Timɔtee 2, 4 - Bibeli do fee

^1-2 Ǹ wa n tɔɔɛi Timɔtee, i ya maa waazoa inɛ ŋa idei Ilaaɔ̃ waati kãma fei. I ya tã sɔɔlu baa bii bɛirei, à jɛ a kù jɛ. Ǹ wa n tɔɔɛi si wajui Ilaaɔ̃ do si wajui Jesu Kirisi, nŋu iyi á kiiti ilu hunde do iku ŋa. Na irii kunyiɛ wa do kunaai bommaɛi ǹ wa n dasiɛ icɛu bɛ. Na nŋu, lɛlɛ ŋa nɔ i nyisi ŋa kurara nŋa, mu nŋa gbugbã, nɔ i kɔ ŋa si cioi idei Ilaaɔ̃ do suuru nla nla.

³ Ǹ wa n fɔ bɛɛbɛi domi waati gɔ wa naa iyi inɛ ŋa a kaa bi idei kukɔsi jiida ku gbɔ, amma aa dɛdɛa ara nŋa woo kɔ si cio nkpɔ, inɛ ŋa iyi aa lɛlɛ ŋa do ide iyi à bi ku gbɔ.

⁴ Aa kɔ̀ ku gbɔ ide ntɔu, nɔ aa sinda ara nŋa si idei arái amanɛ ŋa.

⁵ Amma awɔ, mu araɛ si mii fei, temua do ijuukpã, ce icɛi laabaau jiidau ku waazoɛ, nɔ i jɔ̀ icɛi idei Ilaaɔ̃ iyi ì waa ce ku kɔ̃ mam mam.

⁶ Amma amu takam, kuwɛɛm í jɛ bɛi atɛ̃i kuwee iyi à waa nikã, nɔ waati iyi an jɔ̀ andunya í maai wa.

⁷ Ǹ jabu jiida, nɔ ǹ sɛi ǹ bɔ hee kɔɔ, nɔ ǹ wa n leekĩ si naanɛ ku dasi dim dim.

⁸ Nsɛi, ǹ mà iyi an ba ribai dee dee ku jɛ. Lafɛ̃ɛ woo kiiti dee deei á muum si ajɔ nŋu. Kù jɛ amu akã, amma hee do inɛ ŋa iyi à bi ajɔi kunyiɛ wa fei.

Ide ankãanyi

⁹ Ce kookaai i hãmɛɛm wa ńya ńya,

¹⁰ domi Demasi í jɔ̀m í bɔ Tɛsalonika si na iyi í jɔ̀ í bi andunya kaa kaa. Kɛrɛsãa, inɛ nŋu í nɛ ikpa ilɛi Galati nɔ Titee mɔ í nɛ ikpa ilɛi Dalumasi.

¹¹ Luku nŋu akãi í wa bi tom ihɛ̃. Gbã Maaku iŋɛò i naa wa ajɔ ŋa, domi á yɔkɔ ku sobim si icɛm nɔu.

¹² Ǹ bɛ Tisiki Efɛɛzu.

¹³ Bii ì waa naa, soom kumboo ku nya tũtũm wa iyi ǹ jɔ̀ Torasi kpasɛ̃i Kaapusi, do tiam ŋa, iyi í re mɔm nŋui í jɛ iyi à ce do batau.

¹⁴ Alesandu gbɛdɛu, í ceem laalɔ ntɔ ntɔ. Lafɛ̃ɛ á sãa mii iyi í ce.

¹⁵ Awɔ mɔ laakaiɛ, domi í kɔ̀si ide nwa do gbugbã.

¹⁶ Inɛ kãma kù nɔ kù leekĩ do amu sinteu mɔm iyi ǹ wa n kɔ̀ò aram bi ku ce kiiti, aŋa feii à jɔ̀m. Ilaaɔ̃ ku maà mu ŋa do.

¹⁷ Do nŋu fei, Lafɛ̃ɛ í leekĩ do amu í muum gbugbã, ku ba n waazo laabaau jiidau mam mam nɔ dimi mmu ŋau fei a gbɔɔ. Nɔ ǹ fita si wahalau bɛi inɛ iyi í gbã hai si gɛlɛi muusu nla.

¹⁸ Lafɛ̃ɛ á nyam hai si laalɔ baa yooma fei, nɔ ku jɔ̀ n lɔ si bommai leleɛ do laakai ku sũ. Ka saabuɛ hee do ajɔ fei. Ami.

Fɔɔi ankãanyi

¹⁹ Ce Piisila do Akilasi fɔɔ do inɛi kpasɛ̃i Onezifɔɔ ŋa.

²⁰ Erasitu í gbe Kɔrɛnti bɛ nɔ ǹ jɔ̀ Torofimu Milee, domi kù waa nɛ baani.

²¹ Ce kookaai i naa hee sukui tũtũ ku maa to. Ebulusi, do Pudɛni, do Linusi, do Kolodia, do inɛ nwa ŋau fei à waa ceɛ fɔɔ.

²² Lafɛ̃ɛ ku wɛɛ do awɔ. Nɔ didɔ̃i Ilaaɔ̃ ku wa si iŋɛ fei.