Abakuku 3 - Bibeli do fee

Kutɔɔi Abakuku do kuyɛɛ

¹ Abakuku waliiu í ce kutɔɔ do kukpata,

² í ni, Aɔ̃ Lafɛ̃ɛ, ǹ gbɔ à sɔ̃m bɛi ì ce, ŋɔi í jɔ̀ ǹ mà bɛɛrɛi icɛɛu. Aɔ̃ Lafɛ̃ɛ, jɔ̀ ku ce si waati nwau ihɛ̃. Jɔ̀ inɛ ŋa a yɔɔ si waati nwau ihɛ̃. Amma si idɔɔkɔ̃ɛ, ye gigi nwa nɔ i ce araare nwa.

³ Ilaaɔ̃ í naai hai Temaa. Nŋu iyi í má, í naai hai iri kutai Parãa. Amboeɛ í bii lele nɔ andunyau fei í kɔ̃ do saabuɛ. Kusĩmi.

⁴ Í yɛi bɛi inya kumá. Inya kumá iyi wa daana hai si awɔɛi wa fita, nɔ si bɛi gbugbãɛ í wa.

⁵ Bɔ̃ɔi wa cuaa bii wa nɛ fei nɔ iku wa tooɛ.

⁶ Nŋui í dede í wã ilɛ, í cɔ inɛi andunya ŋa nɔ í jɔ̀ zigi nŋa í da. Iri kuta ŋa iyi à wɛɛ hai ku kpɛ, à lɛgɛ. Geete ŋa iyi à wɛɛ hai ku kpɛ iyi à jɛ kpãa bii í ya too wo, à yɔ.

⁷ Ǹ yɛ ilei acɔ ŋa iyi à jɛ ti dimii Kusã ŋa à lɛgɛ. Nɔ inɛi Madiãa ŋa, bi kuwa nŋa ŋa à yaya.

⁸ Aɔ̃ Lafɛ̃ɛ, idɔɛ wa kɔ̃i si ido ŋa? Mà si inyii tenku ŋai ì waa ce idɔɔkɔ̃ waati iyi ì wa lele si antaii sarɛti ku ja igũ iyi acĩɛ ŋa à waa fa ku ba i jɛ igũ.

⁹ Ì ce sɔɔlui biooɛ, nɔ afaɛ ŋau à yɛi bɛi kugbasi iyi ì ce. Kusĩmi. Ì la ilɛ nɔ ì ce ido ŋa.

¹⁰ Iri kuta ŋa à yɛɛ nɔ à waa yaya, ijĩ wa wɔ do gbugbã nɔ í cã wa lɔ, nɔ à waa gbɔ ibai kutãngãm dii tenku iyi wa bɔ hee lele.

¹¹ Inunu do cukpa à leekĩ, na inya kumái afaɛ ŋau do kaka ku daanaɛ iyi ì ta.

¹² Do idɔɔkɔ̃i ì waa nɛ si ilɛu nɔ ì waa tɛɛsɛ dimi ŋa si idɔɔkɔ̃ɛu.

¹³ Ì fita wai na irii faabai inɛɛ ŋa, ì fita wai na irii inɛɛ ŋa iyi ì cica, ì kpa inɛ ngboi inɛ laalɔ ŋa do inɛ ŋa iyi à gbe fei. Kusĩmi.

¹⁴ Mbɛɛ ŋaui à saasa à faata wa si wa bɛi fufu nla gɔ ku ba a fangaa wa. À waa dɔ̃ anu do inɔ didɔ̃. À tã sɔɔlu a kpa ilu are ŋa si asii. Amma awɔ Aɔ̃ Lafɛ̃ɛ, ì lu irii inɛ ngbo nŋa ŋaui do afa nŋa ŋa.

¹⁵ Aɔ̃ Lafɛ̃ɛ, ì waa nɛ si tenku do acĩɛ ŋa, nɔ inyi wa tãngãm.

¹⁶ Ǹ wa n gbɔ ibau, nɔ zigim í da ntɔ ntɔ. Gɛlɛm wa yaya do njo, aram fei í kua gbugbã nɔ ǹ leekĩ sɛ̃ɛ ǹ wa n degbe ajɔi inɔ kufɔ iyi á naa si dimi ŋa iyi à waa kpã wa ijuu.

¹⁷ Jĩi ndii figi kaa da koko, jĩi ndii rezɛ̃ɛ kaa so jĩi ndii olivi mɔ kaa so, iko ŋa a kaa ce amaajɛ kãma, angudã ŋa a kaa wa inɔ aro, kɛtɛ ŋa mɔ a kaa wa bi ku so nŋa.

¹⁸ Amma amu, inɔ didɔ̃m wa naai hai bi awɔ Aɔ̃ Lafɛ̃ɛ. Ǹ ya n nɛ inɔ didɔ̃i si na iyi í jɔ̀ ì faabam.

¹⁹ Aɔ̃ Lafɛ̃ɛ, awɔi ì jɛ gbugbãm, awɔi ì ya jɔ̀ kutɛm ku yɛ bɛi ti kulu nɔ ì ya maa nɛɛm hee lele si iri kuta ŋa. Iriu bɛi à kɔ̃a inɛ ngboi woo kɔ̃ iri ŋa do mɔɔlɔ.