Timɔtee 2, 1 - Bibeli do fee

Pɔlu í ce Timɔtee fɔɔ

¹ Amui Pɔlu, woo bɛi Jesu Kirisi si idɔɔbii Ilaaɔ̃. Ilaaɔ̃ í dasim n sisi idei kuwɛɛ iyi í wãò wa si anu akã nwa do Jesu Kirisi.

² Amui ǹ kɔɛ tiau ihɛ̃ wa Timɔtee, awɔ iyi ǹ bi jiida nɔ ì yɛ bɛi amaabím si kpãai naanɛ ku dasi. Ilaaɔ̃ Baaba do Jesu Kirisi Lafɛ̃ɛ nwa a ce araareɛ a muuɛ didɔ̃ do laakai ku sũ.

Saabu do gbugbã ku mua

³ Ǹ wa n saabu Ilaaɔ̃, nŋu iyi ǹ wa n tɔɔ do idɔ hai nɛ taale si bɛi balam ŋa à tako à ce wo. Waati kãma fei ǹ ya n maa n saabu Ilaaɔ̃ na iriɛ, nɔ dasãò idũ fei ǹ ya n maa n ye gigiɛ si kutɔɔm.

⁴ Ǹ wa n ye gigii kukpataɛ, nŋui í jɔ̀ ǹ bi ku yɛɛ ntɔ ntɔ ku ba inɔ didɔ̃m nɔu ku kɔ̃.

⁵ Ǹ wa n ye gigii naanɛ ku dasi hai nɛ muafiti iyi ì nɛ. Dimiɛi ayiɛ Loisi do iyeɛ Enisi à nɛu. Ǹ mà kãm kãm iyi awɔ mɔ ì nɔɔ.

⁶ Ŋɔi í jɔ̀ ǹ wa n yeɛ gigi iyi í sĩa i ce icɛ do amua iyi Ilaaɔ̃ í muuɛ si waati iyi ǹ leɛ awɔ si iriu,

⁷ domi Hunde iyi Ilaaɔ̃ í mu nwa kaa jɔ̀ ka ce njo, amma í ya jɔ̀ ka nɛ gbugbãi do kubi do ara ku mu.

⁸ Na nŋu, maà ti i ce anyɔi sɛɛdai Lafɛ̃ɛ nwa ku jɛ, nɔ i maà ya ce anyɔi amu takam, amu iyi ǹ wa ile piisɔ̃ɔ na iriɛ. Amma jɔ̀ i jɛsi awaɛ ka yɛ ijuukpã ajɔ na irii laabaau jiidau nɔ ka maa nɛò gbugbã iyi Ilaaɔ̃ í mu nwa.

⁹ Nŋui í faaba wa nɔ í kpe wa ka jɛ inɛɛ ŋa. Kù jɛ na icɛ nwa ŋa iyi à ce, amma si na iyi í jɔ̀ nŋu takaɛ í bi bɛɛbɛi na didɔ̃ɛ. Didɔ̃ɛu í jilɛ nwai hai tako tako na anu akã nwa iyi à ce do Jesu Kirisi.

¹⁰ Nsɛi, kunaai woo faaba nwa Jesu Kirisii í nyisi wa didɔ̃u. Jesu Kirisiui í kpa irii gbugbãi iku nɔ í nyisi wa kuwɛɛ iyi ci ya tã na saabui laabaau jiidau.

¹¹ Ilaaɔ̃i í jɔ̀ ǹ jɛ woo bɛ do woo kɔsi cio ku ba n sisia inɛ ŋa laabaau jiidau.

¹² Ŋɔi í jɔ̀ ǹ wa n yɛ ijuukpãu ihɛ̃. Amma anyɔ kù waa muum, domi ǹ mà inɛ iyi ǹ dasi naanɛ ǹ nɔ ǹ mà kãm kãm iyi í nɛ gbugbã ku maa mu ide iyi í jɔ̀ɔm nɔu hee ajɔu koo toò wa.

¹³ Mu ide ntɔu iyi ǹ sisiɛ, muu do naanɛ jiida do kubi iyi à nɛ si anu akã nwa do Jesu Kirisi.

¹⁴ Mu ide jiida iyi à daɛ si awɔ, muu do gbugbãi Hundei Ilaaɔ̃ iyi í wa si wa.

¹⁵ Awɔ takaɛ ì mà iyi inɛi Azii ŋau fei à fũsim awɔ. Si inɔ nŋa bɛi Fizɛli do Hɛɛmɔzɛni à wa.

¹⁶ Ilaaɔ̃ kú ce araarei nyaanzei Onɛzifɔɔ domi í muum gbugbã isɛ fɛɛfɛlo. Kù nɔ kù ce baa anyɔi iyi ǹ wa piisɔ̃ɔ.

¹⁷ Iyi í to wa Romu mɔm í dɛdɛɛm nii do inɔ akã hee í koo í yɛm.

¹⁸ Nɔ Lafɛ̃ɛ ku jɔ̀ Ilaaɔ̃ ku ce araareɛ si ajɔi kiitiu. Awɔ takaɛ ì mà sãa sãa icɛ iyi í ceem Efɛɛzu.