Abudiasi 1 - Bibeli do fee

¹ Aɔ̃ Lafɛ̃ɛ í ba Abudiasi ide ku fɔ si kuyɛ. Ide iyi í sɔ̃ɔ si gãmɛi inɛi Edɔmu ŋa wee. Ŋɔi Aɔ̃ Lafɛ̃ɛ í jɔ̀ à gbɔ laabaau iyi inɛ gɔ iyi à bɛ wa bi inɛi andunya ŋa í naaò wa. Inɛɛu í ni, i dede ŋa, i dede ka bɔ igũ bi inɛi Edɔmu ŋa.

Aɔ̃ Lafɛ̃ɛ wa fɔ idei nfe ku cei Edɔmu

² Aɔ̃ Lafɛ̃ɛ í ni, awɔ Edɔmu, amui an jɔ̀ i kere i re si inɔi inɛ ŋa iyi à gbe si ilɛ ŋau ihɛ̃. Inɛ fei á dondaɛi.

³ Ara ku soɛi í jɔ̀ ì nyɔ. Nɔ ì buba si isai kuta ŋa hee lele. Si lasabuɛ ì waa ni, yooi á jɔ̀ n kita wa hai bɛ.

⁴ Na nŋu, jɔ̀ i mà iyi baa bii ì gũ ì bɔ hee lele bɛi kungbã, ì koo ì ce bi kuwaɛ si inɔi leleaɔ̃ ŋa, an kitaɛ wai. Amu Aɔ̃ Lafɛ̃ɛi ǹ fɔ bɛɛbɛ.

⁵ Bii woo ce ile ŋa walakɔ bata ngba ŋa à naa bi tɛɛ idũ, i kaa jɔ̀ araɛ sɛ̃ɛ a ko amaniɛ zaka bɛi à bi a nɛò. Bii woo ka isoi jĩi ŋa à lɔ si lamboɛ aa wɔ isoi jĩi ndɛɛ ŋai, nɔ keekei aa jɔ̀ɛ.

⁶ Amma iŋɛ tɔkui Esau ŋa, mbɛɛ nŋɛ ŋa aa ko amani nŋɛ feii baa do iyi wa singa fei.

⁷ Inɛ ŋa iyi iŋɛò ŋa ì nɛ anu akã ŋa aŋai aa zamba ŋɛ nɔ a lele ŋɛ hai si ilɛ nŋɛ. Inɛ ŋa mɔ iyi à jɛ kpaasi nŋɛ ŋa aa ta nŋɛ gbugbã a kãmia ŋɛ. Inɛ ŋa iyi iŋɛò ŋa ì ya jɛ sɔnda ŋa aa le nŋɛ cɛkũm, nɔ aa fɔ a ni i kù waa nɛ iri ŋai.

⁸ Amma amu Aɔ̃ Lafɛ̃ɛ, ǹ wa n fɔi, ajɔ iyi idɔm í kɔ̃, an kpa ilu bisii Edɔmu ŋai fei. Nɔ si iri kutai Esau ŋau bɛ n kaa n jɔ̀ ilu laakai kãma gɔ.

⁹ Iŋɛ inɛi Temaa ŋa, woo ja igũ nŋɛ ŋa zigi nŋa á da ntɔ ntɔ, nɔ do yaase bɛɛbɛi mbɛɛ nŋɛ ŋa aa kpa inɛi ilɛi iri kutai Esau ŋau fei.

Inɛi Edɔmu ŋa à bɛɛgɛ si inɔ kufɔi inɛi Izirɛli ŋa

¹⁰ Iŋɛ inɛi Edɔmu ŋa si bɛi iŋɛi ì mu tɔkui Zakɔbu ŋa ì kpa ŋa ŋa, iŋɛ mɔ aa yɛ anyɔ ŋa. Aa ce nfe ŋai hee do ajɔ fei.

¹¹ Iŋɛ mɔ ì wa bɛ si ajɔ iyi mbɛɛ ŋa à lɔ si ilu nŋau nɔ à kãmia ŋa à jɛ ŋa igũ. Iŋɛ mɔ anyii mbɛɛ ŋaui ì wa ŋa waati iyi mbɛɛ ŋau à ta si jĩnɛi Zeruzalɛmu ŋau kpasa nɔ à koo.

¹² Iŋɛ inɛi Edɔmu ŋa, i kù nɛ i cɔ inɛi Zudaa ŋa nɔ i wɛɛò inɔ didɔ̃ ŋa si waati iyi à wa si wahala. I kù nɛ i nɛ inɔ didɔ̃ ŋa si waatii nfe ku ce nŋa. I kù nɛ i maa bu ŋa ŋa si waati iyi à wa si inɔ kufɔ.

¹³ I kù nɛ i lɔ si ilui inɛm ŋa si ajɔ iyi à waa ce nfe nŋa. I kù nɛ i wɛɛò inɔ didɔ̃ ŋa si ajɔi ijuukpã nŋa. I kù nɛ i ko amani nŋa ŋa si ajɔi ijuukpãu.

¹⁴ I kù nɛ i koo i leekĩ kpãa koko i maa kpa inɛ ŋa iyi à ba à sa à waa fita ŋau ŋa, walakɔ i tale ŋa si awɔi mbɛɛ ŋa si ajɔi ijuukpãu ŋa.

¹⁵ Ajɔi amu Aɔ̃ Lafɛ̃ɛ í maai wa, si bii an kiiti dimi fei. Bɛi ì cea inɛ ŋa, bɛɛbɛi an cea awɔ mɔ. Laalɔ iyi ì ce, si iriɛi á cuku si.

Inɛi Izirɛli ŋau aa sãa inɛi Edɔmu ŋa gbese

¹⁶ Aɔ̃ Lafɛ̃ɛ wa ba inɛi Izirɛli ŋa ide ku fɔ í ni, bɛi iŋɛ inɛi Izirɛli ŋa ì mɔ kɔɔfui idɔɔkɔ̃m si antaii iri kuta kumám nɔu ŋa, bɛɛbɛi inɛi ilɛ mmu ŋa mɔ iyi à gbe aa mɔɔ waati kãma fei. Aa mɔɔi ku maa kpa ŋa hee a koo a ce nfe mam mam.

¹⁷ Amma si iri kutai Siɔ̃ɔ iyi aa nya ikã má ku jɛ titom nɔui inɛ ŋa iyi à ba à fita si ŋau aa wa. Tɔkui Zakɔbu ŋa aa gba ilɛ nŋa má hai bi inɛ ŋa iyi à jɛ ŋa igũ wo à gbaau.

¹⁸ Tɔkui Zakɔbu ŋa aa yɛi bɛi ina, nɔ tɔkui Zozɛfu ŋa mɔ, aa yɛi bɛi amɛi ina. Aŋai aa jo tɔkui Esau ŋa bɛi ina í ya jo fɔfɔ. Aa jo ŋai mam mam a kaa jɔ̀ baa inɛ kãma si hunde. Amu Aɔ̃ Lafɛ̃ɛi ǹ fɔ bɛɛbɛ.

¹⁹ Inɛi Zudaa ŋa aa gba ilɛi iri kutai inɛi Edɔmu ŋa do ikpa awɔ cangai kpãai inunu, nɔ do ikpa lɔɔmai ilɛu, aa gba inyai inɛi Filisi ŋa do ti inɛi Samari ŋa do ti tɔkui Efaraimu ŋa. Nɔ tɔkui Bɛnzamɛɛ ŋa mɔ aa gba ilɛi inɛi Galaadi ŋa.

²⁰ Inɛi Izirɛli ŋa iyi à wa ikpa awɔ njɛi kpãai inunu iyi à mu à nɛò ŋau à nɛ sooge ku ja igũ ŋa. Aŋai aa gba ilɛi inɛi Kanaã ŋa hee ku bɔ si Sarɛpita. Inɛi Zeruzalɛmu ŋa iyi à mu à nɛò ilɛi Sefaradiu, aŋa mɔi aa gba ilu ŋa iyi à wa do ikpa awɔ cangai kpãai inunuu.

²¹ Woo jɛ igũ ŋai aa jɛ nɔ aa mɔsi hee antaii iri kutai Siɔ̃ɔ. Bɛi aa buba a maa jɛ inɛ ngboi inɛi Edɔmu ŋa. Do yaase bɛɛbɛi Aɔ̃ Lafɛ̃ɛ á jɛò bomma.