Amɔsu 2 - Bibeli do fee

Inɛi Moabu ŋa

¹ Aɔ̃ Lafɛ̃ɛ í ni, dulum dii inɛi Moabu ŋa í la. Na nŋu, an jɔ̀ ijuukpã ku ba ŋai ntɔ ntɔ, domi aŋai à jo kũkũi ilaalui Edɔmuu í ce ilúlu.

² An jɔ̀ a dasi ilɛi Moabu ina, nɔ kaba ku nɛ gbugbãi bommai Keriɔti ŋa a jo, nɔ Moabu ku ce nfe si iba nla nlai anu ku dɔ̃i igũ do ibai kuu ŋa.

³ An kpa ilaaluui, do inɛ ngbo ŋa iyi à waa ce icɛ do nŋu. Amu Aɔ̃ Lafɛ̃ɛi ǹ fɔ bɛɛbɛ.

Inɛi Zudaa ŋa

⁴ Aɔ̃ Lafɛ̃ɛ í ni, dulum dii inɛi Zudaa ŋa í la. Na nŋu, an jɔ̀ ijuukpã ku ba ŋai ntɔ ntɔ, si na iyi í jɔ̀ à kɔ̀si woodam nɔ a kù ceò idem ŋa icɛ, nɔ à jɔ̀ iboi iwɛ̃ ŋa iyi baa nŋa ŋa à tɔɔ wo à nyɔ ŋa.

⁵ An jɔ̀ a dasi ilɛi Zudaa ina, nɔ kaba ku nɛ gbugbãi bommaɛ ŋa iyi à wa Zeruzalɛmu ŋa a jo.

Inɛi Izirɛli ŋa

⁶ Aɔ̃ Lafɛ̃ɛ í ni, dulum dii iŋɛ inɛi Izirɛli ŋa í la. Na nŋu, an jɔ̀ ijuukpã ku ba ŋɛi ntɔ ntɔ, si na iyi í jɔ̀ ì ta inɛ dee dee na fia nɔ ì ta ilu are na baata isɛ akã ŋa.

⁷ Ì ya bi i maa yɛ ilu are ŋai waati kãma fei si inɔ kufɔ, nɔ i ci ya saalu asaiya iyi í jɛ ti hai nɛ gbugbã ŋa. Ama do baa bi inaabo akãi à ya maa bɔ kú sũ, nɔ do yaase bɛɛbɛ, à ya bɛjɛ iri kumám nii.

⁸ Ì ya maa sũ ŋai kɔkɔi bi ku ce kuwee ŋa fei si jĩnɛ ŋa iyi ì gba wa si tɔɔma ŋa. Atɛ̃ iyi ì gba wa do gbugbã, ì ya maa mɔɔ ŋai si inɔ ilei iwɛ̃ nŋa ŋa.

⁹ Si waju nŋɛi ǹ ce nfei inɛi Amɔre ŋa iyi kugboka nŋa í yɛ bɛi jĩi ndii sɛɛdi nɔ gbugbã nŋa í yɛ bɛi jĩi ndii sɛni. Ǹ ce nfei iso nŋa lele do icã nŋa mɔ si ilɛ.

¹⁰ Amui ǹ nya ŋɛ wa hai ilɛi Ezibiti nɔ ǹ gbã ŋɛ wa adɔ̃ ciiji si gbaa ku ba i lɔ si ilɛi inɛi Amɔre ŋa ku jɛ tu ŋɛ.

¹¹ Iŋɛ inɛi Izirɛli ŋa, kù jɛ si inɔi ama nŋɛ ŋa do awaasũ nŋɛ ŋai amu Aɔ̃ Lafɛ̃ɛ ǹ jɔ̀ walii do Nazii ŋa à fita?

¹² Nɔ wee ì jɔ̀ Nazii ŋau à mɔ atɛ̃ nɔ walii ŋau mɔ ì na ŋa wooda ŋa ì ni a maà ce walii má.

¹³ Si bɛɛbɛ amu an lɛgɛ ŋɛi anu akã bɛi sarɛti iyi à dasi amaajɛ ŋa í kɔ̃ í ya lɛgɛ mii ŋa iyi wa nɛ si.

¹⁴ Inɛ iyi í gbãa kaa yɔkɔ ku sa, inɛ mɔ iyi í nɛ gbugbã kaa yɔkɔ ku ta gbugbãɛ, nɔ woo ja igũ kaa yɔkɔ ku faaba kuwɛɛɛ.

¹⁵ Inɛ iyi wa ta afa kaa yɔkɔ ku leekĩ, inɛ iyi í nɛ kutɛ gbãa kaa fita si, nɔ masa kaa faaba hundeɛ.

¹⁶ Woo ja igũ ilu wɔɔkɔu a sai basĩ ajɔ nŋu bɛ. Amu Aɔ̃ Lafɛ̃ɛi ǹ fɔ bɛɛbɛ.