Amɔsu 1 - Bibeli do fee

¹ Amɔsu woo sɛ̃ angudã ŋai wa jɛ, nɔ inɛi ilui Tekoai. Aɔ̃ Lafɛ̃ɛ í baa ide ku fɔ si kuyɛ ŋa iyi í ce si gãmɛi inɛi Izirɛli ŋa. Waati bɛɛbɛ, ilɛ ku yaya iyi í ceu wa gbe adɔ̃ minji. Waati nŋu, Oziasii wa jɛ ilaalu si ilɛi Zudaa, nɔ Zeroboamu amai Zoasi mɔi wa jɛ ilaalu si ilɛi Izirɛli.

² Amɔsu í ni, hai iri kutai Siɔ̃ɔ, Aɔ̃ Lafɛ̃ɛ í dɔ̃ anu bɛi muusu nla nɔ à gbɔ imuɛ hee Zeruzalɛmu. Woo degbe ŋa à nɛ inɔ kufɔ domi fɔfɔ kù wɛɛ, nɔ iri kutai Kaamɛli mɔ hee antaiɛ lele fei í gbɛ.

Aɔ̃ Lafɛ̃ɛ í yɛ taalei Izirɛli do inɛ ŋa iyi à wa kɔkɔɛ ŋa Inɛi Siri ŋa

³ Aɔ̃ Lafɛ̃ɛ í ni, dulum dii inɛi ilui Damasi ŋa í la. Na nŋu, an jɔ̀ ijuukpã ku ba ŋai ntɔ ntɔ, domi aŋai à tɛɛsɛ inɛi Galaadi ŋa, nɔ à ce nfe nŋa do isɔ ku gbe anu ŋa.

⁴ An jɔ̀ a dasi kpasɛ̃i ilaalu Azaɛli ina, nɔ kaba ku nɛ gbugbãi ilaalu Bɛni-Hadadi ku jo.

⁵ An lɛgɛ sɔkɔi andɛ koofai Damasi, an kpa irii inɛ ngboi ilui Bikati-Avɛni ŋa, do ilaalui ilui Bɛti-Edɛni, nɔ a mu inɛi Siri ŋa aru a nɛò ŋa Kii. Amu Aɔ̃ Lafɛ̃ɛi ǹ fɔ bɛɛbɛ.

Inɛi Filisi ŋa

⁶ Aɔ̃ Lafɛ̃ɛ í ni, dulum dii inɛi Filisi ŋa í la. Na nŋu, an jɔ̀ ijuukpã ku ba ŋai ntɔ ntɔ, domi aŋai à mu zamaa nkpɔ nkpɔ aru à koo à daa inɛi Edɔmu ŋa si awɔ.

⁷ An jɔ̀ a dasi bindii ilui Gaza ina, nɔ kaba ku nɛ gbugbãi bommaɛ ŋau a jo.

⁸ An kpa irii inɛ ngboi ilui Asidodi ŋa do ilaalui ilui Asikalɔ̃ɔ. Nɔ an sinda si inɛi ilui Ekorɔ̃ɔ ŋa n kpã ŋa iju nɔ inɛi Filisi ŋa iyi à gbeu fei aa ce nfei. Amu Aɔ̃ Lafɛ̃ɛi ǹ fɔ bɛɛbɛ.

Inɛi Fenisi ŋa

⁹ Aɔ̃ Lafɛ̃ɛ í ni, dulum dii inɛi Tii ŋa í la. Na nŋu, an jɔ̀ ijuukpã ku ba ŋai ntɔ ntɔ, domi aŋai à mu zamaa nkpɔ nkpɔ aru à daa inɛi Edɔmu ŋa si awɔ. A kù ceò akabuu iyi í wa si gãmɛ nŋa icɛ.

¹⁰ An jɔ̀ a dasi bindii ilui Tii ina nɔ kaba ku nɛ gbugbãi bommaɛ ŋau a jo.

Inɛi Edɔmu ŋa

¹¹ Aɔ̃ Lafɛ̃ɛ í ni, dulum dii inɛi Edɔmu ŋa í la. Na nŋu, an jɔ̀ ijuukpã ku ba ŋai ntɔ ntɔ, domi aŋai à lele inɛi Izirɛli inɛ nŋa ŋau do taakuba. A kù ce araare nŋa baa keeke. Idɔɔkɔ̃ nŋa kù sũ nɔ à waa mu ŋa do mbɛɛtɛ waati kãma fei.

¹² An jɔ̀ a dasi ilui Temaa ina, nɔ kaba ku nɛ gbugbãi bommai Bosura ŋa a jo.

Inɛi Amɔɔ ŋa

¹³ Aɔ̃ Lafɛ̃ɛ í ni, dulum dii inɛi Amɔɔ ŋa í la. Na nŋu, an jɔ̀ ijuukpã ku ba ŋai ntɔ ntɔ, domi aŋai à pũ inaabo bãasĩ ŋa si ilui Galaadi, ku ba a kɔ̃ɔsi kulai ilɛ nŋa.

¹⁴ An jɔ̀ a dasi bindii ilui Raba ina nɔ kaba ku nɛ gbugbãi bommaɛ ŋau a jo. Waati bɛɛbɛ inɛ ŋa aa gbɔ anu ku dɔ̃i igũ bɛi fufu nla gɔ.

¹⁵ Nɔ aa mu ilaalu nŋa do inɛ ngboi igũ ŋau aru a nɛò ŋa ilɛ mmu. Amu Aɔ̃ Lafɛ̃ɛi ǹ fɔ bɛɛbɛ.