Kɔrɛnti 2, 3 - Bibeli do fee

Amaacɛ ŋa iyi aa sisia inɛ ŋa akabuu titɔ̃

¹ Ide iyi à fɔ nsɛiu ihɛ̃ í yɛ bɛi à waa tɔɔ fufu mái? Awa mɔ à nɛ bukaatai ka naa bi tu ŋɛ do tia iyi á sisi nŋɛ yaase nwai bɛi inɛ gɔ ŋa à ya ce? Mà ka tɔɔ ŋɛ i kɔ nwa dimiɛ ŋai.

² Iŋɛ taka nŋɛi ì jɛ bɛi tia nwa iyi à kɔ si idɔ nwa. Ì yɛ ŋai bɛi tia iyi inɛ fei í mà wa cioɛ.

³ Kuce nŋɛ wa nyisi ntɔ ntɔ iyi iŋɛi í jɛ bɛi tia iyi Kirisi í kɔ na icɛ nwa iyi à ce si inɔ nŋɛ. Tiau, kù jɛ do inyii ìlìlìi à kɔɔ, amma do Hundei Ilaaɔ̃i à kɔɔ, nŋu iyi í jɛ icui kuwɛɛ. Kù jɛ si kutai à kɔɔ, si idɔi amanɛ ŋai.

⁴ Naanɛ nŋui à nɛ si wajui Ilaaɔ̃ do saabui Kirisi.

⁵ Ntɔi, a kù to ara nwa ka ni à ce ngɔgɔ do ara nwa. Mii iyi à yɔkɔ à waa ce fei, hai bi Ilaaɔ̃i wa naa,

⁶ domi nŋui í mu nwa gbugbã ka jɛò amaacɛɛ ŋa ka sisia inɛ ŋa akabuu titɔ̃. Akabuuu kù waa ce icɛ do wooda iyi à kɔu, bii kù jɛ do Hundei Ilaaɔ̃. Wooda iyi à kɔu í ya jɔ̀ inɛ ku kui, amma Hundei Ilaaɔ̃ í ya na kuwɛɛi.

⁷ Waati iyi à kɔ woodau akã akã si kuta, amboei Ilaaɔ̃ í má inya. Amboeu í jɔ̀ wajui Moizi wa daana hee inɛi Izirɛli ŋa à mɔngɔ ku kãsiɛ iju. Do nŋu fei, amboeu í na í tã. Bii í jɛ wooda iyi í jɔ̀ inɛ ŋa à kui í naa do dimii amboe bɛɛbɛ,

⁸ amboei icɛ iyi Hundei Ilaaɔ̃ wa ce kaa re bɛɛbɛ? Ntɔ ntɔ á re.

⁹ Icɛi wooda iyi í ya yɛ taalei inɛ ŋa í nɛ amboe, amma ti icɛ iyi í jɔ̀ inɛ ŋa à jɛ dee dee si wajui Ilaaɔ̃ í roo hee bii í jĩ.

¹⁰ Aa ka yɔkɔ ka ni mɔm amboe iyi wa má inya tako kù to ngɔgɔ do ti nsɛi iyi í la í roo.

¹¹ Ntɔi, bii mii iyi kaa kpɛ í nɛ amboe, zaka bɛirei amboei mii iyi á ya maa wɛɛ do ajɔ fei á la ku to.

¹² À waa fɔ ide do naanɛ si na iyi í jɔ̀ à nɛ kpãa ku cɔu ihɛ̃.

¹³ A kù jɛ bɛi Moizi iyi í bii fuugɛsɛ ku ba inɛi Izirɛli ŋa a maà yɛ waati iyi amboeu í sɛkɛɛ hai si wajuɛ.

¹⁴ Amma à lele idɔ nŋa a kù yɔkɔ a kù gbɔ yaaseɛ. Baa do nnyi fei bii à waa cio tiai akabuu sintei idei Ilaaɔ̃, í yɛi bɛi fuugɛsɛu í kɔ̀ í wa bɛ. Nɔ fuugɛsɛu kaa nya bii kù jɛ à dasi Kirisi naanɛ.

¹⁵ Baa nnyi má, waati iyi inɛi Izirɛli ŋa à gbɔ à waa cio tia iyi Moizi í kɔ fei, í ya yɛ bɛi fuugɛsɛu wa ganji ŋa a gbɔ yaaseɛi.

¹⁶ Amma waati iyi inɛ í kpaasi idɔɛ í sinda si Lafɛ̃ɛ, waati bɛɛbɛi fuugɛsɛu á nya.

¹⁷ Nɔ wee Lafɛ̃ɛu, Hundei. Tengi bii Hundei Lafɛ̃ɛ í wa, tengi bɛi ara ku nɛ í ya wa.

¹⁸ Fuugɛsɛu kù wa si waju nwa má nɔ à ya ka maa yɛ amboei Lafɛ̃ɛi bɛi si digi, nɔ amboeɛ iyi à waa cɔu, nŋui wa kpaasi wa ku ba ka jɔɔ, nɔ í ya maa kɔ̃ɔsii waati kãma fei si wa. Icɛu bɛ, Hundei Lafɛ̃ɛi wa coo.