Abakuku 2 - Bibeli do fee

¹ Amu an koo n wai tengi bii an maa n degbe. An gũi si antaii bindii iluu n maa n degbe ku ba n gbɔ iyi Aɔ̃ Lafɛ̃ɛ á sɔ̃m, do yaase bɛi á jɛɛm si weeweam ŋau.

Ide ku jɛi Aɔ̃ Lafɛ̃ɛ si idei inɛ dee dee do woo kpã inɛ iju

² Ŋɔi Aɔ̃ Lafɛ̃ɛ í jɛɛm í ni, kɔ ide iyi ǹ sɔ̃ɛ si kuyɛ. Kɔɔ si kuta ku munga anu ŋau bɛi inɛ á yɔkɔ ku cioɛ sãa sãa.

³ Awaati iyi kuyɛu á kɔ̃ kù to titã, amma á cei si waati iyi ǹ bi. Degbeɛ do temua baa bii wa kpɛ. Ntɔ ntɔ, ide iyi ǹ fɔu á cei bii waatiɛ í to, sika kãma kù wa si.

⁴ Cɔ inɛ laalɔ kù wa si kpãa jiida, nɔ á ce nfei. Amma inɛ dee dee á maa wɛɛi na naanɛ ku dasiɛ.

⁵ Ntɔ ntɔ amani í ya nyɔ inɛi, nɔ ilu faau ŋa a ci ya nɛ kusĩmi. Gbangɔlɔ nŋa í ya cĩi bɛi balɛ. A ci ya yo bɛi bi kuwai iku ŋa. À ya maa ce igũi si dimi ŋa. À ya mu ŋai a maa gbã ŋa nɔ a jɛ aru nŋa.

⁶ Aa maa fɔɔa inɛ ŋau idei bɛi ara do mɔnda, nɔ a yaako ŋa. Inɛ ŋau aa maa ni, hee waati yoomai aa leekĩò amani iyi kù jɛ tu ŋɛ ku ko ŋa. Gbese nla nlai ì waa kɔ̃a ara nŋɛ si bɛ. Inɔ kufɔi á jɛ tu ŋɛ.

Idei laalɔ ku fɔ

⁷ Inɛ ŋa iyi ì waa mu gbese nŋa ŋau aa faata si ŋɛ wai anu akã. Aa dede nɔ a jɔ̀ i maa yaya do njo ŋa nɔ aa ko mii ndu ŋɛ ŋa feii.

⁸ Si bɛi ì ko mii ndii ilɛ nkpɔ ŋa, bɛɛbɛi inɛ ŋa iyi à gbe aa ko jĩnɛi iŋɛ mɔ, si na iyi í jɔ̀ ì nikã njɛi inɛ ŋa, nɔ ì taa inɛi ilɛɛko ŋa do ilu nla ŋa fei gbugbã ŋa.

⁹ Inɔ kufɔi á jɛ ti iŋɛ iyi ì waa ko amani ŋa do yaase iyi kù jɛ dee dee na irii kpasɛ̃ nŋɛ ŋa, nɔ ì waa lasabu ì jɛò ilu bɛɛrɛ nla nla ŋa ku ba ijuukpã ku fo iri nŋɛ.

¹⁰ Icɛ iyi lasabu nŋɛu á cei í jɛ ku dasi inɛ nŋɛ ŋa anyɔ. Dimi nkpɔ ŋa iyi ì jɔ̀ à ce nfe ŋau, ara nŋɛi ì cea laalɔ ŋa.

¹¹ Baa kutai ile nŋɛ ŋau fei aa dɔ̃ anu a yɛ taale nŋɛ nɔ jĩi ku kaakata ŋa aa jɛ nŋɛ.

¹² Inɔ kufɔi á jɛ ti iŋɛ iyi ì taa inɛ ŋa gbugbã ì kpa ŋa ì bɛi ì jilɛò waju ku bɔi ilu nŋɛ ŋa.

¹³ Na ŋɔi í jɔ̀ icɛ iyi inɛ ŋa à waa ce fei í ya maa ce nfei si ina, nɔ à ya maa wahala ara nŋai ngbɛ ngbɛ. Mii ŋau bɛ fei kù jɛ icɛi Aɔ̃ Lafɛ̃ɛi lele do ilɛi?

¹⁴ Ntɔ ntɔ inɛ ŋa aa mà amboei Aɔ̃ Lafɛ̃ɛ si andunya fei bɛi inyi í ya maa kɔ̃ si tenku.

¹⁵ Inɔ kufɔi á jɛ ti iŋɛ iyi ì waa na kpaasi nŋɛ ŋa atɛ̃ ku nɛ gbugbã à waa mɔ ku ba ku kpa ŋa nɔ a yɛ basĩ nŋa si bantuma.

¹⁶ Anyɔi ì waa dasi ara nŋɛ, kù jɛ bɛɛrɛ. Iŋɛ taka nŋɛ mɔ i mɔ nɔ i fita basĩ ŋa. Aɔ̃ Lafɛ̃ɛi á tilasi ŋɛ i mɔ idɔɔkɔ̃ɛ iyi í jɛ bɛi atɛ̃, nɔ bɛɛrɛ iyi ì nɛ ŋau fei á baa ku jɛ anyɔ.

¹⁷ Laalɔ ŋa iyi ì ce ilɛi Libãa ŋau aa sinda si ŋɛ wai. Ì ce nfei mɛɛmu ŋa, bɛɛbɛ mɔi mɛɛmu ŋau aa da zigi nŋɛi, si na iyi í jɔ̀ ì nikã njɛi inɛ ŋa, nɔ ì taa inɛi ilɛɛko ŋa do ilu nla ŋa fei gbugbã ŋa.

¹⁸ Aranfãani yoomai iwɛ̃ ŋa ku ce í nɛ. Mii gɔ ŋai iyi à ya ce do wura walakɔ do isɔ̃ fũfũ, nɔ à ya jɔ̀ amanɛ ku dasi ibo naanɛ. Na mii í ce amanɛ á dasi mii ŋa iyi nŋu takaɛ í ce do awɔɛ naanɛɛ. Mii ŋa iyi a kaa yɔkɔ a fɔ ide.

¹⁹ Inɔ kufɔi á jɛ ti iŋɛ iyi ì sɔ̃ jĩi ì waa ni ku dede, nɔ ì sɔ̃ kuta gɔ iyi kaa yɔkɔ ku fɔ ide ì waa ni ku dede, aŋa iyi a kaa yɔkɔ a kɔ ŋɛ si nkãma, nɔ baa bii í jɛ à bii ŋa do wura do isɔ̃ fũfũ, hunde kãma de kù wa si ŋa.

²⁰ Amma Aɔ̃ Lafɛ̃ɛ í wai lelei Aɔ̃ si kpasɛ̃ kumáɛ. Inɛi andunya fei ku coko si wajuɛ.