Timɔtee 2, 2 - Bibeli do fee

Woo jabu jiidai Jesu Kirisi*

¹ Na nŋu, awɔ amam, mua araɛ gbugbã si didɔ̃ iyi à nɛ do anu akã nwa iyi à ce do Jesu Kirisi.

² Iyi ì gbɔ ǹ wa n fɔ si wajui ilu sɛɛda nkpɔu, daa ilu naanɛ gɔ ŋa mɔ si awɔ, inɛ ŋa iyi aa yɔkɔ a kɔ inɛ gɔ ŋa mɔ si cio.

³ Ijuukpã iyi á naa siɛ bɛi amu mɔ fei, jɔ̀ i jɛsi bɛi woo jabu jiidai Jesu Kirisi.

⁴ Sooge iyi í wa ikoi igũ ci ya ce wũai andunya bii wa bi ku ce idɔɔbii inɛ ngboɛ.

⁵ Woo ce gaasai ku sɛi kaa yɔkɔ ku ba ribai areɛ bii kù jɛ í jirima woodaɛ ŋa.

⁶ Bɛɛbɛ mɔi woo logoo iyi í ce icɛ do wahala nŋui á tako ku jɛ amaajɛɛ.

⁷ Lasabu si ide ŋa iyi ǹ wa n fɔu ihɛ̃, nɔ Lafɛ̃ɛ á sobiɛ i bɛi i gbɔò yaasei fei ndɛɛ.

⁸ Ye gigii Jesu Kirisi tɔkui Davidi iyi í jĩ hai si balɛu. Ideɛi í wa si laabaau jiidau iyi ǹ wa n waazo.

⁹ Na laabaau jiidaui ǹ wa n yɛ ijuukpã hee à dĩm do sesee bɛi woo ce laalɔ. Amma idei Ilaaɔ̃ si à dĩ.

¹⁰ Ŋɔi í jɔ̀ ǹ wa n temuaò fei ndɛɛ na irii inɛ ŋa iyi Ilaaɔ̃ í cicau, ku ba aŋa mɔ a ba faaba do saabui Jesu Kirisi, nɔ a nɛ ikpɛ̃ si amboeɛ iyi ci ya tã.

¹¹ Ide ilu naanɛ wee. Bii à ku do nŋu, aa ka wɛɛ do nŋu.

¹² Bii à temua, aa ka jɛ bomma do nŋu ajɔ. Bii à nɔ à kɔ̀siɛ, nŋu mɔ á kɔ̀si wa.

¹³ Baa bii à jɛ hai nɛ naanɛ ŋa, do nŋu fei, nŋu í jɛ ilu naanɛ, domi kaa yɔkɔ ku kɔ̀si araɛ.

Woo ce icɛ iyi kù waa ce anyɔi icɛɛ

¹⁴ Ye inɛɛ ŋa gigii ide ŋau ihɛ̃ fei nɔ i kɔnkɔn du ŋa si wajui Ilaaɔ̃ i ni a maà ya maa ce kakɔɔ si ide ŋa, domi dimii kakɔɔ bɛɛbɛ kù nɛ aranfãani kãma, í gbe ku jɔ̀ inɛ ŋa iyi à waa gbɔɔ a ce nfe.

¹⁵ Ce kookaai i maa ce iyi aa baò saabu si wajui Ilaaɔ̃, bɛi woo ce icɛ iyi kù waa ce anyɔi icɛɛ, iyi í ya maa sisi ide ntɔi Ilaaɔ̃ dee dee.

¹⁶ Amma waasu ide ŋa iyi a kù nɛ aranfãani gɔ nɔ a kaa sobi inɛ ŋa si naanɛ ku dasi nŋa, domi inɛ ŋa iyi à waa ce bɛɛbɛ à ya na a jĩò Ilaaɔ̃ a maa kooi.

¹⁷ Idei inɛ ŋau bɛ í yɛi bɛi juju sãmi iyi wa bɛjɛ ara. Si inɔ nŋai Himenee do Filɛtu à wa,

¹⁸ aŋa iyi à jɔ̀ kpãai ntɔ nɔ à waa kɛkɛ naanɛ ku dasii inɛ nkpɔ domi à ni awaatii kujĩi iku ŋa í lɔ tã.

¹⁹ Do nŋu fei, icui naanɛ ku dasi nwa iyi Ilaaɔ̃ í jilɛ do gbugbã kaa yaya. À mà iyi ntɔi si na iyi í jɔ̀ kukɔi idei Ilaaɔ̃ wa fɔ í ni, Lafɛ̃ɛ í mà inɛɛ ŋa. Nɔ í ni má, inɛ iyi wa kpe irii Lafɛ̃ɛ fei ku saa laalɔ ku ce.

²⁰ Si ile nla jɛɛ dimi ikã ikãi í ya wa bɛ. À ce gɔgɔ ŋa do wura, gɔgɔ ŋa mɔ do isɔ fũfũ. Inɛ nŋu ŋau bɛ ajɔi jingau nla ŋai à ya ceò icɛ. Amma gɔgɔ ŋa mɔ à wɛɛ má iyi à ce do amà, gɔgɔ ŋa mɔ kaalei, inɛ nŋu ŋa à ya maa ceò icɛi ajɔ fei.

²¹ Na nŋu, inɛ iyi wa nya araɛ hai si laalɔ ŋa iyi ǹ fɔ ideɛu fei, á yɛi bɛi jɛɛ iyi í nɛ bɛɛrɛ. Á jɛ inɛ iyi Ilaaɔ̃ í cica ikã ku jɛ tɛɛ mam mam, nɔ Lafɛ̃ɛ á yɔkɔ ku ceò icɛ si na iyi í jɔ̀ í tã sɔɔlu ku ceò icɛ jiida baa yooma fei.

²² Saa kubi nfe nfei awaasũ ŋa, dɛdɛ kpãai dee dee ku jɛ, do naanɛ ku dasi, do kubi, do laakai ku sũ, awɔ do inɛ ŋa iyi à waa tɔɔ Lafɛ̃ɛ do inɔ akã.

²³ Amma maà ya ce kakɔɔ si mii iyi kù nɛ aranfãani do iyi kù nɛ yaase, domi ì mà kãm kãm iyi nŋui í ya na ku bí ija.

²⁴ Nɔ wee kù sĩa woo ce icɛi Lafɛ̃ɛ ku maa ja, amma í sĩa ku bi inɛ fei, nɔ ku jɛ inɛ iyi á yɔkɔ ku kɔ si cio nɔ ku ya temua.

²⁵ Inɛ ŋa iyi a kù waa jɛsi ideɛ í sĩa ku ba ŋa ide ku fɔ do kurɔ. Á yɔkɔ ku jɛ Ilaaɔ̃ á mu nŋa kpãa a kpaasiò idɔ nŋa a mà ntɔ,

²⁶ nɔ laakai nŋa ku baa, a gbã hai si taai Seetam, nŋu iyi wa mu ŋa wo nɔ í jɔ̀ à waa ce idɔɔbiɛ.