Kɔrɛnti 2, 6 - Bibeli do fee

¹ Awa iyi à waa ce icɛ do Ilaaɔ̃ ajɔ, à waa tɔɔ ŋɛi i maà jɔ̀ didɔ̃ iyi Ilaaɔ̃ í ce nŋɛu ku ce nfe.

² Si tiai idei Ilaaɔ̃ à kɔɔ à ni, Ilaaɔ̃ í ni, ǹ gbɔ kutɔɔɛ nɔ ǹ jɛɛ si waati jiida. Ǹ sobiɛ si ajɔi faaba. To, nsɛii í jɛ waati jiidau, nnyii ajɔi faaba.

³ A kù waa bi inɛ gɔ ku yɛ taalei icɛ nwa. Nŋui í jɔ̀ a kù waa ce ngɔgɔ iyi á dasi inɛ kurara.

⁴ Amma si kuce nwa fei à waa bi kuwɛɛ nwa ku nyisi iyi à jɛ woo ce icɛ jiidai Ilaaɔ̃ ŋa. À waa temua ntɔ ntɔ si wahala do si are do si ijuukpã.

⁵ À tɛ nwa kpɔtɔɔ à dasi wa piisɔ̃ɔ, nɔ inɛ ŋa à dede gidi si wa amma si fei ndɛɛ à yɔkɔ temua. À ya ka ce icɛ hee ka gbɛɛji, à ya ka wɔ njoo, nɔ à ya ka dĩ anu.

^6-7 À waa nyisi iyi à jɛ woo ce icɛi Ilaaɔ̃ ŋa do kuwɛɛ jiida nwa, do kumà nwa, do suuru nwa, do jiida ku jɛ nwa, do kubi hai nɛ muafiti nwa, do idei ntɔu ku waazo. Nɔ gbugbãi Ilaaɔ̃ do icɛ iyi Hundeɛ wa ce si wa wa nyisi iyi à jɛ woo ce icɛɛ ŋa. Dee dee ku jɛi í jɛ nyaui igũ nwa iyi à ya ka jaò nɔ ka kɔ̀ò ara nwa.

⁸ À ya ka temuai bii inɛ ŋa à mà bɛɛrɛ nwa walakɔ bii à waa nya fũnɛ nwa. Bɛɛbɛ mɔi à ya ka temua bii à waa fɔ jiida nwa walakɔ bii à waa fɔ laalɔ nwa. À waa cɔ wa bɛi woo sɔ ibo ŋa baa do iyi à waa fɔ ntɔ fei.

⁹ À waa cɔ wa bɛi a kù mà wa, baa bii inɛ fei í mà wa sãa sãa. À waa cɔ wa bɛi inɛ ŋa iyi à kasãm, amma hee nsɛi à wɛɛ si baani. À kpã wa iju ntɔ ntɔ, amma a kù kpa wa.

¹⁰ À waa cɔ wa bɛi ilu inɔ kufɔ ŋa, amma à ya ka maa nɛ inɔ didɔ̃i waati kãma fei. À waa cɔ wa bɛi ilu are ŋa, amma à waa mua inɛ nkpɔ amani. À waa cɔ wa bɛi a kù nɛ ngɔgɔ, amma à nɛ fei ndɛɛ.

¹¹ Iŋɛ inɛi Kɔrɛnti ŋa, à sɔ̃ ŋɛ ide ntɔ iyi í wa si idɔ nwa fei. Idɔ nwa í nɛ kubi nŋɛ jiida jiida.

¹² Kubi nwa kù kaye si gãmɛ nŋɛ, amma iŋɛi i kù na wa ara.

¹³ Na nŋu, i ce nwa bɛi awa mɔ à waa ce nŋɛ. Ǹ wa n ba ŋɛ ide ku fɔ bɛi amam ŋa, i jɔ̀ i bi wa jiida jiida ŋa.

I maà nɛ anu tɔɔsi do hai dasi Jesu naanɛ ŋa

¹⁴ I maà nɛ anu tɔɔsi do hai dasi Jesu naanɛ ŋa domi i kù jɔ ŋa ŋa. Bɛirei jiida do laalɔ á ce ku tɔtɔɔ. Mà bɛirei inya kumá do ilu kuku á ce ku tɔtɔɔ.

¹⁵ Bɛirei Kirisi do Seetam aa ce a gbɔsi njɛ. Mà mii woo dasi Jesu naanɛ do hai dasi naanɛ à nɛ si gãmɛi njɛ.

¹⁶ Bɛirei bi kuwai Ilaaɔ̃ do iwɛ̃ ŋa á ce ku tɔtɔɔ. Awai à jɛ bi kuwai Ilaaɔ̃, nŋu iyi í jɛ icui kuwɛɛ. Nɔ nŋu takaɛ í fɔ í ni, an wɛɛ do aŋa nɔ awaò ŋa ka maa nɛ. An jɛ Lafɛ̃ɛ nŋa nɔ aa jɛ inɛm ŋa.

¹⁷ Na ŋɔi í jɔ̀ Ilaaɔ̃ í nyi í ni má, i fa ara nŋɛ hai bi tu ŋa nɔ i jĩò ŋa ŋa. I maà lu mii iyi í riisi ŋa. Bii ì waa ce bɛɛbɛ ŋa an gba ŋɛ.

¹⁸ An jɛ baa nŋɛ, nɔ iŋɛ mɔ aa jɛ ama inɛmɔkɔ do ama inaabom ŋa. Mii iyi Ilaaɔ̃ ilu gbugbã fei í fɔ mbɛ.