Amɔsu 3 - Bibeli do fee

Inɛi Ilaaɔ̃ ŋa à nɛ a fɔ mii iyi à cei

¹ I de itĩ i gbɔ ide iyi amu Aɔ̃ Lafɛ̃ɛ ǹ wa n fɔ, iŋɛ inɛi Izirɛli ŋa fei, iŋɛ iyi ǹ nya wa hai ilɛi Ezibitiu.

² Si dimii inɛi andunya ŋa fei iŋɛ akãi ǹ cica. Na ŋɔi í ce an bee ŋɛ ide si gãmɛi laalɔ iyi ì ce fei ŋa.

Ilaaɔ̃i wa fɔ ide, waliiɛ kaa yɔkɔ ku coko

³ Amanɛ minji á ce isɛɛnɛ akã ajɔ bii a kù fɔ si njɛ?

⁴ Muusu nla í ya dɔ̃ anu inɔ sako bii kù ba sɔnda? Muusu nla saasaabɔ í ya dɔ̃ anu si koloɛ bii kù ba mii iyi í mu?

⁵ Yɛi á dasi taa iyi í wa ilɛ bii sɔnda kù wa bɛ? Rògò á se ilɛ bɛ bii kù mu ngɔgɔ?

⁶ Ntɔ ntɔ aa fã kuu si inɔ ilu iyi zigii inɛ ŋa kù da? Wahala gɔ á naa si inɔ ilu iyi kù jɛ Aɔ̃ Lafɛ̃ɛi í jɛ icuɛ?

⁷ Ntɔ ntɔ Aɔ̃ Lafɛ̃ɛ kaa ce ngɔgɔ iyi kù sɔ̃ walii woo ce icɛɛ ŋa si asii titã.

⁸ Bii muusu nla wa dɔ̃ anu, yooi zigiɛ kaa da. Bii Aɔ̃ Lafɛ̃ɛ í fɔ ide, yooi kaa ce walii.

Kiitii inɛi Samari ŋa

⁹ I fɔ si inɛi Asidodi do inɛi Ezibiti ŋa ide i ni, i tɔtɔɔ wa ŋa si iri kutai Samariu, nɔ i cɔ daa sãmi ikã ikãi inɛi Samari ŋa do njɛ ku taa gbugbã ŋa iyi í wa si anini nŋa.

¹⁰ Aɔ̃ Lafɛ̃ɛ í ni, inɛ ŋau a kù mà mii iyi í jɛ dee dee ku ce. À waa tɔtɔɔ amani ŋai do gbugbã, do bata ngba si inɔ kpasɛ̃ nŋa ŋa.

¹¹ Na nŋu, an jɔ̀ mbɛɛ ŋa a na a kaako ilɛu, a kãmiaɛ nɔ a ko amaniɛ fei. Amu Aɔ̃ Lafɛ̃ɛi ǹ fɔ bɛɛbɛ.

Faaba iyi kù nɛ inɔ didɔ̃

¹² Amu Aɔ̃ Lafɛ̃ɛ ǹ nyi ǹ fɔ má ǹ ni, bɛi hai si gɛlɛi muusu nla woo degbe mɛɛmu í ya gba kutɛ minji walakɔ bubui itĩi mɛɛmuɛ, bɛɛbɛ mɔi an gba iŋɛ inɛi Izirɛli ŋa iyi ì wa Samari ŋa. Iŋɛ iyi ì waa sũ si daayi ŋa do si bata ŋa Damasi.

Kai ku nii Ilaaɔ̃

¹³ I de itĩ i gbɔ kai iyi amu Aɔ̃ Lafɛ̃ɛi lele do ilɛ ǹ wa n ni, nɔ i koo i jɛa inɛi Zakɔbu ŋa sɛɛdaɛ ŋa.

¹⁴ Ajɔ iyi an kiiti inɛi Izirɛli ŋa si dulum du ŋa, an lɛgɛ bi ku ce kuweei Betɛliu do ngo ŋau feii, nɔ aa cukui hee ilɛ.

¹⁵ An lɛgɛ ile nŋa ŋa do kusu nŋa ŋai fei iyi à jɛ ti sukui tũtũ do ti sukui koko nɔ kpasɛ̃ ŋa iyi à ce si booda do inyíi jua ŋau fei aa kpɔò bommai. Tengi bɛi á jɛ iri ku kpai kpasɛ̃ nkpɔ, amu Aɔ̃ Lafɛ̃ɛi ǹ fɔ bɛɛbɛ.