Kɔrɛnti 2, 5 - Bibeli do fee

¹ Arai í jɛ bi kuwa nwa si ilɛu ihɛ̃. Nɔ à mà bii ara nwa í ku, Ilaaɔ̃ í jilɛ nwa bi kuwa lele iyi nŋu takaɛ í ce, kù jɛ amanɛ. Bi kuwau á maa wɛɛi do ajɔ fei.

² Nɔ à wasi ku weewea si na iyi í jɔ̀ à waa bi ku dasi bi kuwai leleu bɛi amanɛ í ya dasi ibɔ.

³ À bi bɛɛbɛi domi bii à dasi, a kaa ka wɛɛ basĩ má.

⁴ Ntɔ ntɔ, si waati iyi à wa si arau ihɛ̃ à waa weewea à waa nɛ bɛi inɛ iyi aso wa wɔɔ. Kù jɛ à bi ka wɛɛ hai nɛ ara amma à bi a da nwa si ara titɔ̃i leleu, ku ba kuwɛɛu ku kpa irii mii ŋa iyi í jɛ ti iku.

⁵ Inɛ iyi í jilɛ nwa mii ŋau ihɛ̃ nŋui í jɛ Ilaaɔ̃. Nŋui í mu nwa Hundeɛ bɛi kaazigi.

⁶ Nŋui í jɔ̀ à ya ka nɛ wɔɔkɔ ajɔ fei baa do iyi à mà si waati iyi à wa si arau ihɛ̃ à jĩò Lafɛ̃ɛ.

⁷ À waa ce isɛɛnɛ nwa na naanɛ ku dasi, kù jɛ na mii iyi à waa yɛ.

⁸ Ntɔ ntɔ à ya ka nɛ wɔɔkɔ. Amma iyi à bi í re fei ndɛɛ nŋui í jɛ ka jɔ̀ arau ihɛ̃ ka bɔ bi Lafɛ̃ɛ ka maa wa bi tɛɛ.

⁹ Nŋui í jɔ̀ à waa ce kookaai ka ce iyi á dɔ̃a Lafɛ̃ɛ si, bii í jɛ à wɛɛ si arau ihɛ̃ walakɔ bii à ku.

¹⁰ Í sĩa ka ce iyi á dɔ̃aa si domi kù nɛ bɛi aa ka ce iyi a kù leekĩ si wajui Kirisi ku kiiti wa awa fei, nɔ ku sãa inɛ fei si bɛi kookoosu iyi í ce si kuwɛɛɛ í to, bii laalɔi, bii í nɔ í jɛ jiida mɔi.

Kirisi* í jɔ̀ à dɔ̃ do Ilaaɔ̃

¹¹ Ilaaɔ̃ í mà wa sãa sãa, nɔ bɛɛbɛ mɔi ǹ tamaa iŋɛ taka nŋɛ ì mà wa ŋa. À waa dɛ ka kãmia inɛ ŋai si na iyi í jɔ̀ à mà bɛɛrɛi Lafɛ̃ɛ.

¹² Kù jɛ à waa tɔɔ fufu bi tu ŋɛ. Amma à waa bi i ba yaase bɛi aa ce i wɛɛò inɔ didɔ̃ ŋai na iri nwa. Bɛɛbɛi aa ba bɛi aa jɛa inɛ ŋa iyi à waa tɔɔ fufu na mii ŋa iyi à waa yɛ nŋu akã, nɔ à fũsi iyi í jɛ ti idɔu awɔ.

¹³ Bii à waa ce wa sũmu, na Ilaaɔ̃i. Bii à nɔ à waa ce wa ilu laakai ŋa mɔi, na iri nŋɛi.

¹⁴ Kubii Kirisii wa nɛ̀ò wa. Awa à mà kãm kãm iyi inɛ akãi í ku na inɛ fei, à nɔ à mà iyi inɛ feii í nɛ ikpɛ̃ si ikuɛ.

¹⁵ Í kui na inɛ fei ku ba inɛ ŋa iyi à wɛɛ si hunde a maà wɛɛ na irii aŋa taka nŋa má, í gbe na iriɛ, nŋu iyi í kú nɔ í jĩ na iri nŋa.

¹⁶ Na nŋu, bɛbɛi a kaa ka cɔ iyi à waa yɛò iju si amanɛ nŋu akã. Baa bii bɛɛbɛi à tako à cea Kirisi wo, nsɛi a kaa ka ce bɛɛbɛ má.

¹⁷ Bii inɛ gɔ í nɛ anu akã do Kirisi í jɛ inɛ titɔ̃. Mii ndii tako ŋau à lɔ, mii titɔ̃ ŋai à sãsi wa.

¹⁸ Mii ŋau ihɛ̃ fei icɛi Ilaaɔ̃i, nŋu iyi í jɔ̀ à dɔ̃ do nŋu na saabui Kirisi, nɔ í bɛ wa ku ba awa mɔ ka jɔ̀ inɛ ŋa a dɔ̃ do nŋu.

¹⁹ Ntɔ ntɔ, na saabui Kirisii Ilaaɔ̃ í jɔ̀ inɛ ŋa à dɔ̃ do nŋu. Í kpa idei dulum du ŋa kù waa dooaɛ má, nɔ í jilɛ nwa icɛ ka sisia inɛ ŋa bɛi aa ce a dɔ̃ do nŋu.

²⁰ Na nŋu, à jɛ woo bɛi Kirisi ŋa. Í yɛi bɛi Ilaaɔ̃ takaɛi wa ba ŋɛ ide ku fɔ hai bi tu wa nɔ à waa tɔɔ ŋɛ do irii Kirisi, i jɔ̀ i dɔ̃ do Ilaaɔ̃ ŋa.

²¹ Kirisi, nŋu iyi kù ce dulum kãma, nŋui Ilaaɔ̃ í kãa dulum du wa ku ba ka jɛ dee dee si wajuɛ na anu akã nwa iyi à ce do Kirisi ajɔ.