibeli do fee

¹ Nɔ Amɔsu í ni má, iŋɛ inaaboi Samari ŋa, iŋɛ iyi ì yɛ bɛi kɛtɛ abo ŋa iyi à jɛ à ce kaato ŋa, inɛ ŋa iyi a kù nɛ gbugbãi ì ya maa taa gbugbã ŋa. Ì ya maa gba mii ndii ilu are ŋa, nɔ ì ya maa sɔ̃ mɔkɔ nŋɛ ŋa i maa ni a naaò atɛ̃ wa iŋɛò ŋa i mɔ. I sotĩ i gbɔ ŋa.

² Do ntɔ, Aɔ̃ Lafɛ̃ɛ í ni, amu Aɔ̃ Lafɛ̃ɛ ǹ wa n fɔɔi do kugbasi do irim fei iyi ajɔ wa naa bii inɛ ŋa aa naa a mu ŋɛ bɛi cɛ̃ɛ ŋa iyi à mu do kootia a nɛò ŋɛ iŋɛ do ama nŋɛ ŋa fei.

³ Inɛ baa yooma nŋɛ fei á fitai do fooi bindii iluu do wajuɛ suusuu nɔ aa nyɔ ŋɛi ikpa iri kutai Hɛɛmɔɔ. Amu Aɔ̃ Lafɛ̃ɛi ǹ fɔ bɛɛbɛ.

Kpãai Aɔ̃ Lafɛ̃ɛ ku tɔɔ iyi kù nɛ yaase

⁴ I bɔ bi ku ce kuweei Betɛli i ce dulum ŋa, nɔ i bɔ bi ku ce kuweei Giligali i kɔ̃ɔsi dulum nɔu má ŋa. I kooò kuwee nŋɛ ŋa daakɔ. Bii iju í má nɔ i koo amua nŋɛ ŋa.

⁵ I koo i ceem kuweei saabu do pɛ̃ɛ ku nɛ levɛ̃ɛ. I fɔ idei amua nŋɛ ŋau si bantuma, domi iŋɛ inɛi Izirɛli ŋa bɛɛbɛi ì bi ŋa. Amu Aɔ̃ Lafɛ̃ɛi ǹ fɔ bɛɛbɛ.

Kai hai nɛ aranfãani

⁶ Wee ǹ jɔ̀ ari í cuku si ilu nŋɛ ŋa fei, ǹ jɔ̀ sɔnda í gaizia si kpasɛ̃ nŋɛ ŋa fei, amma do nŋu fei i kù sinda wa bi tom ŋa. Amu Aɔ̃ Lafɛ̃ɛi ǹ fɔ bɛɛbɛ.

⁷ Ǹ kɔ̀ nŋɛ ijĩ waati iyi amaajɛ ŋa ku da í gbe cukpa mɛɛta. Ǹ jɔ̀ ijĩ í wɔ ilu bii gɔ ŋa, nɔ kù wɔ bii gɔ ŋa. Í wɔ iko bii gɔ ŋa nɔ kù wɔ bii gɔ ŋa, nɔ iko ŋa bii kù wɔu agbɛi í ce.

⁸ Inɛi ilu do ilu ŋa à ya maa nɛ si njɛ ku ba a ba inyi ku mɔ, amma a ci ya ba bɛi à bi. Do nŋu fei i kù nyi wa bi tom ŋa. Amu Aɔ̃ Lafɛ̃ɛi ǹ fɔ bɛɛbɛ.

⁹ Ǹ jɔ̀ amaajɛ nŋɛ ŋa à ba bɔ̃ɔ, nɔ à gbɛ. Jĩi ndii lambo nŋɛ ŋa hai rezɛ̃ɛ nŋɛ ŋa do jĩi ndii figi nŋɛ ŋa do jĩi ndii olivi nŋɛ ŋa, kokoo ŋa à ŋɔ ŋa. Amma do nŋu fei i kù nyi wa bi tom ŋa. Amu Aɔ̃ Lafɛ̃ɛi ǹ fɔ bɛɛbɛ.

¹⁰ Ǹ jɔ̀ bɔ̃ɔ nla nla gɔ í naa si ŋɛ, bɛi ǹ cea ilɛi Ezibiti. Ǹ jɔ̀ à kpa ama awaasũ nŋɛ ŋa do taakuba, nɔ à mu acĩ nŋɛ ŋa. Nɔ konkombii inɛ ŋa iyi à ku í dĩ imɔ nŋɛ ŋa, do nŋu fei i kù nyi wa bi tom ŋa. Amu Aɔ̃ Lafɛ̃ɛi ǹ fɔ bɛɛbɛ.

¹¹ Ǹ fɔtɔtɔ nŋɛ bɛi Sodomu do Gomɔɔ, nɔ ì baa ì yɛ ŋa bɛi sɔmbɔ iyi à nya wa hai inɔ ina. Do nŋu fei i kù nyi wa bi tom ŋa. Amu Aɔ̃ Lafɛ̃ɛi ǹ fɔ bɛɛbɛ.

¹² Na nŋu iŋɛ inɛi Izirɛli ŋa aa yɛ mii iyi an ce nŋɛ. Nɔ si bɛi an ce nŋɛ bɛɛbɛ iŋɛ inɛi Izirɛli ŋa, i ce sɔɔlu i kò amu Aɔ̃ Lafɛ̃ɛ nŋɛ.

¹³ Amɔsu í ni, inɛ iyi í ce iri kuta ŋa nɔ í taka fufu, nɔ í ya jɔ̀ amanɛ ku mà lasabuɛ ŋa, nɔ í ya kpaasi amɛɛjuumá ku baa ilu kuku, nɔ í ya maa nɛ si geete ŋa, iriɛi í jɛ Aɔ̃ Lafɛ̃ɛi lele do ilɛ.