Timɔtee 2, 3 - Bibeli do fee

Waatii ankãanyi

¹ Í sĩa i mà ŋa iyi kuwɛɛ nwa á na ku gaabu si waatii ankãanyi.

² Amanɛ ŋa aa maa ce idei iri nŋa, lasabu nŋa fei si fiai á ya wa, aa jɛ woo tɔɔ fufu, aa nyisi iyi aŋa à jɛ ngɔgɔ, aa maa bu Ilaaɔ̃. A kaa jirima baa nŋa ŋa, aa jɛ gudulu ŋa, a kaa mà bɛɛrɛi Ilaaɔ̃.

³ Aa jɛ hai nɛ kubi ŋa, a kaa nɛ araarei inɛ ŋa, aa jɛ woo sɔ irii inɛ ŋa, a kaa mà ara nŋa, aa jɛ inɛ kugaabu ŋa, nɔ aa jɛ mbɛɛi woo ce jiida ŋa.

⁴ Aa jɛ ilu zamba ŋa, a kaa nɛ lasabu jiida, aa nɛ faau. Aa bi faayii andunya ku re Ilaaɔ̃.

⁵ Aa maa too kpãai Ilaaɔ̃ do gɛlɛ, amma ilu muafiti ŋai domi à kɔ̀si gbugbãɛ. Fa araɛ hai bi amanɛ dimi bɛɛbɛ ŋa.

⁶ Gɔgɔ ŋa aa maa lɔ kpasɛ̃ do kpasɛ̃ ŋa a maa kãmia inaabo hai donda kulɛlɛ ŋa. Inaabo ŋau, dulum du ŋa í caa nɔ à waa too binɛ ikã ikã fei.

⁷ Iju iyi í má fei inaabo bɛɛbɛ ŋau à waa dɛ aŋa a mà ngɔgɔ, amma a kaa nɔ a mà ntɔu pai.

⁸ Si bɛi Zanɛsi do Zambɛɛsi à kɔ̀si Moizi wo, bɛɛbɛ mɔi inɛ ŋau mɔ à kɔ̀si ntɔu, iri nŋa í sinda mam mam. Naanɛ ku dasi nŋa kù nɛ aranfãani kãma.

⁹ Amma kookaai nŋa kaa bɔò ŋa bii kãma, domi inɛ fei á na ku yɛ sũmu ku jɛ nŋa, si bɛi à yɛ ti Zanɛsi do Zambɛɛsi.

Iyi Pɔlu í dasi Timɔtee ku ce

¹⁰ Amma awɔ ì mà sãa sãa yaase bɛi ǹ kɔ inɛ ŋa si cio do yaase bɛi ǹ ce isɛɛnɛm bi tu ŋa, do mii ŋa iyi ǹ dasi idɔ n ce, do naanɛ ku dasim, do suurum, do kubim, do temuam.

¹¹ Ì mà bɔ̃nɛ iyi à nyisim do ijuukpã iyi í bam si ilui Antiɔsi do Ikonimu do Lisitu. Kù nɛ bɔ̃nɛ gɔ iyi n kù yɛ bɛ. Amma Lafɛ̃ɛ í nyam hai si fei ndɛɛ.

¹² Ntɔi, inɛ iyi wa bi ku ce kuwɛɛɛ dee dee si wajui Ilaaɔ̃ si anu akã iyi í ce do Jesu Kirisi kù nɛ bɛi á ce iyi kù yɛ ijuukpã.

¹³ Amma inɛ laalɔ ŋa do woo sɔ ibo ŋa waati kãma fei laalɔ nŋa í ya maa kɔ̃ɔsii. Si bɛi à waa dĩ ijui inɛ gɔ ŋa, bɛɛbɛ mɔi à waa dĩ ijui ara nŋa.

¹⁴ Amma awɔ, leekĩ dim dim si cio iyi à kɔɛ si iyi ì dasi naanɛ, domi ì mà inɛ ŋa iyi à kɔɛ si.

¹⁵ Hai keekeɛi, ì mà kukɔi idei Ilaaɔ̃ iyi á yɔkɔ ku muuɛ bisi i dasiò Jesu Kirisi naanɛ ku ba i ba faaba.

¹⁶ Kukɔi idei Ilaaɔ̃ fei hai bi Ilaaɔ̃i wa naa. Nɔ í nɛ aranfãani ku kɔ inɛ ŋa si cio, ku nyisi amanɛ kuraraɛ, nɔ ku dasiɛ kpãa jiida má, nɔ ku nyisiɛ yaase bɛi á jɛò dee dee,

¹⁷ ku ba inɛi Ilaaɔ̃ ku kɔ̃, nɔ ku tã sɔɔlu ku ceò icɛ jiida baa yooma fei.