Kɔrɛnti 2, 9 - Bibeli do fee

Sobi iyi aa sambaa woo dasi naanɛ ŋa

¹ Kù jɛɛm tilasi n kɔ nŋɛ tia wa na sobi iyi á jɛ ti woo dasi Jesu naanɛ ŋa iyi à wa ilɛi Zudee.

² Ǹ wa n fɔ bɛɛbɛi si na iyi í jɔ̀ ǹ mà kubi jiida nŋɛ nɔ ǹ tɔɔ fufu na iri nŋɛ bi inɛi Masedɔni ŋa ǹ ni iŋɛ woo dasi naanɛ ŋa iyi ì wa ilɛi Gɛrɛsi ŋa ì tã sɔɔlui sobiu hai icĩ ŋa. Himma nŋɛ í dasi inɛ nkpɔ nŋa kookaai.

³ Do nŋu fei, ǹ wa n bɛ si ŋɛ inɛ nwa ŋau ihɛ̃ wa ku ba fufu ku tɔɔ nwa na iri nŋɛ ku maà jɛ ngbɛ si ideu ihɛ̃. Ǹ bi i wɛɛò sɔɔlu ŋa si bɛi ǹ fɔu.

⁴ Bii kù jɛ bɛɛbɛ, bii inɛi Masedɔni gɔ ŋa à sim wa, nɔ à na à ba i kù ce sɔɔlu ŋa, naanɛ nwa iyi à nɛ si ŋɛ á kpaasi anyɔ. Aa fɔ idei iŋɛ má?

⁵ Na ŋɔi í jɔ̀ ǹ yɔɔ iyi í sĩa n tɔɔ kpaasi nwa ŋau ihɛ̃ a cuam wa bi tu ŋɛ a ceò sɔɔlui amua jiida iyi ì wãu tã ŋa. Si bɛɛbɛ á maa jilɛi hee n maa n to wa, nɔ ku nyisi iyi ì waa na do inɔ akã ŋa, kù jɛ do tilasi.

⁶ I kù mà ŋa, inɛ iyi í gbɛ̃ keeke, keekei í ya da? Inɛ mɔ iyi í nɔ í gbɛ̃ í la, nla nlai í ya da.

⁷ Na nŋu, í sĩa inɛ fei ku na bɛi í dasi idɔ, ku maà ti ku jɛ do tilasi walakɔ do weewea, domi inɛ iyi wa na do inɔ didɔ̃i Ilaaɔ̃ í bi.

⁸ Ilaaɔ̃ á yɔkɔ ku jɔ̀ didɔ̃ ikã ikã fei ku caa si ŋɛ ku ba i nɛ fei ndɛɛ do ajɔ fei ŋa. Si bɛɛbɛi aa ba bukaatai mii iyi ì bi fei ŋa, hee ku gbe nŋɛ nla nla i ceò icɛ jiida fei ŋa.

⁹ Bɛɛbɛi kukɔi idei Ilaaɔ̃ wa fɔ í ni, Ilaaɔ̃ í ya cea ilu are ŋa amuai do inɔ akã. Inɔ akã ku nɛɛ í ya maa wɛɛi hee do ajɔ fei.

¹⁰ Ilaaɔ̃i í ya na woo gbɛ̃ dimi nɔ ku jɔ̀ ku so jiida ku jɛ mii iyi á jɛ. Nŋu mɔi á mu nŋɛ gbugbã i ceò amuau ŋa. Amuau á yɛi bɛi dimi iyi ì waa gbɛ̃ ŋa, nɔ Ilaaɔ̃ ku jɔ̀ icɛ jiida nŋɛu ku la nɔ ku so iso nkpɔ nkpɔ.

¹¹ Á na ŋɛ amani ikã ikã fei iyi á to i ya ceò amua ŋa do inɔ didɔ̃. Nɔ inɛ nkpɔ á saabu Ilaaɔ̃ na amua nŋɛ iyi aa ka na ŋau.

¹² Ntɔ ntɔ, icɛ iyi ì waa ce ŋa wa wũa bukaatai woo dasi naanɛ ŋa jiida. Amma kù jɛ baa iyi bɛ nŋu akã. Á jɔ̀ inɛ nkpɔ ku saabu Ilaaɔ̃.

¹³ Amuau á dɔ̃a inɛ ŋa si hee ku jɔ̀ a maa saabu Ilaaɔ̃ do yaase bɛi ì waa jirimaɛ ŋa. Ilaaɔ̃ ku jirima nŋɛi wa nyisi iyi ì dasi laabaau jiidai Kirisi naanɛ ŋa. Nɔ aa nyi a saabuɛ má do yaase bɛi ì ce ikpɛ̃i amani nŋɛ do inɔ akã do aŋa hee do inɛ ŋa iyi à gbe fei.

¹⁴ Aa ce nŋɛ kutɔɔ do kubi nla nla na irii didɔ̃ nlau ihɛ̃ iyi Ilaaɔ̃ í ce nŋɛ.

¹⁵ Ka saabu Ilaaɔ̃ na amuaɛ iyi í kpeeò ku fɔ do gɛlɛ.