Kɔrɛnti 2, 8 - Bibeli do fee

I ce amua do inɔ didɔ̃ ŋa

¹ Iŋɛ kpaasim ŋa, à bi i mà ŋa bɛi Ilaaɔ̃ í cea igbɛi inɛi Jesu ŋa iyi à wa ilɛi Masedɔni didɔ̃.

² Aŋai à yɛ laakai ku cɔ si ijuukpã jiida. Amma inɔ didɔ̃ nla nŋa í jɔ̀ à ce amua nŋa do inɔ akã, baa do iyi are nŋa í la.

³ Ǹ jɛ sɛɛda iyi à na do idɔɔbi nŋa zaka bɛi à yɔkɔ, nɔ à na mɔm nii hee í re zaka bɛi a kù waa tamaaò.

⁴ À mante wa ntɔ ntɔ à ni ka jɔ̀ aŋa mɔ aŋa a na sobii aŋa na irii woo dasi naanɛ ŋa iyi à wa ilɛi Zudee.

⁵ À ce í re baa zaka bɛi à waa tamaa. Sinte titã à na Lafɛ̃ɛ ara nŋa, à bɛi à na awa mɔ ara nŋa do idɔɔbii Ilaaɔ̃.

⁶ Nŋui í jɔ̀ à tɔɔ Titee ku naa bi tu ŋɛ ku na ku sobi ŋɛ si bɛi í tako í sintiɛ, ku ba iŋɛ mɔ i tambɔ icɛ jiidau bɛ ŋa.

⁷ Fei ndɛɛ í caa si ŋɛ, hai naanɛ ku dasi do ide ku fɔ do kumà, do himma nŋɛ si mii fei, do kubi nwa iyi ì nɛ ŋa. Nŋui í jɔ̀ à bi icɛ jiidau bɛ mɔ ku caa si ŋɛ.

⁸ Kù jɛ woodai ǹ wa n na ŋɛ, himmai inɛ gɔ ŋai ǹ wa n sɔ̃ ŋɛ ku ba ku mu nŋɛ kpãa iyi á jɔ̀ inɛ ŋa a yɔɔ iyi kubi nŋɛu ntɔi.

⁹ Ì nɔ ì mà didɔ̃i Lafɛ̃ɛ nwa Jesu Kirisi ŋa, nŋu iyi í tako í jɛ ilu amani, nɔ í ce araɛ ilu are na iri nŋɛ ku ba areɛu ku ce ŋɛ ilu amani ŋa.

¹⁰ Si ideu ihɛ̃ ikɔi ǹ wa n na ŋɛ. Hai icĩ iŋɛi ì jɛ inɛ sinte ŋa si icɛu. Kù jɛ si kuceɛ nŋu akã, amma sinte iŋɛi ì dasi idɔ i coo ŋa. Iŋɛi í sĩa i temua i mɔsiò icɛu ŋa.

¹¹ Na nŋu, i hanya si bɛɛbɛ nsɛi i kpa irii icɛu ŋa. Si bɛi ì dasi idɔ ntɔ ntɔ ì sintiɛ do himma ŋa, bɛɛbɛ mɔi á sĩa i tambɔɛ ŋa do himma si bɛi kunɛ nŋɛ í to.

¹² Bii ì na do inɔ akã, Ilaaɔ̃ í ya gbai. Zaka bɛi ì nɛi í ya cɔ, nɔ baaɛ ci ya wa si iyi i kù nɛ ŋa.

¹³ N kù bi ti iŋɛ mɔ ku na ku maa gaizia ŋɛ na faabai inɛ gɔ ŋa, amma í sĩa kunɛ nŋɛ do tu ŋa ku munga.

¹⁴ Si nsɛi, kunɛ nŋɛ í la. Na nŋu, aa yɔkɔ i sobi inɛ ŋa iyi à wa si are. Nɔ ajɔ iyi iŋɛ mɔ ì na ì wa si are, bii kunɛ nŋa í la, aŋa mɔ a sobi ŋɛ. Bɛɛbɛi kunɛi iŋɛ fei á maa munga.

¹⁵ Bɛɛbɛi kukɔi idei Ilaaɔ̃ í fɔ í ni, inɛ iyi í kó í kpɔ, kù re gũa. Inɛ mɔ iyi í ko keeke, kù gaizia gũa.

Inɛ ŋa iyi à bɔ amuau ku gba wa

¹⁶ Ǹ wa n saabu Ilaaɔ̃, nŋu iyi í jɔ̀ Titee í bi ŋɛ bɛi awa taka nwa à bi ŋɛ.

¹⁷ Waati iyi ǹ tɔɔɛ ku naa bi tu ŋɛ í jɛsi idem tengi bɛ gbakã, nɔ nŋu takaɛ í dasi idɔ mɔm wo ntɔ ntɔ ku naa bi tu ŋɛ hai a kù sɔ̃ɔ.

¹⁸ Nɔ à waa bɛ inɛ nwa gɔ wa do nŋu takaɛ ajɔ, inɛ iyi igbɛi inɛi Jesu ŋa fei à waa saabu na icɛi laabaau jiidau iyi wa ce.

¹⁹ Iyi í re mɔm, igbɛi inɛi Jesu ŋa à cicaɛ ku si wa si isɛɛnɛ nwa ka naaò amuau wa. Icɛu à waa cooi ka naò Lafɛ̃ɛ takaɛ amboe nɔ ka nyisiò iyi à nɛ idɔ jiida ka sobiò inɛ ŋa.

²⁰ À waa ce kookaai ku ba inɛ gɔ ku maà yɛ taale nwa na fia nlau ihɛ̃ ku muɛ iyi à da nwa si awɔ.

²¹ Ntɔ ntɔ, à waa bi ka ce mii iyi í sĩa, ku maà jɛ si ijui Lafɛ̃ɛ nŋu akã, amma do bi amanɛ ŋa fei.

²² À waa bɛ ŋa do inɛ nwa gɔ má, inɛ iyi à cɔ laakaiɛ isɛ fɛɛfɛlo, à nɔ à yɛ í jɛ ilu himma si icɛ nkpɔ. Amma nsɛi himmaɛ í kɔ̃ɔsi domi wa naanɛ ŋɛ ntɔ ntɔ.

²³ Inɛ ŋa iyi à bɛ si ŋɛ ŋau wee. Titee nŋui í jɛ minjisiam iyi wa bam icɛ ku ce bi tu ŋɛ. Inɛ ŋa mɔ iyi aa suu wa, aŋai à jɛ woo bɛi igbɛi inɛi Jesu ŋa nɔ à jɛ inɛ ŋa iyi à waa na Kirisi amboe.

²⁴ Na nŋu, i nyisi ŋa iyi ì bi ŋa ŋa ntɔ ntɔ, ku ba igbɛi inɛi Jesu ŋa a mà iyi à nɛ kpãa ka tɔɔ fufu na iri nŋɛ.