Kɔrɛnti 2, 7 - Bibeli do fee

¹ Baakɔɔm ŋa, kuwãu ihɛ̃ fei tu wai. Na nŋu, ka jɔ̀ idɔ nwa ku má sãa sãa si mii fei ku ba ara nwa do idɔ nwa ku maà nɛ taale kãma, nɔ kumá nwa ku kɔ̃ si Ilaaɔ̃ nɔ ka mà bɛɛrɛɛ.

Inɔ didɔ̃i Pɔlu

² I jɔ̀ i nɛ kubi nwa ŋa. A kù raraa inɛ gɔ, a kù bɛjɛ kuwɛɛi inɛ gɔ, a kù nɔ a kù takii inɛ gɔ.

³ N kù wa n fɔ bɛɛbɛ na n yɛ taale nŋɛ. Ntɔi, si bɛi ǹ fɔ tã, à nɛ kubi nŋɛ si idɔ nwa, baa bii í jɛ si kuwɛɛ walakɔ si andɛi ikui.

⁴ Ǹ wa n naanɛ ŋɛ ntɔ ntɔ, nɔ ǹ wa n tɔɔ fufu na iri nŋɛ si mii fei. Ǹ ba gbugbã na iri nŋɛ nɔ inɔm í dɔ̃ í caa si ijuukpã nwa fei.

⁵ Ijuukpãu í jɔ̀ a kù sĩmi waati iyi à to ilɛi Masedɔni. À ba ijuukpã ikã ikã baa yooma fei. À ya ka ba ija hai waduude nɔ si idɔ nwa njo wa mu wa.

⁶ Amma Ilaaɔ̃, nŋu iyi wa mua ilu inɔ kufɔ ŋa gbugbã, í jɔ̀ kunaai Titee í mu nwa gbugbã.

⁷ Kù jɛ kunaaɛ nŋu akãi í mu nwa gbugbã, amma iyi í ni má iŋɛ taka nŋɛ ì mua nŋu gbugbã ŋa. Í nɔ í sɔ̃ wa bɛi ì waa bi ku yɛm ŋa ntɔ ntɔ, do bɛi ì nɛ inɔ kufɔ ŋa, do bɛi ì nɛ kubim ŋa jiida. Ideɛu í jɔ̀ inɔ didɔ̃m í kɔ̃ɔsi hee í caa.

⁸ Na ŋɔi í jɔ̀ baa bii tia iyi ǹ kɔ nŋɛ í fɔ inɔ nŋɛ, n kù nɛ inɔ kufɔ do iyi ǹ kɔɔ. Ǹ tako ǹ nɛ inɔ kufɔɛ si waati iyi ǹ yɛ í fɔ inɔ nŋɛ si waati keeke gɔ.

⁹ Amma nsɛi inɔm í dɔ̃. Kù jɛ na iyi í jɔ̀ ǹ fɔ inɔ nŋɛ, amma si na iyi í jɔ̀ inɔ kufɔ nŋɛ í jɔ̀ ì kpaasi daa ŋa. Bɛɛbɛi í ce si na iyi í jɔ̀ Ilaaɔ̃ í ceò inɔ kufɔ nŋɛ icɛ. Na nŋu, a kù ce nŋɛ laalɔ kãma.

¹⁰ Ntɔ ntɔ, inɔ kufɔ iyi Ilaaɔ̃ wa ceò icɛ í ya jɔ̀ inɛ ku kpaasi daaɛ nɔ ku ba faaba. Dimii daa ku kpaasi bɛɛbɛ i kaa ni, bii ǹ mà. Amma inɔ kufɔi andunya í ya bí ikui.

¹¹ Ilaaɔ̃ í ceò inɔ kufɔ nŋɛu icɛ, nɔ i cɔ ribaɛ nsɛi ŋa. I cɔ zaka bɛi inɔ kufɔu í jɔ̀ ì ce laakai ŋa ì ce himma ì kɔ̀ò ara nŋɛ ŋa. Nɔ í jɔ̀ inɔ nŋɛ kù waa dɔ̃ wo nɔ ì waa ce njo ŋa, ì kpã woo ce laalɔu iju ŋa. Nɔ í jɔ̀ ì bi i yɛm má ŋa nɔ ì nɛ kubim ŋa. Si fei ndɛɛ ì nyisi iyi ì maaju si ideu ŋa.

¹² Na nŋu, bii ǹ kɔ nŋɛ tiau wa, n kù kɔɔ na inɛ iyi í ce laalɔu nŋu akã, walakɔ na inɛ iyi í cea laalɔu nŋu akã. Amma ǹ kɔɔi ku ba i mà sãa sãa ŋa si wajui Ilaaɔ̃ iyi ì nɛ kubi nwa ntɔ ntɔ ŋa.

¹³ Na ŋɔi í jɔ̀ à ba gbugbãu. Kù nɔ kù jɛ gbugbã nŋu akãi à ba, amma iyi í re mɔm, à yɛ iyi Titee í wɛɛò inɔ didɔ̃ si na iyi í jɔ̀ iŋɛ fei ì tũ inɔɛ ŋa. Nŋu bɛi í jɔ̀ inɔ didɔ̃ nwa í kɔ̃ɔsi má.

¹⁴ Baa bii ǹ tɔɔ fufu keeke bi tɛɛ na iri nŋɛ wo, i kù dasim anyɔ ŋa. Do yaase bɛi ide ŋa iyi à sɔ̃ ŋɛu fei ntɔi, bɛɛbɛ mɔi Titee í yɔɔ iyi fufu ku tɔɔ nwa si ntɔi.

¹⁵ Kubi nŋɛ iyi Titee í nɛ wa kɔ̃ɔsi si bɛi wa ye gigi iyi iŋɛ fei ì jirimaɛ nɔ ì gbaa ŋa do bɛɛrɛ nla nla.

¹⁶ Ǹ nɛ inɔ didɔ̃ do iyi an yɔkɔ n dasi ŋɛ naanɛ si mii fei.