Abakuku 1 - Bibeli do fee

¹ Ide iyi Aɔ̃ Lafɛ̃ɛ í sɔ̃ walii Abakuku si kuyɛ wee.

Walii Abakuku í tɔɔ Aɔ̃ Lafɛ̃ɛ faaba

² Aɔ̃ Lafɛ̃ɛ, hai waati sisɔi ǹ wa n tɔɔɛ faaba, hee waati yoomai aa gbɔɔm. Ǹ dɔ̃ siɛ anu ǹ ni, gbugbãi wa jɛ wa. Hee waati yoomai aa naa i faaba wa.

³ Na mii í ce ì jɔ̀ ǹ wa n yɛ laalɔ bɛ ihɛ̃. Bɛirei í ce ì jɛsi i maa cɔ laalɔ. Bi inɛ ŋa iyi à waa kaakom, ntɔ ku kua do gbugbã ku tai ǹ wa n yɛ. Nɔ bii fei njɛ hai gbɔa do ija ŋai wa dede.

⁴ Wooda kù waa ce icɛ má nɔ ntɔ mɔ kù wɛɛ má. Inɛ laalɔ ŋai à ya ba ntɔ si inɛ dee dee ŋa, nɔ iyi bɛi í jɔ̀ kiiti ku ce dee dee í bɛjɛ.

Ide kujɛi Aɔ̃ Lafɛ̃ɛ si idei kunaai inɛi Babilɔni ŋa

⁵ Aɔ̃ Lafɛ̃ɛ í ni, i kãsi dimi ŋau iju ŋa. I jɔ̀ i biti ŋa, domi icɛ gɔ wa ce si waati nŋɛ. Baa bii í jɛ à sɔ̃ ŋɛ wo i kaa dasi naanɛ ŋa.

⁶ Inɛi Babilɔni ŋai an jɔ̀ a faata si ŋɛ wa. Inɛ kugaabu ŋai nɔ à ya maa nɛi gbãa gbãa si ilɛ ŋa iyi kù jɛ tu ŋa, nɔ a maa gba ŋa.

⁷ Inɛ ŋau bii ì yɛ ŋa zigiɛ í ya dai ntɔ ntɔ. Si lasabu nŋa mii iyi à bii à ya jilɛ.

⁸ Acĩ nŋa ŋa à nɛ are à re muãa ŋa, nɔ à gaabu à re baa mbo iyi í ya ce adɛ alɛ. Hai jĩijĩi à naa, nɔ masa nŋa ŋau à ya fo lele à bata mbɛɛ ŋa bɛi kungbã í ya ce si iŋa ŋa.

⁹ Inɛ ŋau à waa naai ku ba a ce igũ do gbugbã. Iju nŋa waju bii à waa bɔi wa kãsi. À mu inɛ ŋa aru nkpɔ nkpɔ.

¹⁰ Inɛ ŋau à donda ilaalu ŋa, à ya maa yaako ilu ilɛ ŋa. Baa nŋa ci ya wa si do ile ku nɛ gbugbã ŋa. À ya cea ara nŋa timtim dii sãai nɔ a lɔ si ŋa a gba ŋa.

¹¹ Inɛ laalɔ ŋau à ya lɔi bɛi fufu nla nla. Gbugbã nŋai à waa kaaba, nŋui í jɛ bɛi iwɛ̃ nŋa.

Waliiu í kpe Ilaaɔ̃ má

¹² Hai tako, awɔi ì wɛɛ, awɔi ì jɛ Aɔ̃ Lafɛ̃ɛm, Ilaaɔ̃ kumá iyi kaa ku. Aɔ̃ Lafɛ̃ɛ, awɔi ì jɛ kuta bi ku manjim, awɔi ì cica inɛi Babilɔni ŋa, ì mu nŋa gbugbã ku ba a kpã wa iju a kiiti wa.

¹³ Ijuɛ ci ya yɔkɔ ku maa cɔ laalɔ, domi ì mái dee dee. To, bɛirei í ce ì yɔkɔ ì waa cɔ mii iyi woo zamba ŋa à waa ce, nɔ i kù waa ni ide kãma. Bɛirei í ce ì waa coko waati iyi inɛ laalɔ ŋau à waa kpa inɛ dee dee ŋa.

¹⁴ Ì waa cea amanɛ ŋa bɛi cɛ̃ɛ ŋa do bɛi kokoo ŋa iyi a kù nɛ woo degbe.

¹⁵ Inɛi Babilɔni ŋau à waa mu inɛ ŋai bɛi cɛ̃ɛ iyi à mu do kootia, nɔ à nya ŋa hai si taaò nŋa à ko ŋa si kɔlɔ à nɛò ŋa do inɔ didɔ̃ nla nla.

¹⁶ À ya maa cea taaò nŋa ŋau kuwee nɔ à ya jo nŋa tuae ku dɔ̃ inunu, domi do saabu nŋai à baò sɔnda didɔ̃ nkpɔ nkpɔ.

¹⁷ Inɛ ŋa iyi à mu do taaò nŋau aa nya inɛ nŋu ŋai ku ba a maa mɔsi do nfei inɛi ilɛ ŋa ku ce? A kaa ya ce araare nŋa?